റോഡിൽ കൈവിട്ട കളി കളിച്ച യുവാവിനെ  തേടി ദുബൈ പൊലീസ്​

ദുബൈ: റോഡിലൂടെ കാറോടിച്ചു പോകവെ ഒരു മോട്ടർ സൈക്കിളി​​​െൻറ പിന്നിലേക്കും തിരിച്ച്​ കാറിലേക്കും ചാടിക്കയറി യുവാവി​​​െൻറ കൈവിട്ട അഭ്യാസം. ശൈഖ്​ മുഹമ്മദ്​ ബിൻ സായിദ്​ റോഡിൽ നടത്തിയ ഇൗ സ്​റ്റണ്ട്​ മൊബൈൽ ഫോണിൽ പകർത്തി സാമൂഹിക മാധ്യമങ്ങളിലൂടെ പ്രചരിപ്പിക്കുകയും ചെയ്​തു. ആളാരാണെന്ന്​ കണ്ടെത്തിയിട്ടില്ലെങ്കിലും ദുബൈ പൊലീസി​​​െൻറ കനത്ത നടപടികൾ ഇയാളെ കാത്തിരിപ്പുണ്ട്​. ഇത്തരം പ്രവർത്തികൾ വെച്ചുപൊറുപ്പിക്കില്ലെന്ന്​ ദുബൈ പൊലീസ്​ ഉപ മേധാവിയും ഫെഡറൽ ട്രാഫിക്​ കൗൺസിൽ അധ്യക്ഷനുമായ മേജർ ജനറൽ മുഹമ്മദ്​ അൽ സഫീൻ വ്യക്​തമാക്കി. 

ഇത്​ ആത്​മഹത്യാപരമാണെന്നും അദ്ദേഹം ചൂണ്ടിക്കാട്ടി. സിറ്റി വാക്കിൽ അപകടകരമായി വാഹനമോടിച്ച യുവാക്കൾക്ക്​ യു.എ.ഇ വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം റോഡ്​ വൃത്തിയാക്കൽ ഉൾപ്പെടെ നിർബന്ധിത സാമൂഹിക സേവനം വിധിച്ചിരുന്നു.

അഭ്യന്തര മന്ത്രാലയം അംഗീകരിച്ച പുതിയ ഗതാഗത നിയമപ്രകാരം അപകടകരമായി വാഹനമോടിച്ചാൽ 2000 ദിർഹം പിഴയും 23 കറുത്ത പോയിൻറും രണ്ടു മാസത്തേക്ക്​ വാഹനം കണ്ടുകെട്ടലുമാണ്​ ശിക്ഷ.  മദ്യത്തി​​​െൻറയോ മയക്കുമരുന്നി​​​െൻറയോ സ്വാധീനത്തിലാണ്​ ഇൗ അഭ്യാസങ്ങളെങ്കിൽ ഒരു വർഷത്തേക്ക്​ ലൈസൻസ്​ റദ്ദാക്കും.