​േപാലീസെത്താൻ കാക്കാതെ രക്ഷാ പ്രവർത്തനം; ആംബുലൻസ്​ ജീവനക്കാർ രക്ഷിച്ചത്​ മൂന്ന്​ ജീവിതങ്ങൾ

ദുബൈ:  സത്​കർമങ്ങൾക്ക്​  ഏറെ ഇരട്ടി പുണ്യം ലഭിക്കുന്ന മാസമാണ്​ റമദാൻ. ദുബൈ ആംബുലൻസ്​ സേവന കോർപറേഷൻ (ഡി.സി.എ.എസ്​) ജീവനക്കാരായ ജലാൽ അബാദിയും നാസർ അൽ മർസൂഖിയും റമദാനെ വരവേറ്റതു തന്നെ മൂന്നു മനുഷ്യ ജീവനുകൾ രക്ഷിക്കുക എന്ന ഉൽകൃഷ്​ഠമായ നൻമയിലൂടെയാണ്. 
വെള്ളിയാഴ്​ച അൽ മനാറിലെ സ്വദേശി വില്ലയിലാണ്​ തീ പിടിത്തമുണ്ടായത്​.

പുകയും തീയും പടരുന്നതിനാൽ അകത്തു നിന്ന്​ രക്ഷപ്പെടാൻ നിവൃത്തിയില്ലാതെ കുട്ടികളും സ​്​ത്രീയും നിലവിളിക്കുന്നതു കേട്ടാണ്​ ഇവരുവരും പാഞ്ഞെത്തിയത്​. സംഭവമറിഞ്ഞാലുടൻ സിവിൽ ഡിഫൻസ്​ കുതിച്ചെത്തുമെന്ന്​ ഉറപ്പുണ്ടെങ്കിലും രക്ഷാ പ്രവർത്തനം ആരംഭിക്കാൻ വൈകിക്കേണ്ടതില്ല എന്ന്​ ഇവർ തീരുമാനിക്കുകയായിരുന്നു.  അഞ്ച​ു പേർ അപ്പോഴേക്കും വീട്ടിൽ നിന്ന്​ രക്ഷപ്പെട്ടിരുന്നു. എന്നാൽ ഒരു കുട്ടിയടക്കം ചിലർ വീട്ടിനുള്ളിലുണ്ടെന്ന്​ വിവരം ലഭിച്ചു.  വീട്ടിലെ ആയ ബാൽക്കണിയിൽ നിന്ന്​ സഹായത്തിനായി വിളിച്ചു കരയുന്നുമുണ്ടായിരുന്നു.

അൽ മർസൂഖി ആയയേയും പെൺകുട്ടിയെ അബാദിയും രക്ഷപ്പെടുത്തി പുറത്തെത്തിച്ചു.  വീട്ടിനുള്ളിൽ പ്രായമായ ഒരു മുത്തശ്ശി കൂടി പെട്ടിട്ടുണ്ട്​ എന്ന വിവരം ഇവരിൽ നിന്നാണ്​ ലഭിച്ചത്​. കത്തിയാളുന്ന വീട്ടിനുള്ളിൽ കടന്ന്​ വയോധികയെയും പുറത്തു ​െകാണ്ടുവന്നു. ശരീരത്തിൽ ചെറു മുറിവുകളും പുക അകത്തു ചെന്ന്​ ശ്വാസ തടസവും നേരിട്ട മൂന്നു പേർക്കും പ്രഥമ ശുശ്രൂഷ നൽകി റാശിദ്​ ആശുപത്രിയിൽ എത്തിക്കുകയായിരുന്നു.  
സുഗന്ധം പുകക്കുന്ന പാത്രത്തിൽ നിന്ന്​ തീ പടർന്നതാണ്​ അപകട കാരണമായതെന്ന്​ ഇവർ പറഞ്ഞു. ഒാവനുകളിൽ നിന്നും കുന്തിരിക്കവും ഉൗദും മറ്റും പുകക്കുന്ന ഇത്തരം പാത്രങ്ങളിൽ നിന്നും തീപിടിത്തമുണ്ടാവുന്നത്​ സൂക്ഷിക്കണമെന്ന്​ ദുബൈ സിവിൽ ഡിഫൻസ്​ മുന്നറിയിപ്പു നൽകുന്നു. കഴിഞ്ഞ നോമ്പുകാലത്ത്​ 15 തീപിടുത്ത സംഭവങ്ങളാണ്​ റിപ്പോർട്ട്​ ചെയ്യപ്പെട്ടിരുന്നത്​.