ഹോട്ടലിൽ നിന്ന്​ വാച്ച​്​  മോഷ്​ടിച്ച കേസ്​: ബ്രിട്ടീഷ്​ യുവാവി​െൻറ തടവ്​ ശരിവെച്ചു

ദുബൈ: ഹോട്ടൽ മുറിയിൽ നിന്ന്​ 36000 ദിർഹം വിലയുള്ള വാച്ചും പാസ്​പോർട്ടും മോഷ്​ടിച്ച കേസിൽ ബ്രിട്ടീഷ്​ യുവാവി​​െൻറ തടവു ശിക്ഷ അപ്പീൽ കോടതി ശരിവെച്ചു. യു.എ.ഇയിൽ സന്ദർശന വിസയിലെത്തിയ 29കാരനാണ്​ സ്വന്തം നാട്ടുകാരനായ ഒരു മാനേജറുടെ മുറിയിൽ അതിക്രമിച്ചു കയറി മോഷണം നടത്തിയത്​. 2016ൽ നടന്ന സംഭവത്തിലെ ഇയാളുടെ കൂട്ടു പ്രതി ഒളിവിലാണ്​. ദുബൈ മറീനയിലെ റൂമിൽ വാച്ച്​ വാങ്ങാൻ എന്നു തെറ്റിദ്ധരിപ്പിച്ചാണ്​ ഇവർ വന്നതെന്നാണ്​ നിഗമനം.

മദ്യപിച്ചിരുന്നുവെന്നും സുഹൃത്തിനൊപ്പം അനുവാദത്തോടെയാണ്​ മുറിയിൽ കടന്നതെന്നും കുറ്റാരോപിത യുവാവ്​ വാദിച്ചു. പരാതിക്കാരനും മദ്യലഹരിയിലായിരുന്നുവെന്നും താൻ നിരപരാധിയാണെന്നുമാണ്​ യുവാവി​​െൻറ പക്ഷം. എന്നാൽ അപ്പീൽ ശരിവെക്കാൻ ജഡ്​ജി കൂട്ടാക്കിയില്ല. മൂന്നു വർഷ തടവു ശിക്ഷ അനുഭവിച്ച ശേഷം ഇയാളെ നാടുകടത്തും.റോളക്​സ്​ വാച്ച്​ വിൽക്കാൻ തീരുമാനിച്ചിരുന്ന മാനേജറെ​  ഒരു സുഹൃത്താണ്​ ഒളിവിൽ പോയ യുവാവിനെ ഫോൺ മുഖേന പരിചയപ്പെടുത്തിയത്​.

ഹോട്ടലിൽ വാച്ച്​ നോക്കാനെത്തിയ അയാൾ കുറ്റ​ാരോപിതനെ കൂടി മുറിയിലേക്ക്​ കയറ്റുകയായിരുന്നു. ദേഷ്യത്തിലും ആജ്​ഞാ സ്വരത്തിലും സംസാരിച്ച പ്രതികൾ ഭീഷണിപ്പെടുത്തി വാച്ചും പാസ്​പോർട്ടും കൈക്കലാക്കുകയായിരുന്നു. പാസ്​പോർട്ട്​ തിരിച്ചു കിട്ടണമെങ്കിൽ മൂന്നു ലക്ഷം ദിർഹം നൽകണമെന്നും ഉപാധിവെച്ചു. ഒരു വെളുത്ത പൊടി മുറിയിൽ വിതറിയ പ്രതികൾ പൊലീസിൽ വിവരമറിയിച്ചാൽ താൻ കുടുങ്ങുമെന്നും ഭയപ്പെടുത്തി. പിന്നീട്​ ഇയാൾ ഹോട്ടൽ സെക്യൂരിറ്റിയെയും പൊലീസിനെയും വിവരമറിയിക്കുകയായിരുന്നു.