മുഖ്യമന്ത്രി അറിയാൻ

​'പ്ര​വാ​സി​ക​ൾ കേ​ര​ള​ത്തി​ന്റെ ന​​ട്ടെ​ല്ലാ​ണ്. അ​വ​രെ സം​ര​ക്ഷി​ക്കേ​ണ്ട ക​ട​മ ഈ ​സ​ർ​ക്കാ​റി​നു​ണ്ട്​' കേ​ര​ള മു​ഖ്യ​മ​ന്ത്രി പി​ണ​റാ​യി വി​ജ​യ​ൻ ഇ​ട​ക്കി​ടെ പ​റ​യാ​റു​ള്ള വാ​ക്കു​ക​ളാ​ണി​ത്. മൂ​ന്ന്​​​ വ​ർ​ഷം മു​മ്പ്​​ യു.​എ.​ഇ​യി​ലെ​ത്തി​യ​പ്പോ​ഴും മ​ഹാ​മാ​രി​ക്കാ​ല​ത്ത്​ ന​ട​ന്ന പ​ല വാ​ർ​ത്ത​സ​മ്മേ​ള​ന​ങ്ങ​ളി​ലും മു​ഖ്യ​മ​ന്ത്രി ആ​വ​ർ​ത്തി​ച്ച്​ വ്യ​ക്​​ത​മാ​ക്കി​യ​താ​ണ്​ ഈ ​നി​ല​പാ​ട്. ഈ ​വാ​ക്കു​ക​ൾ പ്ര​വാ​സി​ക​ൾ​ക്ക്​ ന​ൽ​കു​ന്ന ഊ​ർ​ജം ചെ​റു​ത​ല്ല. എ​ന്നാ​ൽ, ഈ ​വാ​ക്കു​ക​ളോ​ട്​ എ​ത്ര​ത്തോ​ളം നീ​തി​പു​ല​ർ​ത്താ​ൻ അ​ദ്ദേ​ഹ​ത്തി​നും സം​സ്​​ഥാ​ന സ​ർ​ക്കാ​റി​നും ക​ഴി​ഞ്ഞി​ട്ടു​ണ്ട്​ എ​ന്ന​ത്​ പ്ര​വാ​സി​ക​ൾ​ക്കു​ത​ന്നെ സം​ശ​യ​മു​ള്ള കാ​ര്യ​മാ​ണ്. കാ​ര​ണം, അ​വ​രു​ടെ നീ​റു​ന്ന പ്ര​ശ്​​ന​ങ്ങ​ൾ​ക്ക്​ ഇ​നി​യും പ​രി​ഹാ​രം ക​ണ്ടി​ട്ടി​ല്ല എ​ന്ന്​ മാ​ത്ര​മ​ല്ല, പു​തി​യ പ്ര​തി​സ​ന്ധി​ക​ളി​ലേ​ക്ക്​ അ​വ​ർ വീ​ണ്ടും ചു​രു​ട്ടി​യെ​റി​യ​പ്പെ​ടു​ക​യാ​ണ്. പ്ര​വാ​സി വ​കു​പ്പി​ന്റെ കൂ​ടി ചു​മ​ത​ല​യു​ള്ള കേ​ര​ള മു​ഖ്യ​മ​ന്ത്രി വീ​ണ്ടും യു.​എ.​ഇ സ​ന്ദ​ർ​ശ​ന​ത്തി​നെ​ത്തി​യ സാ​ഹ​ച​ര്യ​ത്തി​ൽ പ്ര​വാ​സി​ക​ളി​ൽ​നി​ന്ന്​ ക്രോ​ഡീ​ക​രി​ച്ച അ​വ​രു​ടെ പ്ര​ധാ​ന ആ​വ​ശ്യ​ങ്ങ​ൾ 'ഗ​ൾ​ഫ്​ മാ​ധ്യ​മം' ഇ​വി​ടെ സ​മ​ർ​പ്പി​ക്കു​ന്നു...

