റുവാണ്ടക്കും ഇന്തോനേഷ്യക്കും യു.എ.ഇ സഹായം

ദുബൈ: റുവാണ്ടയിലേക്കും ഇന്തോനേഷ്യയിലേക്കും യു.എ.ഇ മെഡിക്കൽ സഹായം അയച്ചു. ഇതുവരെ 135 രാജ്യങ്ങളിലായി 2200 ടൺ സഹായമാണ്​ കോവിഡ്​ കാലത്ത്​ യു.എ.ഇ എത്തിച്ചത്​. ഒമ്പത്​ ടൺ മെഡിക്കൽ ഉപകരണങ്ങളാണ്​ റുവാണ്ടയിലേക്ക്​ അയച്ചത്​. ടെസ്​റ്റ്​ കിറ്റുകൾ, വെൻറിലേറ്റർ, വാക്​സിൻ എന്നിവ ഇതിൽ ഉൾപ്പെടുന്നു.യു.എ.ഇയുടെ സഹായത്തിന്​ യു.എ.ഇ റുവാണ്ട അംബാസഡർ ഹസ്സ മുഹമ്മദ്​ ഖർസാൻ അൽ ഖഹ്​താനി നന്ദി അറിയിച്ചു. ഇരുരാജ്യങ്ങളും തമ്മിലുള്ള വാണിജ്യ, സാമ്പത്തിക, നിക്ഷേപക സഹായം തുടരാൻ ഇത്​ സഹായിക്കുമെന്ന്​ അദ്ദേഹം പറഞ്ഞു.

റുവാണ്ടക്ക്​ ആദ്യമായി ചികിത്സ സഹായം ലഭിച്ചത്​ യു.എ.ഇയിൽ നിന്നായിരുന്നു. 2020 ജൂണിൽ നാല്​ ടൺ മെഡിക്കൽ ഉപകരണങ്ങളാണ്​ റുവാണ്ടയിൽ എത്തിച്ചത്​. ഇത്​ 4000ത്തോളം ആരോഗ്യ പ്രവർത്തകർക്ക്​ ഉപകാരപ്പെട്ടു. കഴിഞ്ഞ ഫെബ്രുവരിയിൽ 7.8 ടൺ മെഡിക്കൽ ഉപകരണങ്ങളും രാജ്യത്ത്​ എത്തിച്ചിരുന്നു.ഇന്തോനേഷ്യയിലേക്ക്​ ശനിയാഴ്​ച 56 ടൺ മെഡിക്കൽ ഉപകരണങ്ങളാണ്​ അയച്ചത്​. ഒാക്​സിജൻ സിലിണ്ടർ, വാക്​സിൻ തുടങ്ങിയവയും അയച്ചു. ഇന്തോനേഷ്യക്കും ആദ്യമായി സഹായം എത്തിച്ചത്​ യു.എ.ഇയായിരുന്നു. 2020 ഏപ്രിലിൽ 20 ടൺ മെഡിക്കൽ ഉപകരണങ്ങളാണ്​ അയച്ചത്​.