അജ്​മാനിലെ കൊല: പ്രതി  പൊലീസ് പിടിയില്‍ 

അജ്മാന്‍: ആഫ്രിക്കന്‍ സ്വദേശിയെ കൊലപ്പെടുത്തിയ കേസിലെ പ്രതിയെ പൊലീസ് പിടികൂടി. അജ്മാന്‍  സനയയിലെ താമസ സ്ഥലത്താണ്  കൊലയാളിയുടെ കുത്തേറ്റ് മുപ്പതുകാരന്‍ മരണപ്പെട്ടത്. കൊലക്ക്​ ശേഷം ഒളിവില്‍ പോയ കൊലയാളിയെ പോലീസ് പിടികൂടുകയായിരുന്നു. 
വ്യാവസായിക മേഖലയിലെ ഒരു സ്ഥലത്ത് നിന്ന് പുറത്തുവരുന്ന ദുർഗന്ധത്തെക്കുറിച്ചു വിവരം ലഭിച്ചതി​​െൻറ അടിസ്ഥാനത്തില്‍ നടത്തിയ അന്വേഷണത്തിലാണ്  കൊലപാതകം പുറത്ത് വരുന്നത്. തെളിവുകൾ ശേഖരിച്ച്  മൃതദേഹം പോസ്​റ്റുമോർട്ടത്തിനായി ഫോറൻസിക് വിഭാഗത്തിലേക്ക് മാറ്റി. 
തുടര്‍ന്ന്‍  പോലീസ് പ്രത്യേക അന്വേഷണ സംഘം രൂപീകരിച്ചു.

പ്രദേശത്തെ ചില ആളുകളില്‍ നിന്നും ലഭിച്ച വിവരത്തി​​െൻറ അടിസ്ഥാനത്തിലാണ് ആഫ്രിക്കകാരനാണ് കൃത്യം നടത്തിയതെന്ന് തെളിയുന്നത്. തൊഴില്‍ തര്‍ക്കമാണ് കൊലപാതകത്തിനു കാരണം. ഇതിനു മുമ്പ്​  നിരവധി തവണ പ്രതി ഇദേഹത്തെ കൊലപ്പെടുത്താന്‍ ശ്രമിച്ചിരുന്നു.  പ്രതി  കുറ്റസമ്മതം നടത്തിയെന്ന് പ്രോസിക്യൂഷൻ കോടതിയെ അറിയിച്ചു. പ്രതിയെ പിടികൂടാന്‍ കഴിഞ്ഞ പൊലീസിനെ അജ്മാൻ പോലീസ് സി.ഐ.ഡി വകുപ്പ്​ ഡെപ്യൂട്ടി ഡയരക്ടർ മേജർ അഹമ്മദ് സഈദ് അൽ നുവൈമി അഭിനന്ദിച്ചു.