1. പ്രിയപ്പെട്ടവരെ അവസാന നോക്ക്​ കാണാൻ വഴിയുണ്ടാക്കണം

നാട്ടിലേക്ക്​ പോകുന്നവർ എയർ സുവിധയിൽ രജിസ്​റ്റർ ചെയ്യണമെന്ന്​ കേന്ദ്രസർക്കാറിന്റെ നിർദേശമുണ്ട്​. 72 മണിക്കൂറിനുള്ളിലെടുത്ത കോവിഡ്​ നെഗറ്റിവ്​ സർട്ടിഫിക്കറ്റും ഇതോടൊപ്പം അപ്​ലോഡ്​ ചെയ്യണം. പ്രിയപ്പെട്ടവരുടെ മരണം പോലുള്ള അടിയന്തര ആവശ്യങ്ങൾക്ക്​ നാട്ടിലെത്താൻ ആഗ്രഹിക്കുന്നവർക്ക്​ ഈ നിയമം മൂലം യാത്ര ചെയ്യാൻ കഴിയുന്നില്ല.

ചില സമയങ്ങളിൽ കോവിഡ്​ ടെസ്​റ്റ്​ ഫലം വരാൻ രണ്ട്​ ദിവസത്തിലേറെ എടുക്കുന്നുണ്ട്​. ഫലം വന്ന ശേഷം രജിസ്​റ്റർ ചെയ്​ത്​ യാത്ര ചെയ്യു​മ്പോൾ പ്രിയപ്പെട്ടവരുടെ അന്ത്യകർമങ്ങൾ പോലും കഴിഞ്ഞിട്ടുണ്ടാവും. ചികിത്സ പോലുള്ള അത്യാവശ്യങ്ങൾക്കായി നാട്ടിലേക്ക്​ പോകുന്നവരുടെ അവസ്​ഥയും ഇതാണ്​. അടിയന്തര ആവശ്യങ്ങൾക്ക്​ നാട്ടിലേക്ക്​ പോകുന്നവരെ എയർ സുവിധ രജിസ്​ട്രേഷനിൽനിന്ന്​ നേരത്തെ ഒഴിവാക്കിയിരുന്നു.

പ്രത്യേക ഫോറം അപ്​ലോഡ്​ ചെയ്​താൽ ഇവർക്ക്​ ഉടൻ യാത്രാനുമതി ലഭിക്കുമായിരുന്നു. എന്നാൽ, ഈ ആനുകൂല്യം തുടരുന്നില്ല എന്നാണ്​ എയർസുവിധയുടെ വെബ്​സൈറ്റിൽ പറയുന്നത്​.

ഇത്​ പുനഃസ്​ഥാപിക്കേണ്ടത്​ കേന്ദ്രസർക്കാറാണ്​. പ്രവാസി വിഷയത്തിൽ എന്നും മുഖംതിരിഞ്ഞുനിൽക്കുന്ന കേന്ദ്രസർക്കാറിൽ സമ്മർദംചെലുത്തി ഈ ആനുകൂല്യം പുനഃസ്​ഥാപിക്കാൻ കേരളസർക്കാറിന്റെ കൂടുതൽ ഇടപെടൽ ഉണ്ടാകണം.

