ഗൾഫിൽ ആദ്യം; ഇലക്ട്രിക് കാർഗോ വിമാനത്തിന് യു.എ.ഇ അനുമതി നൽകി

ദുബൈ: പൂർണമായും വൈദ്യുതിയിൽ പ്രവർത്തിക്കുന്ന കാർഗോ വിമാനത്തിന് യു.എ.ഇ മന്ത്രിസഭ താൽകാലിക അനുമതി നൽകി. ഗൾഫ് മേഖലയിലെ ഒരു രാജ്യം ആദ്യമായാണ് ഇലക്ട്രിക് കാർഗോ വിമാനത്തിന് അനുമതി നൽകുന്നത്.

പരിസ്ഥിതിക്ക് അനുയോജ്യമായ ഊർജോപയോഗം വർധിപ്പിക്കുക എന്ന ലക്ഷ്യത്തോടെ നടപ്പാക്കുന്ന പദ്ധതികളുടെ ഭാഗമായാണ് അനുമതി. അബൂദബിയിൽ കഴിഞ്ഞ ദിവസം ചേർന്ന മന്ത്രിസഭയാണ് ഇത് സംബന്ധിച്ച തീരുമാനമെടുത്തത്. ചരക്ക് ഗതാഗത മേഖലയുടെ ഭാവിയെയും അതിന്‍റെ പാരിസ്ഥിതിക ആഘാതങ്ങളെയും മാറ്റുന്നതിന് സംഭാവന നൽകിയേക്കാവുന്ന സുപ്രധാന നടപടിയാണിതെന്ന് യു.എ.ഇ വൈസ് പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം പറഞ്ഞു.

പുതിയ സംവിധാനം ചരക്ക് ഗതാഗത മേഖലയുടെ ചെലവ് കുറക്കുമെന്നും ശുദ്ധ ഊർജത്തിന്‍റെ ഉപയോഗം കൂടുതൽ മേഖലകളിലേക്ക് വ്യാപിപ്പിക്കുന്നതിന് സഹായിക്കുമെന്നും വിലയിരുത്തപ്പെടുന്നു. കാലാവസ്ഥാ വ്യതിയാനത്തെക്കുറിച്ച് ആശങ്ക വർധിച്ചുവരുന്ന സാഹചര്യത്തിൽ ലോകമെമ്പാടുമുള്ള രാജ്യങ്ങൾ സുസ്ഥിരവും പരിസ്ഥിതി സൗഹൃദവുമായ ഗതാഗത രീതികളിലേക്ക് കൂടുതലായി നീങ്ങുന്നുണ്ട്. ഇതിന് സമാനമായാണ് യു.എ.ഇയും നടപടി സ്വീകരിക്കുന്നത്.