തുർക്കി പ്രസിഡന്‍റ്​ ഉർദുഗാൻ യു.എ.ഇയിൽ

ദുബൈ: തുർക്കി പ്രസിഡന്‍റ് റജബ്​ ത്വയ്യിബ്​​ ഉർദുഗാൻ രണ്ട്​ ദിവസത്തെ സന്ദർശനത്തിന്​ യു.എ.ഇയിലെത്തി. ഒരു പതിറ്റാണ്ടിനിടെ ആദ്യമായാണ്​ ഉർദുഖാൻ ഔദ്യോഗികമായി യു.എ.ഇ സന്ദർശിക്കുന്നത്​. അബൂദബി കിരീടാവകാശിയും യു.എ.ഇ സായുധ സേനയുടെ ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നെഹ്​യാനുമായി കൂടിക്കാഴ്ച നടത്തി. ഉപപ്രധാനമന്ത്രിയും പ്രസിഡൻഷ്യൽകാര്യ മന്ത്രിയുമായ ശൈഖ്​ മൻസൂർ ബിൻ സായിദും ഒപ്പമുണ്ടായിരുന്നു.

ചൊവ്വാഴ്ച ഉർദുഗാനും ഭാര്യ എമൈനും ദുബൈ എക്സ്​പോയിലെ തുർക്കി പവലിയൻ സന്ദർശിച്ചേക്കും. എക്സ്​പോയിൽ നടക്കുന്ന തുർക്കിയുടെ ദേശീയ ദിനാഘോഷത്തിലും പ​ങ്കെടുക്കും. ഇരുരാജ്യങ്ങളും തമ്മിലുള്ള ബന്ധം ദൃഡമാക്കാൻ സന്ദർശനം ഉപകരിക്കുമെന്നാണ്​ പ്രതീക്ഷ. മിഡ്​ൽ ഈസ്റ്റിലെ പ്രശ്നങ്ങളും പ്രതിസന്ധികളും പരിഹരിക്കാനും സന്ദർശനം ഗുണം ചെയ്യും. കാലാവസ്ഥ വ്യതിയാനം, ഭക്ഷ്യസുരക്ഷ, ഊർജം, ജലം, ആരോഗ്യം, കൃഷി, ലോജിസ്റ്റിക്സ്​, അടിസ്ഥാന സൗകര്യ വികസനം, ടൂറസിം തുടങ്ങിയ മേഖലകളിൽ കരാറുകൾ ഒപ്പുവെച്ചേക്കും.

നയതന്ത്ര ബന്ധത്തിലെ പുതിയ അധ്യായമായിരിക്കും ഇതെന്ന്​ യു.എ.ഇ പ്രസിഡന്‍റ്​ ശൈഖ്​ ഖലീഫയുടെ ഉപദേശകൻ ഡോ. അൻവർ ഗർഗാഷ്​ പറഞ്ഞു. കഴിഞ്ഞ മാസങ്ങളിലായി ടർക്കിഷ്​ കമ്പനികൾ യു.എ.ഇയിൽ കൂടുതലായി ചുവടുറപ്പിച്ചിരുന്നു. വ്യാപാര ബന്ധം മെച്ചപ്പെടുത്തുന്നതോടെ കൂടുതൽ ടർക്കിഷ്​ സ്ഥാപനങ്ങൾ ഇവിടേക്ക്​ എത്തുമെന്നാണ്​ പ്രതീക്ഷ. രണ്ട്​ മാസം മുൻപ്​ തുർക്കിയിലെ അങ്കാറയിലെത്തി ഉർദുഗാനുമായി ശൈഖ്​ മുഹമ്മദ്​ ബിൻ സായിദ്​ കൂടികാഴ്ച നടത്തിയിരുന്നു. തുർക്കിയിൽ പത്ത്​ ബില്യൺ ഡോളറിന്‍റെ നിക്ഷേപം അന്ന്​ പ്രഖ്യാപിച്ചിരുന്നു.