2. മുഖ്യമന്ത്രി ക്വാറൻറീനിൽ ഇരിക്കു​മ്പോൾ ചിന്തിക്കാൻ

ഗൾഫിൽനിന്ന്​ മടങ്ങു​മ്പോൾ മുഖ്യമന്ത്രിയും ക്വാറൻറീനിൽ ഇരിക്കുമെന്ന്​ പ്രതീക്ഷിക്കുന്നു. ആ ദിവസങ്ങളിലെങ്കിലും അങ്ങ്​ സ്വയം ചിന്തിക്കണം 'എന്തിനാണ്​ ഞാൻ ക്വാറൻറീനിൽ ഇരിക്കുന്നതെന്ന്​'. ഉദ്​ഘാടനങ്ങളുടെയും ആഘോഷങ്ങളുടെയും പേരിൽ നാട്ടിലെല്ലായിടത്തും കൂടിച്ചേരലുകൾ നടക്കു​മ്പോഴായിരിക്കും മുഖ്യമന്ത്രി വീടിനുള്ളിൽ ക്വാറൻറീനിലിരിക്കുക. ഏഴ്​ ദിവസം കഴിഞ്ഞാൽ മുഖ്യമന്ത്രിയും വിവിധ പരിപാടികളിലേക്കിറങ്ങും. എന്തിനാണ്​ വിദേശത്തുനിന്നെത്തുന്നവരെ മാത്രം ഇങ്ങനെ കൂട്ടിലടച്ചിടുന്നത്​.

അങ്ങ്​ ദുബൈയിൽനിന്ന്​ പോകു​മ്പോൾ 72 മണിക്കൂറിനുള്ളിലെടുത്ത പി.സി.ആർ നെഗറ്റിവ്​ ഫലവുമായിട്ടായിരിക്കും യാത്ര ചെയ്യുക. കേരളത്തിലെത്തി എയർപോർട്ടിലും ടെസ്​റ്റ്​ ചെയ്യേണ്ടിവന്നേക്കാം.

രണ്ട്​ നെഗറ്റിവ്​ ഫലവുമായെത്തുന്ന മുഖ്യമന്ത്രി ക്വാറൻറീനിൽ ഇരിക്കു​മ്പോൾ ഒരു​ ടെസ്​റ്റും നടത്താതെ പുറത്തുള്ളവർ ഒത്തുചേരൽ നടത്തുന്നു. ഈ വിരോധാഭാസമാണ്​ പ്രവാസികൾ ചോദ്യം ചെയ്യുന്നത്​. ടെസ്​റ്റ്​ ചെയ്​ത്​ പോസിറ്റിവാകുന്നവർക്ക്​ ക്വാറൻറീനും നെഗറ്റിവാകുന്നവർക്ക്​ പുറത്തിറങ്ങാനും അവസരം കൊടുക്കുന്നതല്ലേ ഉചിതം. ഈ മാതൃക താങ്കൾ ദുബൈ വിമാനത്താവളത്തിൽ കണ്ടിട്ടുണ്ടാകും എന്ന്​ പ്രതീക്ഷിക്കുന്നു.

3. റാപിഡ്​ പി.സി.ആർ കൊള്ളക്ക്​ ആര്​ മണികെട്ടും

ഇന്ത്യയിൽനിന്ന്​ യു.എ.ഇയിലെ വിമാനത്താവളങ്ങളിലേക്ക്​ യാത്ര ചെയ്യുന്നവർ യാത്രക്ക്​ നാല്​ മണിക്കൂറിനുള്ളിലെടുത്ത റാപിഡ്​ പി.സി.ആർ ഫലം ഹാജരാക്കണം. കേരളത്തിലെ വിമാനത്താവളങ്ങളിൽ ഇതിനുള്ള സൗകര്യമുണ്ടെങ്കിലും കൊള്ളനിരക്കാണ്​ ഈടാക്കുന്നത്​. എയർപോർട്ട്​ അതോറിറ്റിയുടെ കീഴിലുള്ള കോഴിക്കോട്​ വിമാനത്താവളത്തിൽ 1500 രൂപ വാങ്ങു​മ്പോൾ ​കേരളത്തിലെ മറ്റ്​ വിമാനത്താവളങ്ങളിൽ 2500 രൂപയാണ്​ നിരക്ക്​. കുടുംബസമേതം വരുന്നവർക്ക്​ 10,000 രൂപയിലേറെ പരിശോധനക്ക്​ മാത്രമായി നൽകേണ്ടിവരുന്നു.

