യു.എ.ഇ എക്സ്ചേഞ്ച് മൊബൈൽ  ആപ്പും വെബ്സൈറ്റും പ്രവർത്തനം തുടങ്ങി

അബൂദബി: ഉപഭോക്​താക്കൾക്ക്​ മൊബൈൽ ഫോണിൽ നിന്നോ ലാപ്ടോപ്പിൽ നിന്നോ ഓൺലൈൻ വഴി പണമിടപാടുകൾ നടത്തുന്നതിന്​ യു.എ.ഇ എക്​സേഞ്ച്​ വെബ്സൈറ്റും മൊബൈൽ ആപ്പും തുടങ്ങി. ഇൗ മൊബൈൽ ആപ്പിലോ വെബ്സൈറ്റിലോ (http://ae.uaeexchange.com) ഒരു തവണ രജിസ്​റ്റർ ചെയ്​താൽ യു.എ.ഇയിൽനിന്ന് ലോകത്തെവിടേക്കും ഓൺലൈനിൽ  പണമയക്കാൻ സഹായിക്കുന്നതാണ്​ സംവിധാനം.

നൂതന സാങ്കേതിക വിദ്യകൾ സമയോചിതം പ്രയോജനപ്പെടുത്തി ഉപഭോക്താക്കളെ എന്നും പിന്തുണച്ചിട്ടുള്ള യു.എ.ഇ എക്സ്ചേഞ്ച് ഡിജിറ്റൽ പ്രതലത്തിൽ നടത്തിക്കൊണ്ടിരിക്കുന്ന സമൂലമായ വികസനങ്ങളുടെ ഭാഗമായിട്ടാണ് മൊബൈൽ ആപ്പും വെബ്​സൈറ്റും മുഖേന ഓൺലൈൻ മണി ട്രാൻസ്​ഫർ ആരംഭിക്കുന്നതെന്ന് ഈ സേവനങ്ങൾക്ക് തുടക്കം കുറിച്ചുകൊണ്ട് ഗ്രൂപ്പ് ചീഫ് എക്​സിക്യൂട്ടീവ് ഓഫീസർ പ്രമോദ് മങ്ങാട് പറഞ്ഞു. ഈ വലിയ സാങ്കേതിക കുതിപ്പിന് തങ്ങൾക്ക് വഴിയൊരുക്കിയ യു.എ.ഇ സെൻട്രൽ ബാങ്കിനോട് നന്ദിയുണ്ടെന്നും അദ്ദേഹം സൂചിപ്പിച്ചു. ബാങ്ക് അക്കൗണ്ടിന്​ പുറമെ ലോകത്തെ 165 രാജ്യങ്ങളിലെ രണ്ട് ലക്ഷത്തോളം പേ-ഔട്ട് ലൊക്കേഷനുകളിലേക്കും പണമയക്കാം. 

ഇടപാടി​​െൻറ പുരോഗതി മനസ്സിലാക്കാനുള്ള ട്രാക്കർ ഓപ്‌ഷനും എസ്.എം.എസ്, ഇമെയിൽ സംവിധാനങ്ങളും ഉണ്ട്. ഏറ്റവുമടുത്തുള്ള യു.എ.ഇ എക്സ്ചേഞ്ച് ശാഖകളുടെ ലൊക്കേഷൻ തിരഞ്ഞുപിടിക്കാനുള്ള സംവിധാനവും ഇതിലുണ്ട്. ആപ്പിൾ, ആൻഡ്രോയിഡ്​ ഓപ്പറേറ്റിങ്​ സിസ്​റ്റങ്ങളിൽ ലഭ്യമാകുന്ന ഈ മൊബൈൽ ആപ്പ് സമ്പൂർണ സുരക്ഷിതമാണെന്നും യു.എ.ഇ എക്​സ്​​േചഞ്ച്​ അധികൃതർ പറഞ്ഞു.