രുചിയുടെ ആഗോള സംഗമത്തിന്​ നാളെ തുടക്കം

ദുബൈ: രുചിയുടെ ആഗോള സംഗമത്തിന്​​ ദുബൈ വേൾഡ്​ ട്രേഡ്​ സെൻററിൽ കലവറയൊരുങ്ങി. ലോകത്താകമാനമുള്ള രുചിഭേദങ്ങളുടെ സംഗമ വേദിയായ 'ഗൾഫുഡിന്​' ഞായറാഴ്ച തുടക്കം. ഈ മാസം 17 വരെ വേൾഡ്​ ട്രേഡ്​ സെന്‍ററിലെ 21 ഹാളുകളിലായാണ്​ മേള നടക്കുന്നത്​. 120 രാജ്യങ്ങളിലെ 4000ത്തോളം സ്ഥാപനങ്ങൾ പ്രദർശനവുമായെത്തും. 150ഓളം വിദഗ്​ധർ നയിക്കുന്ന കോൺഫറൻസുകളും നടക്കും. 50 റസ്റ്റാറൻറുകളിലെ 70 ഷെഫുമാരുടെ നേതൃത്വത്തിൽ ആയിരത്തോളം ​ആകർഷകമായ ഡിഷുകൾ അവതരിപ്പിക്കുന്നുണ്ട്​. പ്രശസ്ത ഷെഫുമാരായ അന്‍റോണിയോ ബാച്ചർ, ആന്‍റണി ദിമിത്രി, ടോം എയ്​കെൻസ്​, നിക്ക്​ ആൽവിസ്​, ഇമാറാത്തി ഷെഫ്​ ഖാലിദ്​ അൽ സാദി, ഫൈസൽ നാസർ തുടങ്ങിയവർ എത്തും. പുതിയ സ്വാദുകൾ പിറവിയെടുക്കുന്ന മേള കൂടിയാണ്​ ഗൾഫുഡ്​. കോടിക്കണക്കിന്​ രൂപയുടെ വ്യാപാര ഇടപാടുകൾക്കാണ്​ ഓരോ ഗൾഫുഡും സാക്ഷ്യം വഹിക്കുന്നത്​.

പുതിയ ഡീലുകൾ ഉണ്ടാക്കാൻ ​ആഗ്രഹിക്കുന്നവരും പുതിയ ഉൽപന്നം ലോകത്തിന്​ പരിചയപ്പെടുത്താൻ ഉദ്ദേശിക്കുന്നവരുമെല്ലാം ഗൾഫുഡിലെത്തും. അഞ്ച്​ ദിവസങ്ങളിലായി ലക്ഷം പേരെ​ങ്കിലും ഗൾഫുഡ്​ സന്ദർശിക്കുമെന്നാണ്​ പ്രതീക്ഷ. സെലിബ്രിറ്റി ഷെഫുകളും ഗൾഫുഡിനെത്തും. മത്സരങ്ങളും സമ്മാനങ്ങളും ഓഫറുകളും ലഭിക്കുന്നതിനുപുറമെ പുതിയ സ്വാദുകൾ സൗജന്യമായി രുചിച്ചറിയാനുള്ള വേദി കൂടിയാണിത്​. ഹോട്ടൽ മേഖലകളിലെ പുതിയ ​ട്രെൻഡുകൾ പരിചയപ്പെടുത്താൻ ഷെഫുമാരുണ്ടാവും. ഭക്ഷ്യ ലോകത്തെ പുതുമാനങ്ങൾ ചർച്ച ചെയ്യാൻ ശിൽപശാലകൾ അരങ്ങേറും. പ്രവേശന പാസ്​ ഗൾഫുഡിന്‍റെ വെബ്​സൈറ്റ്​ വഴി ലഭിക്കും. ബാഡ്ജുകൾ പ്രി​ന്‍റെടുത്ത ശേഷം വേണം ​എത്താൻ. എക്സിബിറ്റർമാരുമായി കൂടിക്കാഴ്ചകൾ മുൻകൂട്ടി നിശ്ചയിക്കുന്നത്​ നല്ലതായിരിക്കും. ഇതിനുള്ള സൗകര്യം വെബ്​സൈറ്റിലുണ്ട്​.