ഇതിന്​ പുറമെ, 48 മണിക്കൂറിനുള്ളിലെടുത്ത ആർ.ടി.പി.സി.ആർ ഫലവും (500 രൂപ) ഹാജരാക്കണം. 48 മണിക്കൂറിനുള്ളിലെടുത്ത നെഗറ്റിവ്​ ഫലവുമായി എയർപോർട്ടിലെത്തുന്ന പലർക്കും അവിടെ നടക്കുന്ന റാപിഡ്​ ടെസ്​റ്റിൽ പോസിറ്റിവാകുന്നു. ഇതുമൂലം ടിക്കറ്റ്​ തുകയും പരിശോധന നിരക്കുമെല്ലാം നഷ്​ടമാകുന്നു.

ഈ വിഷയത്തിൽ കേരളസർക്കാറിന്​ ചെയ്യാവുന്ന ചില കാര്യങ്ങളുണ്ട്​. റാപിഡ്​ പി.സി.ആർ നിരക്ക്​ കുറക്കാൻ സംസ്​ഥാന സർക്കാറിന്റെ ഇടപെടൽ അത്യാവശ്യമാണ്​. റാപിഡ്​ പി.സി.ആറിന്റെ വിശ്വാസ്യത ഉറപ്പാക്കാനും ഇടപെടലുണ്ടാവണം.

യു.എ.ഇയിലേക്ക്​ മാത്രമാണ്​ ഇത്തരമൊരു പരിശോധന ആവശ്യമായിവരുന്നത്​. ഇതൊഴിവാക്കാൻ യു.എ.ഇയിലെ സർക്കാർ സംവിധാനങ്ങളുമായി ചർച്ച നടത്തണം.

4. പ്രവാസി കുടുംബങ്ങളെ കൈവിടരുത്​

കോവിഡിൽ മരണപ്പെട്ടവരുടെ കണക്കെടുപ്പ്​ നടക്കുന്ന സമയമാണല്ലോ ഇത്​. കോവിഡ്​ ബാധിച്ച്​ വിദേശരാജ്യങ്ങളിൽ മരിച്ച നിരവധി പേരുണ്ട്​ നമ്മുടെ നാട്ടിൽ. കോവിഡിൽ മരിച്ചവരുടെ മൃതദേഹം നാട്ടിലെത്തിക്കുന്നതിന്​ വിലക്കുള്ളതിനാൽ അവരെ ഇവിടെയാണ്​ അടക്കംചെയ്​തിരിക്കുന്നത്​. ഒരുപക്ഷേ, കേരളസർക്കാറോ കേന്ദ്രസർക്കാറോ നിഷ്​കർഷിക്കുന്ന എല്ലാ രേഖകളും അവരുടെ കുടുംബങ്ങൾക്ക്​ ഹാജരാക്കാൻ കഴിഞ്ഞെന്നുവരില്ല.

ഈ സാഹചര്യത്തിൽ, വിദേശ രാജ്യങ്ങളിലെ സർക്കാർ നൽകുന്ന രേഖകൾ ആധികാരികമായി പരിഗണിച്ച്​ ആ കുടുംബങ്ങളെയും നഷ്​ടപരിഹാരപ്പട്ടികയിൽ ഉൾപ്പെടുത്താൻ ആവശ്യമായ നടപടികൾ സ്വീകരിക്കണം. ഉറ്റവരുടെ മൃതദേഹം പോലും അവസാനനോക്ക്​ കാണാൻ കഴിയാത്ത കുടുംബങ്ങളാണ്​ നാട്ടിലുള്ളത്​.

അവർക്ക്​ കൈത്താങ്ങാവേണ്ടത്​ നമ്മുടെ സർക്കാറാണ്​. അന്തിമപട്ടിക പുറത്തുവരു​മ്പോൾ പ്രവാസ ലോകത്തെ കോവിഡ്​ മരണങ്ങളെല്ലാം അതിൽ ഉൾപ്പെട്ടിട്ടുണ്ടെന്ന്​ ഉറപ്പാക്കേണ്ടത്​ സർക്കാറിന്റെ ഉത്തരവാദിത്തമാണ്​.

