ഡെലിവറി വാഹനങ്ങൾക്ക്​  നിയ​ന്ത്രണങ്ങൾ നടപ്പാക്കുന്നു

ദുബൈ: ഒാർഡർ ചെയ്​ത വസ്​തുക്കൾ പറഞ്ഞ സമയത്തിനുള്ളിൽ ലക്ഷ്യസ്​ഥാനത്ത്​ എത്തിക്കാനായി കുതിച്ചോടുന്ന ഡെലിവറി വാഹനങ്ങൾക്ക്​ നിയ​ന്ത്രണം വരുന്നു. വാഹനാപകട നിരക്കിൽ വർധനവുണ്ടാവുന്നതും അപകടങ്ങളിൽ പെടുന്നത്​ ഏറെയും ഇരുചക്രവാഹനങ്ങളാവുന്നതും കണക്കിലെടുത്താണ്​ ദുബൈ പൊലീസ്​, സാമ്പത്തിക വികസന വിഭാഗം (ഡി.ഇ.ഡി), ദുബൈ നഗരസഭ എന്നിവയുടെ സഹകരണത്തോടെ റോഡ്​ ഗതാഗത അതോറിറ്റി (ആർ.ടി.എ) നിയന്ത്രണ ചട്ടങ്ങൾ നടപ്പാക്കുന്നത്​. 
ജൂൺ ആറു മുതലാണ്​ ചട്ടങ്ങൾ നിലവിൽ വരുക. ഇതു പ്രകാരം സാധനങ്ങൾ സൂക്ഷിക്കാനായി വാഹനങ്ങളിൽ സ്​ഥാപിക്കുന്ന പെട്ടികളുടെ വലിപ്പത്തിലും രൂപത്തിലും മാറ്റം വേണ്ടി വരും. പെട്ടികളുടെ പരമാവധി വലിപ്പം 50x50x50 സ​െൻറിമീറ്ററാണ്​.ഇവ വാഹനത്തിൽ വെൽഡു ചെയ്​ത്​ ഘടിപ്പിക്കുന്നതിനു പകരം ആണിയടിച്ച്​ ഉറപ്പിച്ചിരിക്കണം.   അറ്റം കൂർത്തു നിൽക്കരുത്​. പുറം ഭാഗം പ്ലാസ്​റ്റിക്​ കൊണ്ടു നിർമിച്ച പെട്ടികളിൽ എല്ലാ വശങ്ങളിലും റിഫ്ലക്​ടറുകളും ലൈറ്റുകളും വേണം. 20 മീറ്റർ അകലെ നിന്ന്​ വായിക്കാവുന്ന വിധം വ്യക്​തമായി സ്​ഥാപനത്തി​​െൻറ പേരും വിവരങ്ങളും രേഖപ്പെടുത്തിയിട്ടുണ്ടാവണം, നിയന്ത്രണം തെറ്റുന്ന രീതിയിൽ പെട്ടികൾ വാഹനത്തിൽ നിന്ന്​ തുറിച്ചു നിൽക്കരുത്​ തുടങ്ങിയ നിബന്ധനകളാണ്​ ഏർപ്പെടുത്തുന്നത്​. 
ഇൗ വർഷം നടപ്പാക്കാൻ ആരംഭിക്കുമെങ്കിലും 2018 മാർച്ച്​ ആറു വരെ ഇതിനായി സമയം അനുവദിക്കുമെന്ന്​ ആർ.ടി.എ ലൈസൻസിംഗ്​ സി.ഇ.ഒ അഹ്​മദ്​ ഹാഷിം ബെഹ്​റൂസിയാൻ പറഞ്ഞു. നിബന്ധനകൾ നടപ്പിൽ വരുത്തുന്ന ചുമതല ദുബൈ പൊലീസ്​ നിർവഹിക്കും.പെട്ടികളുടെ ഘടനയും അവയിൽ വിതരണം ചെയ്യാവുന്ന വസ്​തുക്കളും സംബന്ധിച്ച കാര്യങ്ങൾ നഗരസഭ തീരുമാനിക്കും, സ്​ഥാപനങ്ങളെ ഇക്കാര്യങ്ങൾ അറിയിക്കുകയും നിഷ്​കർഷിക്കുകയും ചെയ്യുന്ന ചുമതല ഡി.ഇ.ഡിയാണ്​ നിർവഹിക്കുക.