മുഹമ്മദ്​ ബിൻ സായിദ്​ മതപണ്ഡിതരെ സ്വീകരിച്ചു

അബൂദബി: യു.എ.ഇ പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാ​​​െൻറ അതിഥികളായെത്തിയ മതപണ്ഡിതരെ അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാൻഡറുമായ ജനറൽ ശൈഖ് മുഹമ്മദ് ബിൻ സായിദ് ആൽ നഹ്​യാൻ അൽ ബതീൻ കൊട്ടാരത്തിൽ സ്വീകരിച്ചു. പ്രസിഡൻഷ്യൽകാര്യ മന്ത്രാലയത്തി​​​െൻറ മേൽനോട്ടത്തിൽ ഒൗഖാഫ്​ തയാറാക്കുന്ന പരിപാടികളിൽ പ്രഭാഷണം നടത്തുന്നതിനും ക്ലാസെടുക്കുന്നതിനുമായാണ്​ എല്ലാ വർഷവും റമദാനിൽ മതപണ്ഡിതരെ രാജ്യത്തേക്ക്​ ക്ഷണിക്കുന്നത്​. 

മതപണ്ഡിതർക്ക്​ ആശംസ കൈമാറിയ ശൈഖ്​ മുഹമ്മദ്​ ബിൻ സായിദ്​ യു.എ.ഇയെയും മറ്റു അറബ്​, ഇസ്​ലാമിക രാജ്യങ്ങളെയും കൂടുതൽ ​െഎശ്വര്യം കൊണ്ട്​ അനുഗ്രഹിക്കാൻ അല്ലാഹുവിനോട്​ പ്രാർഥിച്ചു. പ്രഭാഷണങ്ങളിൽ മതപണ്ഡിതർക്ക്​ അദ്ദേഹം വിജയം ആശംസിച്ചു. ഇസ്​ലാമിക സമൂഹങ്ങളെ ബോധവത്​കരിക്കുന്നതിലും സഹിഷ്​ണുത പ്രചരിപ്പിക്കുന്നതിലും മതപണ്ഡിതരുടെ ഉത്തരവാദിത്തം വ​ളരെ വലുതാണെന്നും അദ്ദേഹം ഉണർത്തി. 

ഖുർആ​​​െൻറ 13 ഭാഷകളിലേക്കുള്ള വിവർത്തനം ഇസ്​ലാമിക സാംസ്​കാരിക സായിദ്​ ഹൗസ്​ ഡയറക്​ട​ർ ജനറൽ ഡോ. നിദാൽ ആൽ തുനൈജി അവതരിപ്പിച്ചു. റമദാനോടനുബന്ധിച്ച്​ ഒൗഖാഫ്​ തയാറാക്കിയ പരിപാടികൾ ചെയർമാൻ ഡോ. മുഹമ്മദ്​ മതാർ ആൽ കഅബി ശൈഖ്​ മുഹമ്മദ്​ ബിൻ സായിദിന്​ വിശദീകരിച്ച്​ നൽകി. ഒൗഖാഫി​​​െൻറ പരിപാടികളിൽ പ്രഭാഷണം നടത്താൻ സാധിക്കുന്നതിൽ മതപണ്ഡിതർ സംതൃപ്​തി അറിയിച്ചു. യു.എ.ഇക്കും പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാനും രാജ്യത്തെ ജനങ്ങൾക്കും അവർ ആശംസ അറിയിച്ചു. ഉപ പ്രധാനമന്ത്രിയും പ്രസിഡൻഷ്യൽകാര്യ മന്ത്രിയുമായ ശൈഖ്​ മൻസൂർ ബിൻ സായിദ്​ ആൽ നഹ്​യാനും ഒൗഖാഫ്​, നീതിന്യായ വകുപ്പ്​, ഇസ്​ലാമിക കാര്യ സായിദ്​ ഹൗസ്​ എന്നിവയുടെ പ്രതിനിധികളും സംബന്ധിച്ചു.