5. ഗൾഫിൽനിന്ന്​ കുറഞ്ഞനിരക്കിൽ പി.സി.ആർ ഏർപ്പാടാക്കണം

യു.എ.ഇയിൽനിന്ന്​ നാട്ടിലേക്ക്​ പോകുന്നവർ 50 ദിർഹം മുതൽ 150 ദിർഹം വരെ നൽകിയാണ്​ കോവിഡ്​ ടെസ്​റ്റ്​ നടത്തുന്നത്​. കടം വാങ്ങിയ പണവുമായി ടിക്കറ്റെടുക്കുന്നവർക്ക്​ ഇതൊരു വലിയ ഭാരമാണ്​. ഇത്​ യു.എ.ഇയിലെ പരിശോധനയാണെന്നും കേരളസർക്കാറിന്​ ഇടപെടുന്നതിൽ പരിമിതിയുണ്ടെന്നും അറിയാം. എന്നാൽ, നോർക്കയുടെ മേൽനോട്ടത്തിൽ ഏതെങ്കിലും ലാബുകളും ഏജൻസികളുമായി സഹകരിച്ച്​ കുറഞ്ഞ നിരക്കിൽ യു.എ.ഇയിൽ പി.സി.ആർ സൗകര്യം ഏർപ്പെടുത്താൻ കേരള സർക്കാറിന്​ കഴിയും. ഇത്​ പ്രവാസികൾക്ക്​ വലിയൊരു കൈത്താങ്ങായിരിക്കും.

6. പ്രവാസികൾക്ക്​ സർക്കാർ ജോലി വേണ്ടേ ?

നാടിനും വീട്ടുകാർക്കും വേണ്ടി തൊഴിലെടുക്കുന്നതിനിടയിൽ പ്രവാസികൾക്ക്​ സർക്കാർ ജോലി നിഷേധിക്കപ്പെടുന്നുണ്ട്​ എന്ന സത്യം സർക്കാർ മനസ്സിലാക്കണം. പരീക്ഷ എഴുതാൻ നാട്ടിൽ പോകാൻ കഴിയാത്തതിനാൽ കഴിവുള്ളവർക്ക്​ പോലും സർക്കാർ ജോലി നഷ്​ടപ്പെടുന്നു. ഗൾഫിൽ പി.എസ്​.സി പരീക്ഷ കേന്ദ്രങ്ങൾ അനുവദിക്കുന്നതാണ്​ ഇതിനുള്ള പരിഹാര മാർഗം. എസ്​.എസ്​.എൽ.സി, ഹയർസെക്കൻഡറി, നീറ്റ്​ പോലുള്ളവക്ക്​ ഗൾഫിൽ പരീക്ഷാകേന്ദ്രം ഉള്ളപ്പോൾ എന്തുകൊണ്ട്​ പി.എസ്​.സിക്കും ഈ വഴി ചിന്തിച്ചുകൂട. ജോലിയിൽനിന്ന്​ ലീവ്​ കിട്ടാത്തതിനാൽ നാട്ടിലെത്തി പരീക്ഷയെഴുതാൻ കഴിയാതെ നിരാശരായി കഴിയുന്ന നിരവധി പ്രവാസികൾ ഈ നാട്ടിലുണ്ട്​. അവരുടെ കഴിവുകൾ നമ്മുടെ നാടിനായി ഉപയോഗിക്കുകയല്ലേ യഥാർഥത്തിൽ ചെയ്യേണ്ടത്​. കേരളത്തിലെ സർക്കാർ സംബന്ധമായ കാര്യങ്ങൾക്ക്​ അക്ഷയ സ‍െൻറർ പോലെ ഗൾഫിലും സ‍െൻററുകൾ അനുവദിക്കുന്നതും ആലോചിക്കേണ്ടതാണ്​. നോർക്ക വഴി ഇത്​ നടപ്പാക്കാവുന്നതേയുള്ളൂ.

