കോവിഡ്: രോഗം​ മറച്ചുവെച്ചാൽ യു.എ.ഇയിൽ വൻ പിഴയും തടവും

ദുബൈ: കോവിഡ് ബാധിച്ച വിവരം മറച്ചുവെക്കുന്നവർക്ക്​ കടുത്ത ശിക്ഷ ലഭിക്കുമെന്ന്​ മുന്നറിയിപ്പ്​. പകർച്ച രോഗങ ്ങൾ നിയന്ത്രിക്കുന്നതിന്​ 2014ൽ പുറത്തിറക്കിയ ഫെഡറൽ നിയമത്തിൽ കോവിഡ്​ 19 കൂടി ഉൾപ്പെടുത്തിയതായി നീതിന്യായ മന്ത്രാലയമാണ്​ വെളിപ്പെടുത്തിയത്​. പൊതുജനങ്ങളുടെ ആരോഗ്യം സംരക്ഷിക്കുന്നതിനും പകർച്ച വ്യാധികൾ തടയുന്നതിനുള്ള സർക്കാർ നടപടികളെ ശക്​തിപ്പെടുത്തുന്നതിനുമാണ്​ ഇൗ തീരുമാനം. തടവു ശിക്ഷയും 50000 ദിർഹം വരെ പിഴയുമാണ്​ ശിക്ഷ.

അസുഖമുള്ള, അസുഖമുണ്ടെന്ന്​ സംശയിക്കുന്ന ആളുകളെ കുറിച്ച്​ വിവരങ്ങൾ യഥാസമയം അറിയിക്കുന്നതിൽ വീഴ്​ച വരുത്തുന്ന ഡോക്​ടർമാർ, ഫാർമസിസ്​റ്റുകൾ, ഫാർമസി ടെക്​നീഷ്യൻമാർ, ആരോഗ്യ പ്രവർത്തകർ എന്നിവർക്കും നിയമം ബാധകമാണ്​. മരണങ്ങൾ പകർച്ച രോഗം മൂലമാണെന്ന്​ സംശയിക്കുന്നുവെങ്കിൽ അക്കാര്യവും അധികൃതരെ അറിയിക്കേണ്ടതുണ്ട്​.

രോഗമുള്ള ഒരാൾ തങ്ങളുടെ വാഹനത്തിൽ യാത്ര ചെയ്​തു എന്നറിഞ്ഞാൽ അക്കാര്യവും അറിയിക്കണം. ഇത്​ വിമാനമാണെങ്കിലും കപൽ ആണെങ്കിലും മറ്റേതെങ്കിലും വാഹനമാണെങ്കിലും ബാധകമാണ്​. സഹപ്രവർത്തകർക്ക്​ രോഗമുണ്ടെന്ന്​ കണ്ടെത്തിയാൽ ഇൗ വിവരവും 24 മണിക്കൂറിനകം ആരോഗ്യ മന്ത്രാലയത്തെ അറിയിക്കാതിരിക്കൽ കുറ്റകരമാണ്​.
ആരോഗ്യകേ​​ന്ദ്രങ്ങളിലേക്കല്ലാതെ മ​റ്റെവിടേക്കെങ്കിലും ആരോഗ്യ വകുപ്പ്​ അധികൃതരുടെ അനുമതിയില്ലാതെ യാത്ര ചെയ്​താൽ അര ലക്ഷം ദിർഹം വരെ പിഴ ലഭിക്കും.