നിയമം പാലിക്കുന്നതിൽ വീഴ്ച; രണ്ടു കമ്പനികൾക്ക് പിഴ

ദുബൈ: എമിറേറ്റിൽ ലൈസൻസോടെ പ്രവർത്തിക്കുന്ന രണ്ട് ധനകാര്യ സ്ഥാപനങ്ങൾക്ക് നിശ്ചിത റിപ്പോർട്ടിങ്​ മാനദണ്ഡം പാലിക്കുന്നതിൽ വീഴ്ച വരുത്തിയതിന് സെക്യൂരിറ്റീസ് ആൻഡ് കമ്മോഡിറ്റീസ് അതോറിറ്റി (എസ്‌.സി.‌എ) പിഴ ചുമത്തി. ഓരോ കമ്പനിക്കും ഒരു ലക്ഷം ദിർഹം വീതമാണ്​ പിഴ ചുമത്തിയിരിക്കുന്നത്​.

2024 ജൂൺ 30ന് അവസാനിക്കുന്ന സാമ്പത്തിക കാലയളവിലെ ത്രൈമാസ ഇടക്കാല സാമ്പത്തിക സ്​റ്റേറ്റ്​മെന്‍റുകൾ നിയമപരമായ സമയപരിധിക്കുള്ളിൽ സമർപ്പിക്കുന്നതിൽ കമ്പനികൾ പരാജയപ്പെട്ടതായി വിലയിരുത്തിയാണ്​ നടപടി സ്വീകരിച്ചത്​. സാമ്പത്തിക സേവന സ്ഥാപനങ്ങളുടെ സുതാര്യതയും കാര്യക്ഷമതയും ഉറപ്പാക്കുന്നതിന്​ എസ്‌.സി.‌എ നടപ്പാക്കി വരുന്ന നടപടികളുടെ ഭാഗമായാണ്​ പിഴ ചുമത്തിയത്​. യു.എ.ഇയിലെ സാമ്പത്തിക വിപണികളെ നിയന്ത്രിക്കുന്നതിലും കൈകാര്യം ചെയ്യുന്നതിലും എസ്‌.സി.‌എ നിർണായക പങ്കാണ്​ വഹിക്കുന്നത്​. സാമ്പത്തിക വിപണികൾ സുതാര്യവും നീതിയുക്തവുമാണെന്നും സ്ഥാപിത നിയമങ്ങളും ചട്ടങ്ങളും അനുസരിച്ച് പ്രവർത്തിക്കുന്നുണ്ടെന്നും ഉറപ്പാക്കുന്നത്​ അതോറിറ്റിയാണ്​. വഞ്ചന, കൃത്രിമത്വം, മറ്റ് അധാർമിക രീതികൾ എന്നിവ തടയുന്നതിന് സെക്യൂരിറ്റീസ് മാർക്കറ്റുകളിലെയും കമ്മോഡിറ്റി എക്സ്ചേഞ്ചുകളിലെയും വ്യാപാര പ്രവർത്തനങ്ങൾ സ്ഥിരമായി നിരീക്ഷിക്കുന്നുമുണ്ട്​.

സാമ്പത്തിക റിപ്പോർട്ടിങ്​, റിപ്പോർട്ട്​ സമർപ്പിക്കൽ തുടങ്ങിയ കാര്യങ്ങൾ പാലിക്കുന്നതിനാൽ നിയമലംഘനം നടത്തുന്ന കമ്പനികൾക്കെതിരെ അതോറിറ്റി കർശന നടപടിയാണ്​ സ്വീകരിക്കുന്നത്​.

യു.എ.ഇയിലെ സ്റ്റോക്ക് എക്സ്ചേഞ്ചുകളിൽ ലിസ്റ്റ് ചെയ്തിട്ടുള്ള കമ്പനികൾ കൃത്യസമയത്ത് കൃത്യമായ സാമ്പത്തിക പ്രസ്താവനകൾ സമർപ്പിക്കുന്നുണ്ടെന്ന് അതോറിറ്റി ഉറപ്പാക്കുന്നുണ്ട്​. ഈ മാനദണ്ഡങ്ങൾ പാലിക്കുന്നതിൽ വീഴ്ച വരുത്തുന്നവർക്ക് പിഴ ചുമത്തുകയും ചെയ്യും.