ആഡംബര വാച്ചുകളും രത്​നാഭരണങ്ങളും ദേഹത്ത്​ കെട്ടിവെച്ച്​ കടത്താൻ​ ശ്രമം; യൂറോപ്യൻ യാത്രക്കാരൻ പിടിയിൽ 

ദുബൈ: 30 ലക്ഷം ദിർഹത്തിലേറെ വില വരുന്ന ആഡംബര വാച്ചുകളും രത്​നാഭരണങ്ങളും ദേഹത്ത്​ കെട്ടിവെച്ച്​ കടത്താൻ ശ്രമിച്ചയാൾ  വിമാനത്താവളത്തിൽ പിടിയിൽ. ഒരു കിഴക്കനേഷ്യൻ രാജ്യത്തു നിന്നുള്ള വിമാനത്തിൽ ദുബൈയിലെത്തിയ യൂറോപ്യൻ പൗര​​െൻറ കള്ളക്കടത്ത്​ ശ്രമമാണ്​ ദുബൈ കസ്​റ്റംസ്​ പൊളിച്ചത്​. 
അന്താരാഷ്​ട്ര വിമാനത്താവളത്തിലെ ടെർമിനൽ 3ൽ എത്തിയ ഇയാളുടെ പെരുമാറ്റത്തിൽ സംശയം തോന്നിയതായി ദുബൈ കസ്​റ്റംസ്​ യാത്രാ വിഭാഗം ഡയറക്​ടർ ഇബ്രാഹിം കമാലി പറഞ്ഞു. തുടർന്ന്​ എക്​സ്​റേ പരിശോധന നടത്തിയപ്പോൾ വസ്​ത്രത്തിനുള്ളിൽ സമർഥമായി കെട്ടിപ്പൊതിഞ്ഞുവെച്ച വസ്​തുക്കൾ വെളിപ്പെട്ടു. 76 വാച്ചുകളും ആറ്​ ആഭരണങ്ങളുമാണ്​ കണ്ടെടുത്തത്​. ഇതിന്​ 3,016,000 ദിർഹം വില വരും. കസ്​റ്റംസ്​ തീരുവ നൽകാതെ വിലപിടിപ്പുള്ള ആഡംബര വസ്​തുക്കൾ കടത്താൻ ശ്രമിച്ചതിന്​ ഇയാൾക്കെതിരെ നിയമ നടപടികൾ കൈക്കൊള്ളും.

വളരെ ശ്രദ്ധാപൂർവമാണ്​ പ്രതി കള്ളക്കടത്തിന്​ ശ്രമിച്ചതെങ്കിലും അതിലേറെ ശ്രദ്ധ പുലർത്തിയ കസ്​റ്റംസ്​ ഉദ്യോഗസ്​ഥരുടെ ജാഗ്രതക്കു മുന്നിൽ അതു വിഫലമാവുകയായിരുന്നു.  പല ആളുകളും ഇത്തരത്തിൽ നിയമവിരുദ്ധമായി വസ്​തുക്കൾ കടത്താൻ ശ്രമിക്കുന്നുണ്ടെന്നും ഏതെങ്കിലും തരത്തിലെ സംശയമുയർന്നാൽ നിയമലംഘനം നടക്കുന്നില്ല എന്ന്​ ഉറപ്പുവരുത്താൻ പരിശോധനാ നടപടി സ്വീകരിക്കുമെന്നും ഇബ്രാഹിം കമാലി വ്യക്​തമാക്കി. അത്യാധുനിക ഉപകരണങ്ങളാണ്​ ഇതിനായി സജ്ജമാക്കിയിരിക്കുന്നത്​.  തീരുവ നഷ്​ടപ്പെടുന്നില്ല എന്ന്​ ഉറപ്പാക്കലും  ദുബൈയു​െട സമ്പദ്​ വ്യവസ്​ഥ സംരക്ഷിക്കലും ദുബൈ കസ്​റ്റംസ്​ പ്രതിജ്​ഞാബദ്ധമാണ്​. ഏതാനും ആഴ്​ച മുൻപ്​ മയക്കുമരുന്നുകൾ വിദഗ്​ധമായി കടത്താനുള്ള ശ്രമങ്ങളും ദുബൈ കസ്​റ്റംസ്​ തകർത്തിരുന്നു.