തട്ടിക്കൊണ്ട്​ പോയി പീഡനം: ദുബൈയിൽ മൂന്ന്​ പാകിസ്താനികൾക്ക്​ തടവ്​

ദുബൈ: യുവാവിനെ തട്ടിക്കൊണ്ട്​ പോയി പീഡിപ്പിച്ച​ കേസിൽ മൂന്ന്​ പാകിസ്താനികൾക്ക്​ ദുബൈ ക്രിമിനൽ കോടതി ആറ്​ മാസം തടവ്​ ശിക്ഷ വിധിച്ചു. തടവ്​ കാലാവധിക്ക്​ ശേഷം ഇവരെ നാടുകടത്തും. കടം വാങ്ങിയ 500 ദിർഹം തിരികെ നൽകാത്തതിന്‍റെ പേരിലാണ്​ ഇവർ പാകിസ്താൻ സ്വദേശിയെ തട്ടിക്കൊണ്ട്​ പോയി പീഡിപ്പിച്ചത്​.

ജനുവരിയിൽ ദുബൈ അൽ റിഗ്ഗയിലാണ്​ സംഭവം. യുവാവിനെ കെട്ടിടത്തിലേക്ക്​ കൂട്ടിക്കൊണ്ടുപോയി ഫ്ലാറ്റിൽ പൂട്ടിയിട്ട ശേഷം മർദിക്കുകയായിരുന്നു. 15 മണിക്കൂറോളം മുറിയിൽ പൂട്ടിയിട്ടു. ഫോൺ വാങ്ങി വെക്കുകയും പാകിസ്താനിലുള്ള കുടുംബാംഗങ്ങളെ ഉപദ്രവിക്കുമെന്ന്​ ഭീഷണി മുഴക്കുകയും ചെയ്തു.

ഇവർ മറ്റൊരു മുറിയിലേക്ക്​ മാറിയ സമയത്ത്​ ഫോൺ എടുക്കുകയും ദുബൈ പൊലീസിന്‍റെ ഇൻസ്റ്റഗ്രാം അക്കൗണ്ട്​ വഴി സഹായം അഭ്യർഥിക്കുകയും ചെയ്തു. തടവിൽ പാർപ്പിച്ചിരിക്കുന്ന ലൊക്കേഷനും ഫ്ലാറ്റ്​ നമ്പറും പൊലീസിന്​ അയച്ചുകൊടുത്തു. ഇതിന്​ സമീപത്ത്​ പട്രോളിങ്​ നടത്തിയിരുന്ന പൊലീസിനോട്​ ഉടൻ അവിടേക്ക്​ പോകാൻ കൺട്രോൾ റൂമിൽ നിന്ന്​ നിർദേശം നൽകി.

പൊലീസെത്തി വാതിലിൽ ​മുട്ടിയപ്പോൾ പ്രതികളിലൊരാൾ വാതിൽ തുറന്നു. ഈ സമയം മുറിക്കുള്ളിലായിരുന്ന ഇര ഒച്ചവെച്ചതോടെ പൊലീസ്​ പ്രതികളെ പിടികൂടുകയായിരുന്നു. തടവിന്​ വിധിക്കപ്പെട്ട ഇവർക്ക്​ 15 ദിവസത്തിനുള്ളിൽ അപ്പീൽ നൽകാം.