​പ്രവാസത്തിന്​ വിരാമം, ഹുസൈന്‍ മടങ്ങുന്നു

അജ്മാന്‍: നാലു പതിറ്റാണ്ടി​െൻറ പ്രവാസം മതിയാക്കി ചാവക്കാട് ഒരുമനയൂര്‍ സ്വദേശി രായംമരക്കാര്‍ വീട്ടില്‍ ഹുസൈന്‍ നാട്ടിലേക്ക് മടങ്ങുന്നു. നാട്ടില്‍ പലചരക്ക് കച്ചവടവും പിന്നീട് ബോംബെയിലുമായി കഴിയവെ 1980 മാര്‍ച്ചിലാണ് സഹോദരന്‍ കുഞ്ഞിമുഹമ്മദ് അയച്ച വിസയില്‍ ഹുസൈന്‍ അബൂദബിയില്‍ എത്തുന്നത്. അന്ന്​ പ്രായം 26. യു.എ.ഇയുടെ ആദ്യത്തെ ഇന്‍ഫര്‍മേഷന്‍, ടൂറിസം വകുപ്പ് മന്ത്രിയായിരുന്ന അബൂദബിയിലെ ശൈഖ് അഹ്​മദ് ബിൻ ഹാമിദ് അൽ ഹാമിദി​െൻറ വീട്ടു വിസയിലായിരുന്നു എത്തിയത്.

ജ്യേഷ്ഠ സഹോദരന്മാര്‍ ജോലി ചെയ്തിരുന്ന അതേ സ്ഥലത്താണ്, അന്നു മുതല്‍ ഇന്നു വരെ നാലു പതിറ്റാണ്ട് ഹുസൈന്‍ ജോലി ചെയ്തിരുന്നത്. ശൈഖ് ഹമദ് ബിന്‍ ഹാമിദി​െൻറ മരണ ശേഷം അദ്ദേഹത്തി​െൻറ മക​െൻറ കീഴിലാണ് ഇപ്പോള്‍ ജോലി. ജീവിച്ചിരുന്ന കാലത്ത് ശൈഖ് ഹമദ് ബിന്‍ ഹാമിദുമായി വളരെ അടുത്ത് ഇടപഴകാന്‍ അവസരം ലഭിച്ചിരുന്നതും അദ്ദേഹത്തി​െൻറ പെരുമാറ്റം ഇന്നും മറക്കാനാകാത്ത ഓര്‍മയായും ഹുസൈന്‍ മനസ്സില്‍ കൊണ്ടുനടക്കുന്നു. ഭാര്യയും അഞ്ചു പെൺമക്കളും അടങ്ങുന്ന കുടുംബത്തിന്​ മെച്ചപ്പെട്ട ജീവിത സൗകര്യം ഒരുക്കിയത് അബൂദബിയിലെ ജോലിയാണെന്ന് അദ്ദേഹം നന്ദിയോടെ സ്മരിക്കുന്നു.

അഞ്ചു പെൺമക്കളില്‍ നാലു പേരെയും വിവാഹം കഴിച്ചയച്ചു. ഇളയ കുട്ടിയുടെ വിവാഹം കഴിഞ്ഞ ആഗസ്​റ്റില്‍ നടത്താന്‍ തീരുമാനിച്ചെങ്കിലും കോവിഡ് പ്രതിസന്ധി മൂലം അടുത്ത വർഷത്തേക്ക്​ മാറ്റി. ജോലി ആവശ്യാര്‍ഥം അധികം പുറത്ത് പോകേണ്ടി വന്നിട്ടില്ലെങ്കിലും സ്പോൺസറുടെ കൂടെ ഒരിക്കല്‍ ജോര്‍ഡനില്‍ പോയത് ഇന്നും മറക്കാനാകില്ല.ജീവിതത്തി​െൻറ മുക്കാല്‍ പങ്കും ജീവിച്ച പ്രവാസ ലോകത്തോട് വിടപറയുന്നതില്‍ വിഷമമുണ്ട്​. എങ്കിലും ജനിച്ചുവളര്‍ന്ന ഗ്രാമത്തില്‍ ജീവിത സായാഹ്നം ചെലവഴിക്കാനുള്ള ശ്രമത്തി​െൻറ ഭാഗമായാണ് നാട്ടിലേക്കുള്ള മടക്കം.പലരെയും നേരില്‍ കണ്ട് യാത്ര ചോദിക്കാന്‍ കഴിയില്ലെന്ന വിഷമവും പേറിയാണ് ഹുസൈന്‍ നാട്ടിലേക്ക് യാത്ര തിരിക്കുന്നത്.