നിയമം ലംഘിച്ച്​ കറങ്ങിയാൽ പിഴ നൽകേണ്ടി വരും, കനത്ത പിഴ

ദുബൈ: രോഗം പകരുവാനുള്ള ചെറിയൊരു സാധ്യത സൃഷ്​ടിക്കുന്നവർക്കെതിരെ പോലും കനത്ത ശിക്ഷാ നടപടികൾ പ്രഖ്യാപിച്ചിരിക്കുകയാണ്​ യു.എ.ഇ. പകർച്ചവ്യാധി തടയുന്നതിനും പൊതുജന ആരോഗ്യം സംരക്ഷിക്കുന്നതിനും ലക്ഷ്യമിട്ടാണ്​ ഇൗ നടപടികൾ. സമ്പർക്ക വിലക്ക്​ ലംഘിച്ച്​ നടക്കുന്നവർക്ക്​ അരലക്ഷം ദിർഹം (10 ലക്ഷം രൂപ) പിഴ ചുമത്താനാണ്​ തീരുമാനം. ജോലി ആവശ്യത്തിനോ അവശ്യവസ്​തുക്കളോ വാങ്ങുവാനല്ലാതെ വീട്ടിൽ നിന്ന്​ പുറത്തിറങ്ങിയാൽ രണ്ടായിരം ദിർഹം ചുമത്തും.

അനാവശ്യമായി ആശുപത്രികളിൽ പോകുന്നതു പോലും പിഴ കിട്ടാൻ വഴിവെക്കും. സ്വന്തം വാഹനമാണെങ്കിൽ പോലും മൂന്നിലേറെ പേർ യാത്ര ചെയ്​താൽ നൽകണം ആയിരം ദിർഹം ഫൈൻ. ഇൗ കുറ്റങ്ങൾ ആവർത്തിച്ചാൽ പിന്നെ ഇരട്ടിത്തുക പിഴയായി ഇൗടാക്കും. പിന്നെയും ചെയ്​തുവെന്നു വന്നാൽ പ്രോസിക്യുഷൻ നടപടികൾ ആരംഭിക്കും.മന്ത്രിസഭാ തീരുമാനത്തി​​​െൻറ അടിസ്​ഥാനത്തിൽ യു.എ.ഇ അറ്റോണി ജനറൽ പ്രഖ്യാപിച്ചതാണിത്​. മാർച്ച്​ 26 മുതൽ ഇൗ നിയമത്തിന്​ പ്രാബല്യമുണ്ട്​.

നി​ർദേശിച്ച മരുന്ന്​ കഴിക്കാതെ, ആശുപത്രിയിൽ കിടക്കാതെ നടക്കുന്നവർക്ക്​ അര ലക്ഷം പിഴ ചുമത്തും. അധികൃതർ നിർദേശിച്ചതു പ്രകാരം അടച്ചിടാത്ത വിദ്യാഭ്യാസ സ്​ഥാപനങ്ങൾ, സിനിമാശാലകൾ, ജിംനേഷ്യം,ക്ലബുകൾ, മാർക്കറ്റുകൾ, പാർക്ക്​, കഫേ, റസ്​റ്ററൻറുകൾ, ഷോപ്പിങ്​ മാളുകൾ എന്നിവക്കെല്ലാം അര ലക്ഷം ചുമത്തും. ഇവിടെ സന്ദർശനം നടത്തുന്നവരും 500 ദിർഹം വീതം പിഴ നൽകേണ്ടി വരും.

കൂട്ടായ്​മകൾ, ആഘോഷങ്ങൾ, സമ്മേളനങ്ങൾ എന്നിവ നടത്തിയാൽ പതിനായിരം ദിർഹമാണ്​ പിഴ. പ​െങ്കടുക്കാനെത്തിയവർ അയ്യായിരം വീതം നൽകേണ്ടി വരും. പകർച്ച വ്യാധി റിപ്പോർട്ട്​ ചെയ്യപ്പെട്ട രാജ്യങ്ങളിൽ നിന്ന്​ വന്നവർക്ക്​ ആരോഗ്യമന്ത്രാലയം നിർദേശിച്ച മുൻകരുതൽ നടപടികൾ സ്വീകരിച്ചില്ലെങ്കിൽ രണ്ടായിരം ദിർഹം ചുമത്തും.താൽകാലിക അടച്ചിടലിൽ നിന്ന്​ ഒഴിവാക്കിക്കൊടുത്ത സ്​ഥലങ്ങളിൽ ആ​േരാഗ്യ സുരക്ഷാ മുൻകരുതലുകൾ പാലിച്ചിട്ടില്ലെങ്കിൽ 3000 ദിർഹം പിഴ ഇൗടാക്കും.

രോഗാണുകലർന്നതോ കലരാൻ സാധ്യതയുള്ളതോ ആയ വസ്​ത്രങ്ങൾ, ​ലഗേജുകൾ തുടങ്ങിയവ കൃത്യമായ അണുനാശനം നടത്തുകയോ അതിനാവുന്നില്ലെങ്കിൽ നശിപ്പിക്കുകയോ വേണം. അല്ലാത്ത പക്ഷം 3000 ദിർഹം പിഴ നൽകേണ്ടി വരും. കപ്പലിൽ വേണ്ടത്ര മുൻകരുതൽ നടപടികൾ കൈക്കൊണ്ടില്ലെങ്കിൽ 10000 ദിർഹം പിഴയുണ്ട്​. അണുനശീകരണ പ്രവർത്തനങ്ങളിൽ സഹകരിക്കാത്തവർക്ക്​ അയ്യായിരം ദിർഹം പിഴ ചുമത്തും. അനാവശ്യമായി ആരോഗ്യ കേന്ദ്രങ്ങളിലേക്ക്​ പോകുന്നതും ഒഴിവാക്കണം. ആയിരം ദിർഹം പിഴ നൽകേണ്ടി വരും. ആവശ്യപ്പെട്ടിട്ടും ആരോഗ്യപരിശോധന നടത്താൻ കൂട്ടാക്കാതെ വന്നാൽ അയ്യായിരം ദിർഹമാണ്​ പിഴ.