ലോകത്തെ ആദ്യ പറക്കുന്ന ഹൈഡ്രജൻ ബോട്ട് ദുബൈയിൽ നിർമിക്കും

ദുബൈ: ലോകത്തെ ആദ്യ ഹൈഡ്രജനിൽ പ്രവർത്തിക്കുന്ന പറക്കുന്ന ബോട്ട് ദുബൈയിൽ നിർമിക്കുന്നതിന്​ സ്വിസ്​ കമ്പനിയും യു.എ.ഇയിലെ കമ്പനിയും ധാരണപത്രത്തിൽ ഒപ്പുവെച്ചു. സ്വിസ്​ സ്റ്റാർട്ടപ്പായ 'ദ ജെറ്റ്​ സീറോ എമിഷൻ', സെനിത്ത്​ മറൈൻ സർവിസസ്​ എന്ന ദുബൈ കമ്പനിയുമായാണ്​ ധാരണയിലെത്തിയത്​. പൂർണമായും പരിസ്ഥിതി അനുകൂലമായ ഊർജത്തിൽ പ്രവർത്തിക്കുന്ന ബോട്ടാണ്​ ഇതിലൂടെ ലക്ഷ്യമിടുന്നത്​. ഭാവിവ്യവസായങ്ങളുടെ ആഗോളകേന്ദ്രമെന്ന നിലയിൽ ദുബൈ മാറുന്നതിന്‍റെ സൂചനയായാണ്​ ഈ പ്രഖ്യാപനം വിലയിരുത്തപ്പെടുന്നത്​. മികച്ച വേഗതയിൽ വെള്ളത്തിന് മുകളിലൂടെ നിശ്ശബ്ദമായി പറക്കാൻ സാധിക്കുന്നതായിരിക്കും ബോട്ട്​. എട്ടു മുതൽ 12വരെ യാത്രക്കാരെ ഒരേ സമയം കൊണ്ടുപോകാനും ഇതിൽ സാധ്യമാകും. രണ്ട് ഇന്ധന സെല്ലുകളും ഒരു എയർകണ്ടീഷനറും കാർബൺ ബഹിർഗമനം കുറക്കാൻ സഹായിക്കുന്ന മറ്റ് ക്ലീൻ-ടെക്, പരിസ്ഥിതി സൗഹൃദ സാങ്കേതികവിദ്യകളും ഇതിൽ സജ്ജീകരിക്കും. ദുബൈയിൽ നിന്ന് ഈ പ്രഖ്യാപനം നടത്താൻ കഴിഞ്ഞതിൽ ഏറെ സന്തോഷമുണ്ടെന്ന്​ ധാരണപത്രം ഒപ്പുവെച്ചശേഷം 'ദ ജെറ്റ്​ സീറോ എമിഷൻ' കമ്പനി സ്ഥാപകൻ അലൈൻ തെബോൾട്ട് പ്രതികരിച്ചു.