മണിക്കൂറുകൾ രക്ഷാപ്രവർത്തനം; കായലിൽ കുടുങ്ങിയ തിമിംഗല സ്രാവിനെ കടലിലെത്തിച്ചു

അബൂദബി: കടലിനോട്​ ചേർന്ന ചതുപ്പുകായലിൽ കുടുങ്ങിയ തിമിംഗല സ്രാവിന്​ രക്ഷയായി അബൂദബി നാഷനൽ അക്വേറിയവും പരിസ്ഥിതി ഏജൻസിയും (ഇ.എ.ഡി). തിരികെ പോകാൻ കഴിയാതെ കുടുങ്ങിയ തിമിംഗല സ്രാവിനെ കൃത്രിമ ബാഗ്​ നിർമിച്ച്​ ബോട്ടുമായി കെട്ടിയ ശേഷം കടലിലേക്കെത്തിക്കുകയായിരുന്നു. അബൂദബി മീഡിയ ഓഫിസ്​ രക്ഷാപ്രവർത്തനത്തി​െൻറ വിഡിയോ ദൃശ്യങ്ങൾ പുറത്തുവിട്ടു.

ആറ്​ മീറ്റർ നീളമുള്ള തിമിംഗല സ്രാവാണ് അബൂദബി അൽബഹിയയിൽ​ കുടുങ്ങിയത്​. കായലിലെത്തിയതോടെ തിമിംഗലത്തി​ന്​ ഭക്ഷണവും ലഭിക്കാതെ വന്നു. തിരികെ കടലിലേക്ക്​ പോകാനുള്ള ഇടനാഴിക്ക്​ രണ്ട്​ മീറ്ററാണ്​ വീതി. 20 കിലോമീറ്റർ അകലെ അറേബ്യൻ ഉൾകടലിലേക്ക്​ എത്തിക്കുക ശ്രമകരമായിരുന്നു. ഇതോടെയാണ്​ സംരക്ഷണമൊരുക്കാൻ കൃ​ത്രിമ കവചം ഉണ്ടാക്കിയത്​. സംഘാംഗങ്ങൾ ചേർന്ന്​ പിടികൂടി കവചത്തിലാക്കി ബോട്ടുമായി ബന്ധിപ്പിച്ചു.

അഞ്ചു​ മണിക്കൂർ നീണ്ട പരിശ്രമത്തിനൊടുവിലാണ്​ അറേബ്യൻ ഉൾക്കടലിലെത്തിച്ചത്​. അബൂദബി മറൈൻ ക്ലബും സഹായത്തിനുണ്ടായിരുന്നു. നിരീക്ഷണത്തിന്​ ഡിവൈസ്​ ഘടിപ്പിച്ച ശേഷമാണ്​ കടലിൽ വിട്ടത്​. ഇതുവരെ 250 കിലോമീറ്റർ സഞ്ചരിച്ചതായി അറിയാൻ കഴിഞ്ഞെന്നും അധികൃതർ വ്യക്തമാക്കി.