ഗ്രീസ് യാത്രക്കാരുടെ ശ്രദ്ധക്ക്‌: കള്ളൻമാരുണ്ട്​ സൂക്ഷിക്കുക

ദുബൈ: വേനലവധി ആഘോഷിക്കാൻ വിദേശത്ത്​ പോകുന്ന പൗരന്മാർക്ക്​ യു.എ.ഇയുടെ മുന്നറിയിപ്പ്​. സ്വന്തം സാധനങ്ങൾ സൂക്ഷിക്കണമെന്നും കള്ളൻമാർ എമ്പാടുമുണ്ടെന്നുമാണ്​ ഉപദേശത്തി​​െൻറ സാരാംശം. ഗ്രീസിലേക്ക്​ പോകുന്നവരാണ്​ ഏറ്റവും കൂടുതൽ സൂക്ഷിക്കേണ്ടത്​. പ്രത്യേകിച്ചും സാന്തോർണി ദ്വീപ്​ സന്ദർശിക്കുന്നവർ. അതിശയകരമായ സൂര്യാസ്​തമനങ്ങളും ലാവാ കല്ലുകൾ നിറഞ്ഞ ബീച്ചും ചേർന്ന്​ മനോഹരമായ ഇവിടം ഗ്രീസ്​ തീരത്തുനിന്ന്​ 200 കിലോമീറ്റർ അകലെയാണ്​. വിനോദ സഞ്ചാരികളുടെ വൻ ഒഴുക്കാണ്​ ഇങ്ങോട്ട്​ ഉണ്ടാവുക.ഇൗ സാഹചര്യത്തിൽ യു.എ.ഇ. എംബസിയാണ്​ മുന്നറിയിപ്പ്​ പുറപ്പെടുവിച്ചത്​. പോക്കറ്റടി പ്രത്യേകം സൂക്ഷിക്കണമെന്ന്​ തിങ്കളാഴ്​ച പുറപ്പെടുവിച്ച മുന്നറിയിപ്പിൽ പറയുന്നു.  

സൂര്യാസ്​തമയത്തിന്​ ശേഷമാണ്​ കുടുതൽ സുക്ഷിക്കേണ്ടതെന്നും പറയുന്നു. യു.എ.ഇയിൽ നിന്ന്​ ഏറ്റവും കൂടുതൽ സന്ദർശകർ പോകുന്ന സ്​ഥലമാണ്​ ഗ്രീസ്​. 1996ൽ ഏതൻസിലേക്ക്​ എമിറേറ്റ്​സ്​ സർവീസ്​ തുടങ്ങിയ ശേഷം 30ലക്ഷം പേർ ഇതിൽ യാത്ര ചെയ്​തിട്ടുണ്ട്​. യാത്രചെയ്യുന്നവർ ശ്രദ്ധിക്കേണ്ട കാര്യങ്ങളെക്കുറിച്ച്​ വിദേശകാര്യ അന്താരാഷ്​ട്ര സഹകരണ മന്ത്രാലയം നേരത്തെ ബോധവൽക്കരണം നടത്തിയിരുന്നു. വലിയ തോതിൽ പണം കരുതുന്നതിന്​ പകരം ക്രെഡിറ്റ്​ കാർഡുകൾ കരുതുക. പാസ്​പോർട്ട്​ സുരക്ഷിത സ്​ഥാനത്ത്​ സൂക്ഷിക്കുക തുടങ്ങിയ നിർദേശങ്ങളാണ്​ ഇതിൽ പ്രധാനം. വിദേശത്ത്​ എന്തെങ്കിലും പ്രയാസങ്ങൾ നേരിട്ടാൽ ബന്ധപ്പെടാൻ 80044444 എന്ന ടോൾ ഫ്രീ നമ്പറും ഏർപ്പെടുത്തിയിട്ടുണ്ട്​.