അർമേനിയ വഴി യു.എ.ഇയിലേക്ക്​ ​പ്രവാസികളുടെ ഒഴുക്ക്​

അബൂദബി: അവധിക്ക്​ നാട്ടിലെത്തി കുടുങ്ങിയ നിരവധി മലയാളികൾ അർമേനിയ വഴി യു.എ.ഇയിൽ തിരിച്ചെത്തുന്നു.കഴിഞ്ഞ 12ന്​ കണ്ണൂരിൽനിന്ന്​ ഡൽഹിയിലെത്തി അവിടെനിന്ന് അർമേനിയൻ തലസ്ഥാനമായ യെരേവനിലെത്തി 14 ദിവസത്തെ ക്വാറൻറീൻ പൂർത്തിയാക്കിയ ശേഷമാണ് ഷാർജ വഴി സാമൂഹിക പ്രവർത്തകനും പി.കെ.എഫ് യു.എ.ഇ ഓണിറ്റിങിലെ അഡ്മിനിസ്‌ട്രേഷൻ മാനേജറുമായ വി.ടി.വി. ദാമോദരൻ അബൂദബിയിലെത്തിയത്. നിരവധി മലയാളിയാത്രികർ ഒപ്പമുണ്ടായിരുന്നെന്ന്​ അദ്ദേഹം പറഞ്ഞു.

യാത്രക്കാർ വർധിച്ചതോടെ കൊച്ചിയിൽനിന്ന് അർമേനിയയിലേക്ക് നേരിട്ട് വിമാനം ചാർട്ട് ചെയ്തുതുടങ്ങി. കൊച്ചിയിൽനിന്ന് അർമേനിയയിലെത്തി രണ്ടാഴ്ച ഹോട്ടലിൽ ക്വാറൻറീൻ, ഭക്ഷണം, മടക്കയാത്രക്കുമുമ്പുള്ള പി.സി.ആർ പരിശോധന, ഷാർജയിലെത്തുന്നതുവരെയുള്ള വിമാനയാത്ര ചെലവ്​ ഉൾപ്പെടെ 1,25,000 രൂപയാണ് ഓരോ യാത്രക്കാരനും വേണ്ടിവരുന്നത്.

അബൂദബി സാംസ്‌കാരിക ടൂറിസം വകുപ്പി​െൻറ ഗ്രീൻ ലിസ്​റ്റിലുള്ള രാജ്യമാണ് അർമേനിയ. അർമേനിയയിൽനിന്ന് ഷാർജ വിമാനത്താവളത്തിൽ എത്തിയ ഉടൻ പി.സി.ആർ പരിശോധന നടത്തിയശേഷം നെഗറ്റിവ് ഫലം ലഭിച്ചാലും തൊട്ടടുത്ത ദിവസം മറ്റൊരു പി.സി.ആർ പരിശോധനകൂടി നടത്തി നെഗറ്റിവ് ഫലം ലഭിച്ചാൽ മാത്രമാണ് അബൂദബിക്ക്​ കടക്കാനാവുക.

അബൂദബി മുനിസിപ്പാലിറ്റിയിൽ സ്വന്തം പേരിൽ വാടക ഫ്ലാറ്റോ വില്ലയോ അല്ലെങ്കിൽ, തവ്തീഖ് രജിസ്‌ടേഷൻ നടത്തിയ ഫ്ലാറ്റ്, വില്ല എന്നിവയിലെ താമസക്കാരുടെ ലിസ്​റ്റിൽ പേര് രജിസ്​റ്റർ ചെയ്തവർക്കോ മാത്രം അബൂദബി അതിർത്തിയിൽനിന്ന് ക്വാറൻറീൻ കേന്ദ്രത്തിൽ പോകാതെ താമസ സ്ഥലത്തേക്ക് മടങ്ങാം.

ഇവരുടെ എമിറേറ്റ്‌സ് ഐഡി നമ്പറും പേരും തവ്തീഖിൽ അധികൃതരെ കാണിക്കണം. അബൂദബിയിലെത്തി നാലാം ദിവസം വീണ്ടും മറ്റൊരു പി.സി.ആർ പരിശോധന നടത്തി ​െനഗറ്റിവ് റിസൽട്ട്​ കാണിക്കണം.