യു.എ.ഇയിൽ ഫുട്​ബാളിനിടെ അടിപിടി; മൂന്ന്​ താരങ്ങൾക്ക്​ സസ്​പെൻഷനും വൻ തുക പിഴയും

ദുബൈ: അഡ്​നോക്​ ​പ്രോ ലീഗിനിടെ സ്റ്റേഡിയത്തിലും ഗ്രൗണ്ടിലുമുണ്ടായ അടിപിടിയും ബഹളവുമായി ബന്ധപ്പെട്ട്​ മൂന്ന്​ താരങ്ങൾക്ക്​ സസ്​പെൻഷനും വൻ തുക പിഴയും. മത്സരത്തിൽ പ​ങ്കെടുത്ത അൽ വ​ദ്​ഹ, അൽഐൻ ടീമുകളുടെ അടുത്ത നാല്​ മത്സരങ്ങൾ അടച്ചിട്ട വേദിയിൽ നടത്താനും യു.എ.ഇ ഫുട്​ബാൾ അസോസിയേഷൻ നിർദേശം നൽകി. അൽ വ​ദ്​ഹയും അൽഐനും തമ്മിൽ അബൂദബിയിൽ നടന്ന മത്സരത്തിലാണ്​ അടിപിടിയുണ്ടായത്​.

അൽ വദ്​ഹ ടീമിലെ രണ്ട്​ പേരെയും അൽഐനി​ലെ ഒരാളെയുമാണ്​ സസ്​പെൻഡ്​ ചെയ്തത്​. അൽ വദ്​ഹ താരം ഇസ്മായിൽ മത്താറിന്​ രണ്ട്​ മത്സരത്തിൽ നിന്ന്​ വിലക്കും രണ്ട്​ ലഷം ദിർഹം (40 ലക്ഷം രൂപ) പിഴയും വിധിച്ചു. എതിർതാരത്തിനെ ആക്രമിച്ചതിനാണ്​ നടപടി.

ഇതേ ടീമിലെ ഖമീൽ ഇസ്മയിലിന്​ രണ്ട്​ കളിയിൽ നിന്ന്​ വിലക്കും 90,000 ദിർഹം പിഴയുമിട്ടു. എതിർതാരത്തെ ആക്രമിക്കാൻ ശ്രമിച്ചു എന്നതാണ്​ കുറ്റം. സുരക്ഷ ഉദ്യോഗസ്ഥനെ ആക്രമിച്ചതിനാണ്​ അൽഐൻ താരം എറിക്​ ജുർഗൻസിനെ മൂന്ന്​ കളിയിൽ നിന്ന്​ വിലക്കിയത്​. ഒന്നര ലക്ഷം ദിർഹം പിഴയുമിട്ടു.

സ്​പോർട്​സ്​മാൻ സ്പിരിറ്റിന്​ വിരുദ്ധമായ പ്രവൃത്തിയിൽ ഏർപെട്ടതിന്​ അൽഐൻ താരങ്ങളായ സുഫിയാൻ റാഹിമി, ഖാലിദ്​ ഇസ്സ, നാസർ അൽ ഷുഖൈലി എന്നിവർക്ക്​ 25,000 ദിർഹം പിഴയും താക്കീതും നൽകി. ബഹളത്തിൽ ഏർപെട്ടതിന്​ അൽഐൻ ഫിറ്റ്​നസ്​ കോച്ചിനെ നാല്​ മത്സരങ്ങളിൽ നിന്ന്​ വിലക്കുകയും 75,000 ദിർഹം പിഴ അടക്കാൻ വിധിക്കുകയും ചെയ്തു.

കാണികളുടെ മോശം പെരുമാറ്റത്തെ തുടർന്നാണ്​ അടച്ചിട്ട വേദികളിൽ മത്സരം നടത്താൻ നിർദേശം നൽകിയത്​. അടിപിടിയുമായി ബന്ധപ്പെട്ട വീഡിയോ ​സാമൂഹിക മാധ്യമങ്ങളിൽ വ്യാപിച്ചിരുന്നു. കാണികൾ ഗ്രൗണ്ടിലിറങ്ങി ബഹളമുണ്ടാക്കുന്നതും പൊലീസ്​ പിടികൂടുന്നതു​ം വീഡിയോ ദൃശ്യങ്ങളിൽ വ്യക്​തമാണ്​.

സ്‌റ്റേഡിയത്തില്‍ അതിക്രമം കാണിച്ചവരെ അറസ്റ്റ് ചെയ്യാൻ പബ്ലിക് പ്രോസീക്യൂഷന്‍ ഉത്തരവിട്ടിരുന്നു. കാണികള്‍ കായിക മര്യാദ പുലര്‍ത്തണമെന്നും മറ്റുള്ളവരുടെ ജീവനും സുരക്ഷയും അപകടത്തില്‍ ആക്കരുതെന്നും ഉദ്യോഗസ്ഥര്‍ അഭ്യര്‍ഥിച്ചു.