യാട്ട്​ തകർന്ന്​ അപകടത്തിൽപെട്ട കുടുംബത്തെ രക്ഷപ്പെടുത്തി

ദുബൈ: പാം ജുമൈറക്ക്​ സമീപം യാട്ട്​ തകർന്ന്​ അപകടത്തി​ൽപെട്ട ഗൾഫ്​ രാജ്യക്കാരായ കുടുംബത്തെ ദുബൈ പൊലീസ്​ രക്ഷപ്പെടുത്തി. കരയിൽനിന്ന്​ അകലെ കടലിലാണ്​ അപകടം സംഭവിച്ചത്​. ഉടൻ കുടുംബം ദുബൈ പൊലീസിനെ വിവരമറിയിച്ചതിനാലാണ്​ രക്ഷപ്പെടുത്താൻ സാധിച്ചത്​. ശക്​തമായ തിരയും ഒഴുക്കും കാരണമാണ്​ യാട്ടിന്​ തകരാർ സംഭവിച്ചതെന്നാണ്​ കരുതുന്നത്​. വിവരം ലഭിച്ച ഉടൻ ശരിയായ രീതിയിൽ ഇടപെടാൻ സാധിച്ചതായി പോർട്​സ്​ ​പൊലീസ്​ സ്​റ്റേഷൻ ഡയറക്ടർ ഡോ. ഹസൻ സുഹൈൽ അൽ സുവൈദി പറഞ്ഞു. മാരിടൈം റെസ്ക്യൂ പട്രോളിങ്​ വിഭാഗമാണ്​ കുടുംബത്തെ യാട്ടിൽ നിന്ന്​ രക്ഷിച്ച്​ ബോട്ട്​ വഴി കരക്കെത്തിച്ചത്​. തകർന്ന ബോട്ട് കടലിൽനിന്ന് തുറമുഖത്തേക്ക് എത്തിക്കുകയും ചെയ്തു.

സമുദ്രയാത്രകൾ സുരക്ഷിതമാക്കാൻ ദുബൈ പൊലീസിന്റെ സ്മാർട്ട് ആപ് വഴി 'സെയിൽ സേഫ്​ലി' സേവനം പ്രയോജനപ്പെടുത്താൻ ബോട്ട്​, കപ്പൽ, യാട്ട്​ ഉടമകളോട് അധികൃതർ ആവശ്യപ്പെട്ടു. കടലിലെ യാത്രകൾ ട്രാക്ക്​ ചെയ്യാനും മുന്നറിയിപ്പുകൾ നൽകാനും പ്രതികൂലമായ ഘടകങ്ങൾ മനസ്സിലാക്കാനും സഹായിക്കുന്നതാണ്​ ആപ്​. അടിയന്തര സാഹചര്യങ്ങളിൽ പൊലീസിന്​ അറിയിപ്പ്​ നൽകാനും ഇത്​ ഉപകാരപ്പെടും. ഉപയോക്താക്കൾക്ക് സൗജന്യമായും എളുപ്പത്തിലും ലഭ്യമാകുന്ന ഇന്‍ററാക്ടിവ് മറൈൻ മാപ്പുകളും ആപ്​ വഴി ലഭിക്കും.