വിനോദ സഞ്ചാരികൾക്ക്​ വേനലിലും പ്രിയം ദുബൈ ​

ദുബൈ: ലോകത്തെ വേനൽകാല ടൂറിസ്റ്റ്​ കേന്ദ്രങ്ങളുടെ പട്ടികയിൽ ദുബൈ ഏഴാം സ്ഥാനം കരസ്ഥമാക്കി. കടുത്ത ചൂട്​ ബാധിക്കുന്ന പ്രദേശമാണെങ്കിലും ഷോപ്പിങ്​ ഹബ്ബാണെന്നതും നിരവധി ഇൻഡോർ വിനോദ സഞ്ചാര കേന്ദ്രങ്ങളുണ്ടെന്നതുമാണ്​ സഞ്ചാരികളെ ആകർഷിക്കുന്നത്​. വേനൽകാലത്ത്​ വിനോദ സഞ്ചാരത്തിനായി ഏറ്റവും കൂടുതൽ ആളുകൾ അന്വേഷിക്കുന്ന നഗരങ്ങളുടെ പട്ടിക ഫോർവാർഡ്​കീസ്​ എന്ന സ്​ഥാപനമാണ്​ കഴിഞ്ഞ ദിവസം പുറത്തുവിട്ടത്​. കഴിഞ്ഞ വർഷം പട്ടികയിൽ എട്ടാം സ്ഥാനത്തായിരുന്ന എമി​റേറ്റ്​, ഒരു സ്ഥാനം മെച്ചപ്പെടുത്തിയാണ്​ നേട്ടം കൈവരിച്ചത്​.

ബാങ്കോക്​, ന്യൂയോർക്​, ബാലി, പാരിസ്​, ലോസ്​ ആഞ്ചലസ്​, ലണ്ടൻ എന്നിവയാണ്​ ദുബൈക്ക്​ മുമ്പിൽ പട്ടികയിൽ ഇടംപിടിച്ചിട്ടുള്ളത്​. ടോക്​യോ, മാഡ്രിഡ്​, സാൻ ഫ്രാൻസിസ്​കോ എന്നിവയാണ്​ പട്ടികയിലെ മറ്റു നഗരങ്ങൾ.

കോവിഡ്​ നിയന്ത്രണങ്ങൾ നീക്കിയ ശേഷം ചൈനയിൽ നിന്ന്​ വലിയ രീതിയിൽ സന്ദർശകർ ദുബൈയിൽ എത്തിച്ചേരുന്നുണ്ടെന്നും ഇത്​ ദുബൈയുടെ മുന്നേറ്റത്തിന്​ സഹായിച്ച ഘടകമാണെന്നും അധികൃതർ വിലയിരുത്തി. ഷോപ്പിങിന്​ വിപുലമായ സൗകര്യങ്ങളുള്ള ലോകോത്തര നഗരങ്ങളിലൊന്നാണ്​ ദുബൈ. അതോടൊപ്പം വിവിധ പാർക്കുകളിലും വിനോദ കേന്ദ്രങ്ങളിലും വേനൽ പരിഗണിച്ചുള്ള സംവിധാനങ്ങൾ ഒരുക്കിയിട്ടുമുണ്ട്​.

മോഷൻ ഗേറ്റ്​ ദുബൈ, ലെഗോലാൻഡ്​ ദുബൈ, ലെഗോ ലാൻഡ്​ വാട്ടർ പാർക്ക്​ തുടങ്ങിയ ദുബൈ പാർക്സ്​ ആൻഡ്​ റിസോർട്​സിന്​ കീഴിലെ പാർക്കുകളിൽ 12വയസിന്​ താഴെ പ്രായമുള്ള കുട്ടികൾക്ക്​ ജൂലൈ 31വരെ പ്രവേശനം സൗജന്യമാണ്​.

ദുബൈയിൽ പാം ടവറിൽ നിന്ന്​ പ്രദേശം വീക്ഷിക്കുന്നതിന്​ 13വയസിൽ താഴെ പ്രായമുള്ള കുട്ടികൾക്ക്​ പ്രവേശനം സൗജന്യമായി ലഭിക്കും. അതോടൊപ്പം ബുർജ്​ ഖലീഫയിലും മുതിർന്നവർക്കൊപ്പം പ്രവേശിക്കുന്ന രണ്ട്​ കുട്ടികൾക്ക്​ സൗജന്യമുണ്ട്. ഇത്തരത്തിൽ കുടുംബങ്ങൾക്ക്​ കുറഞ്ഞ ചിലവിൽ ദുബൈയിൽ വന്നു മടങ്ങാൻ വേനലകാലത്ത്​ നിരവധി അവസരങ്ങളുണ്ട്​.