ഇന്ന് ശൈഖ്​ സായിദി​െൻറ ഓർമദിനം

ടി.എ. അബ്​ദുൽ സമദ്

അബൂദബി: ഇന്ന്​ യു.എ.ഇ രാഷ്​ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്‌യാ​െൻറ ഓർമദിനം. 2004ലെ റമദാൻ 19നാണ് അദ്ദേഹം വിടവാങ്ങിയത്. ചരമവാർഷിക ദിനമായ ശനിയാഴ്ച സായിദ് മാനുഷിക പ്രവർത്തന ദിനമായി രാജ്യം ആചരിക്കും. കോവിഡിനു മുമ്പ്​​ വിവിധ എമിറേറ്റുകളിലെ തിരഞ്ഞെടുത്ത മസ്ജിദുകളിൽ തറാവീഹ് നമസ്‌കാരാനന്തരം പ്രത്യേക സമൂഹ പ്രാർഥനയും നടത്തിയിരുന്നു.യു.എ.ഇ സാമൂഹിക വികസന മന്ത്രാലയത്തി​െൻറ ആഭിമുഖ്യത്തിൽ ഒട്ടേറെ ജീവകാരുണ്യ പ്രവർത്തനങ്ങൾ ഇതോടനുബന്ധിച്ചു നടക്കും. ശൈഖ് സായിദി​െൻറ സ്മരണയിൽ യു.എ.ഇയുടെ ജീവകാരുണ്യ നേട്ടങ്ങൾ ആഘോഷിക്കുന്നതിനുള്ള വാർഷിക അവസരമാണ് ഈ ദിനം.

ജീവകാരുണ്യത്തിന് ലോകത്തിനുതന്നെ മാതൃകയായിരുന്ന മഹാ പുരുഷനായിരുന്നു ശൈഖ് സായിദ്. ലോകരാജ്യങ്ങൾക്കും ജനങ്ങൾക്കും നൽകുന്ന സഹായങ്ങളിലൂടെ മാനുഷിക പ്രവർത്തനങ്ങളുടെ കാര്യത്തിൽ ലോകത്തിന് മാതൃക പകർന്ന ശൈഖ് സായിദി​െൻറ ഓർമ പുതുക്കുന്ന ദിനത്തിൽ യു.എ.ഇയിലെ പൊതു–സ്വകാര്യ സിവിൽ സ്ഥാപനങ്ങൾ വിവിധ ചാരിറ്റി പ്രവർത്തനങ്ങൾ ശൈഖ് സായിദി​െൻറ പേരിൽ സംഘടിപ്പിക്കുന്നു. നൂറുകണക്കിന് സർക്കാർ സാമൂഹിക പരിപാടികളിലൂടെ മാനുഷികവും ജീവകാരുണ്യവുമായ ഒട്ടേറെ സംരംഭങ്ങളും ലോകത്തി​െൻറ വിവിധ ഭാഗങ്ങളിൽ നടക്കുന്നു.കോവിഡ്​ പൊട്ടിപ്പുറപ്പെട്ടതി​െൻറ ഫലമായി ലോകം അനുഭവിക്കുന്ന അസാധാരണ സാഹചര്യങ്ങളുടെ വെളിച്ചത്തിൽ, തുടർച്ചയായ രണ്ടാം വർഷമാണ് സായിദ് ഹ്യുമാനിറ്റേറിയൻ പ്രവർത്തന ദിനം നടക്കുന്നത്. വെല്ലുവിളികളെ നേരിടാൻ കൂടുതൽ സഹകരണത്തിനും ഐക്യദാർഢ്യത്തിനും പ്രാധാന്യം നൽകിയാണ് ഈ വർഷത്തെ പ്രവർത്തനങ്ങൾ.ശൈഖ് സായിദി​െൻറ നയസമീപനങ്ങളുടെ മാതൃക പിന്തുടർന്ന്, ലോകരാജ്യങ്ങൾ അഭിമുഖീകരിക്കുന്ന കോവിഡ് പ്രതിസന്ധിയെ നേരിടാൻ സഹായിക്കുന്ന ഒട്ടേറെ പദ്ധതികൾക്ക് യു.എ.ഇ നേതൃത്വം മുൻകൈയെടുത്തു.

മനുഷ്യർക്കിടയിൽ നന്മ, സഹകരണം, ഐക്യദാർഢ്യം എന്നിവ പ്രചരിപ്പിക്കാനുള്ള ശ്രമത്തി​െൻറ ഭാഗമായി 130 രാജ്യങ്ങൾക്ക് ഏകദേശം 2000 ടൺ വൈദ്യസഹായവും കോവിഡ് പ്രതിരോധത്തിനുള്ള വ്യക്തിഗത സുരക്ഷ ഉപകരണങ്ങളും എത്തിച്ചു.