7. വ്യാജ റിക്രൂട്ട്​മ‍െൻറിന്​ കൂച്ചുവിലങ്ങിടണം

ജോലിതട്ടിപ്പിൽ കുടുങ്ങി ആത്​മഹത്യയിലേക്ക്​ പോലും നയിക്കപ്പെടുന്ന പ്രവാസികൾ നിരവധിയാണ്​. ഗൾഫിൽ വിമാനമിറങ്ങു​മ്പോഴാണ്​ പലരും തട്ടിപ്പിനിരയായ വിവരം അറിയുന്നത്​. കേരളത്തിൽ പ്രവർത്തിക്കുന്ന ഏജൻസികളാണ്​ പ്രധാനമായും മലയാളികളെ തട്ടിപ്പിനിരയാക്കുന്നത്​. കഴിഞ്ഞ ദിവസം വ്യാജ വിമാന ടിക്കറ്റ്​ പോലും നൽകി തട്ടിപ്പ്​ നടത്തി. യാത്രക്കായി കോഴിക്കോട്​ വിമാനത്താവളത്തിൽ എത്തിയപ്പോഴാണ്​ ടിക്കറ്റ്​ സഹിതം തട്ടിപ്പായിരുന്നു എന്നറിയുന്നത്​. സ്​ത്രീകളടക്കമുള്ളവർ ചൂഷണത്തിന്​ ഇരയാവുന്നു. ഏജൻസികൾ കേരളത്തിലായാലും അവരുടെ പ്രധാന ഓഫിസുകളും മറ്റ്​ ഇടപാടുകളും ഗൾഫ്​ രാജ്യങ്ങളിലാണെന്ന പേരിൽ കേരള പൊലീസ്​ പലപ്പോഴും ഇടപെടാറില്ല. ഈ പ്രശ്​നം പരിഹരിച്ചില്ലെങ്കിൽ തട്ടിപ്പുകാർ ഇനിയും വിഹരിച്ചുകൊണ്ടിരിക്കും. നാട്ടിലുള്ള തട്ടിപ്പുകാരെ പിടികൂടുകുയും അവരുടെ വിദേശ സഹായികളെ അവിടത്തെ അധികൃതരുമായി സഹകരിച്ച്​ പിടികൂടുകയും ചെയ്യേണ്ടത്​ അത്യാവശ്യമാണ്​.

8. പറഞ്ഞുപഴകിയ ആവശ്യങ്ങൾ

വിമാനനിരക്ക്​ കൊള്ള, പ്രവാസി പുനരധിവാസം, മരിച്ചവരുടെ മൃതദേഹം നാട്ടിലെത്തിക്കാനുള്ള ചെലവ്​ സർക്കാർ വഹിക്കുക, പ്രവാസികൾക്ക്​ മാത്രമായി മന്ത്രി, പ്രവാസി വോട്ട്​, ലോക കേരളസഭ വിപുലീകരണം, നോർക്ക ഇടപെലിന്റെ ശാക്​തീകരണം, പ്രവാസികളുടെ മക്കൾക്ക്​ ഉന്നത വിദ്യാഭ്യാസ സഹായം, നാട്ടിലെത്തുന്നവർക്ക്​ ഇൻഷുറൻസ്​ പരിരക്ഷ തുടങ്ങിയ പറഞ്ഞുപഴകിയ ആവശ്യങ്ങൾ ഇനിയും പരിഹരിക്കപ്പെട്ടിട്ടില്ല. കേരളം എന്തുചോദിച്ചാലും കൈമെയ്​മറന്ന്​ സഹായിക്കുന്ന പ്രവാസികളുടെ ആവശ്യങ്ങളോട്​ മുഖംതിരിഞ്ഞു നിൽക്കരുത്​.