കെട്ടിടങ്ങളിലെ തീ അണക്കാനുള്ള ചെലവ്​ ഉടമകൾ നൽകണം

അബൂദബി: അഗ്​നിസുരക്ഷാ സംവിധാനങ്ങൾ ഏർപ്പെടുത്തുകയും മാനദണ്ഡങ്ങൾ പാലിക്കുകയും ചെയ്യാത്ത കെട്ടിടങ്ങളിലും യന്ത്രസംവിധാനങ്ങളിലുമൊക്കെ പടരുന്ന തീയണക്കാൻ സിവിൽ ഡിഫൻസിന്​ ചെലവാകുന്ന തുക ഉടമകളിൽനിന്ന്​ തന്നെ ഇൗടാക്കാൻ ഉത്തരവ്​. പരമാവധി 50,000 ദിർഹമാണ്​ തീയണക്കാനുള്ള ചെലവായി അടക്കേണ്ടി വരിക. 2012ലെ 24ാം നമ്പർ മന്ത്രിസഭാ ഉത്തരവ്​ ഭേദഗതി ചെയ്​താണ്​ ഉപ പ്രധാനമന്ത്രിയും ആഭ്യന്തര മന്ത്രിയുമായ ശൈഖ്​ സൈഫ്​ ബിൻ സായിദ്​ ആൽ നഹ്​യാൻ പുതിയ നിയമം പാസാക്കിയത്​. ഭേദഗതി നിർദേശങ്ങളു​ള്ള പുതിയ മന്ത്രിസഭാ ഉത്തരവ്​ ഒൗദ്യോഗിക വിജ്ഞാപനത്തിൽ പ്രസിദ്ധീകരിച്ചിട്ടുണ്ട്​. 

അഗ്​നിസുരക്ഷാ സംവിധാനങ്ങൾ ഒരുക്കിയിട്ടുണ്ടെന്ന്​ ഉറപ്പ്​ വരുത്താൻ ഫെഡറൽ^ത​േ​ദ്ദശീയ സ്​ഥാപനങ്ങൾ എല്ലാ കെട്ടിട നിർമാണ പദ്ധതികളും കെട്ടിടങ്ങളുടെ എൻജിനീയറിങ്​ ഡിസൈനും സിവിൽ ഡിഫൻസ്​ ജനറൽ ഡയറക്​ടറേറ്റിലേക്ക്​ അയക്കണമെന്നും നിയമത്തിൽ പറയുന്നു. സിവിൽ ഡിഫൻസ്​ ജനറൽ ഡയറക്​ടറേറ്റ്​ നൽകുന്ന നിർമാണ പൂർത്തീകരണ സർട്ടിഫിക്കറ്റില്ലാത്ത ഒരു കെട്ടിടത്തിനും ജല^വൈദ്യുതി കണക്​ഷനുകൾ നൽകാൻ പാടില്ല. സുരക്ഷാ സംവിധാന സർട്ടിഫിക്കറ്റ്​ കൂടെ വെക്കാത്ത ലൈസൻസ്​ അപേക്ഷകളും ലൈസൻസ്​ പുതുക്കാനുള്ള അപേക്ഷകളും നിരസിക്കും. 

സിവിൽ ഡിഫൻസ്​ ജനറൽ അതോറിറ്റിയുടെ നിർമാണ പൂർത്തീകരണ സർട്ടിഫിക്കറ്റില്ലാത്ത ഒരു ​െകട്ടിടത്തിനും ഇൻഷുറൻസ്​ അനുവദിക്കുകയോ പുതുക്കുകയോ ചെയ്യുന്നതിൽനിന്ന്​ ഇൻഷുറൻസ്​ കമ്പനികളെ നിയമം വിലക്കുന്നു. കെട്ടിടങ്ങളുടെ ഇൻഷുറൻസ്​ പദ്ധതികളുടെ പകർപ്പ്​ പദ്ധതിയിൽ ചേർന്ന്​ ഒരാഴ്​ചക്കകം സിവിൽ ഡിഫൻസ്​ പബ്ലിക്​ അഡ്​മിനിസ്​ട്രേഷനിൽ സമർപ്പിക്കണം. ഇൻഷുർ ചെയ്​ത കെട്ടിടങ്ങളുടെയും സംവിധാനങ്ങളുടെയും അർധ വാർഷിക റിപ്പോർട്ട്​ സിവിൽ ഡിഫൻസ്​ പബ്ലിക്​ അഡ്​മിനിസ്​ട്രേഷന്​ ലഭ്യമാക്കണമെന്നും നിയമം അനുശാസിക്കുന്നു.