ദുബൈയിൽ തടിക്കപ്പൽ വഴി ചരക്ക്​ നീക്കം വർധിച്ചു

ദുബൈ: ലോകത്തിന്‍റെ വിവിധ ഭാഗങ്ങളിൽ നിന്ന്​ ദുബൈയിലേക്ക്​ സമുദ്ര മാർഗം തടിക്കപ്പലിൽ ചര​ക്കെത്തിക്കുന്നത്​ വർധിച്ചു. ഈ വർഷം ആദ്യ മൂന്നുമാസങ്ങളിൽ മാത്രം 3,000മരക്കപ്പലുകൾ 3.9ലക്ഷം ടൺ ചരക്കുകൾ എത്തിച്ചതായി അധികൃതർ വെളിപ്പെടുത്തി. ഭക്ഷ്യ ഉൽപന്നങ്ങൾ അടക്കമുള്ള ചരക്കുകകളാണ്​ അൽ ഹംരിയ പോർട്​, ദേര വാർഫേജ, ദുബൈ ക്രീക്ക്​ എന്നിവടങ്ങളിൽ ഇതുവഴി എത്തിച്ചിട്ടുള്ളത്​. എമിറേറ്റിനെ സമുദ്രവ്യാപാര കേന്ദ്രമാക്കുന്നതിന്​ പോർട്​സ്​, കസ്റ്റംസ്​ ആൻഡ്​ ഫ്രീ സോൺ കോർപറേഷൻ(പി.സി.എഫ്​.സി) നടപ്പിലാക്കിയ സമഗ്ര നടപടികളാണ്​ ഈ മേഖലയുടെ വളർച്ചക്ക്​ കാരണമായത്​. റമദാനിൽ ആവശ്യത്തിന്​ ചരക്കുകൾ വിപണികളിൽ ലഭ്യമാക്കാൻ അധികൃതർ നടപടികൾ സ്വീകരിച്ചിരുന്നു.

അതോടൊപ്പം ഈദുൽ ഫിത്​ർ ആഘോഷത്തിന്​ മുന്നോടിയായി ചരക്കുകൾ എത്തിക്കുന്നതിനുള്ള മുന്നൊരുക്കങ്ങൾ പൂർത്തിയായിട്ടുണ്ട്​. ദുബൈ സാമ്പത്തിക അജണ്ട-ഡി33യുടെ ലക്ഷ്യങ്ങളുടെ ഭാഗമായി എമിറേറ്റിലെ വ്യാപാര ഇടപാടുകൾ വർധിപ്പിക്കുന്നതിന്​ സ്വീകരിച്ച നടപടികളുടെ പ്രതിഫലനമാണ്​ വർധനവെന്ന്​ പി.സി.എഫ്​.സി സുൽത്താൻ അഹമ്മദ്​ ബിൻ സുലൈം പ്രസ്താവനയിൽ പറഞ്ഞു. വർഷാവർഷങ്ങളിൽ ദുബൈയിൽ നിന്നുള്ള ഇറക്കുമതി, കയറ്റുമതിയിൽ റെക്കോർഡ്​ മറികടക്കുന്ന വളർച്ചയാണുണ്ടാകുന്നതെന്ന്​ അദ്ദേഹം കൂട്ടിച്ചേർത്തു. ദുബൈ ക്രീക്ക്, ദേര വാർഫേജ്, അൽ ഹംരിയ തുറമുഖം എന്നിവിടങ്ങളിലേക്ക്​ തടിക്കപ്പലുകൾക്ക്​ പ്രവേശനവും പുറത്തുപോക്കും എളുപ്പമാക്കുന്നതിന്​ അധികൃതർ നടപടി സ്വീകരിച്ചിരുന്നു. ഈ വർഷം തുടക്കം മുതൽ പച്ചക്കറികൾ, പഴങ്ങൾ എന്നിവ ഉൾപ്പെടെ 140,000 മെട്രിക് ടൺ ഭക്ഷ്യവിഭവങ്ങൾ ഇവിടങ്ങളിൽ എത്തിയിട്ടുണ്ട്​. ഈ കാലയളവിൽ ഏകദേശം 220,000 കന്നുകാലികളും ആടുകളും അൽ ഹംരിയ തുറമുഖം വഴി എത്തിയിട്ടുമുണ്ട്​.

എമിറേറ്റിലെ പരമ്പരാഗത വ്യാപാര മാർഗമായ തടിക്കപ്പലുകളുടെ ഇടപാടുകൾ പൂർണ്ണമായും ഡിജിറ്റൈസ് ചെയ്യുന്നതിന്​ ‘നൗ’ എന്ന സ്മാർട്ട് ആപ്ലിക്കേഷൻ നടപ്പിലാക്കിയിരുന്നു. ഇതും വ്യാപാരം എളുപ്പമാക്കുന്നതിന്​ സഹായിച്ചിട്ടുണ്ട്​.