നൃത്ത വൈവിധ്യങ്ങളുടെ സംഗമ വേദി 'ഡാൻസിങ് എക്സ്പോ'

ബ്രസീലിലെ സാംബ, സ്​പെയിനിലെ ഫ്ലെമൻകോ, ചൈനയുടെ ഡ്രാഗൺ, യുക്രൈയിനിന്‍റെ ഹോപക്​-കീവ്​, ഇമാറാത്തികളുടെ അയ്യാല തുടങ്ങി നമ്മുടെ കേരളത്തിന്‍റെ തനത്​ കഥകളിയും ഒപ്പനയും വരെ നീളുന്ന നൃത്ത വൈവിധ്യങ്ങളുടെ സംഗമ വേദിയാണ്​ എക്സ്​പോ 2020ദുബൈ. ഓരോ ദിവസവും വിവിധ വേദികളിലായി ഹിപ്​ഹോപ്​ മുതൽ ക്ലാസിക്കൽ, ആധുനിക കലാവിഷ്കാരങ്ങളുടെ ഭാഗമായ നിരവധിയായ ഡാൻസുകളാണ്​ വ്യത്യസ്ത വേദികളിൽ അരങ്ങേറുന്നത്​.

ആംഫി തിയേറ്ററിലും ജൂബിലി പാർക്കിലും അൽ വസ്​ൽ പ്ലാസയിലും തുടങ്ങി വിവിധ രാജ്യങ്ങളുടെ പവലിയനുകളിലും ആയിരങ്ങളെ ആവേശം കൊള്ളിച്ച്​ ലോകോത്തര നർത്തകരാണ്​ പങ്കാളികളാകുന്നത്​. കുട്ടികൾക്ക്​ പ്രത്യേകമായുള്ള ഡാൻസ്​ പരിപാടികൾ, ക്ലാസിക്കൽ ഇഷ്ടപ്പെടുന്നവർക്കായി അത്തരം നൃത്തങ്ങൾ, യുവാക്കൾക്കും പാശ്​ചാത്യൻ സംഗീതത്തെ ഇഷ്ടപ്പെടുന്നവർക്കും വേണ്ടിയുള്ള ഹിപ്​ ഹോപ്പും ഡി.ജെ നൃത്ത സദസുകളും എന്നിങ്ങനെ വിവിധ ദിവസങ്ങളിലായി അരങ്ങേറിയിട്ടുണ്ട്​. വിവിധ രാജ്യങ്ങളുടെ ദേശീയദിനാഘോഷങ്ങളുടെ ഭാഗമായി അവരവരുടെ രാജ്യങ്ങളിലെ പ്രധാന നൃത്താവിഷ്കാരങ്ങൾ എല്ലാ ദിവസവും അവതരിപ്പിക്കപ്പെടുന്നുണ്ട്​. യു.എ.ഇയിലെ സദസിന്​ മുമ്പൊന്നും പരിചയപ്പെടാൻ അവസരം ലഭിക്കിച്ചിട്ടില്ലാത്ത ആഫ്രിക്കൻ രാജ്യങ്ങളിലെ പരമ്പരാഗത നൃത്തങ്ങൾ ഇത്തരത്തിൽ വേദികളിലെത്തിയിട്ടുണ്ട്​. കെടെ എന്നറിയപ്പെടുന്ന ഘാനൻ നൃത്തം, കകിലാംബെ എന്ന മാലിയിലെ നൃത്തം, കോംഗോയിലെ ക്വാസക്വാസ, സെനഗലിലെ ലംബാൻ എന്നിവ ഇക്കൂട്ടത്തിൽ എക്സ്​പോ വേദികളിലെത്തി.

യൂറോപ്പിൽ നിന്ന്​ സ്​പെയിനിലെ ഫ്ലെമൻകോ മുതൽ തുർക്കിയിലെ ബെല്ലി ഡാൻസ് വരെ വേദികളെ ഇളക്കി മറിച്ചു. ​ലാറ്റിനമേരിക്കയിലെ ഹിസ്പാനോ സാംസ്കാരിക പശ്​ചാത്തലത്തിലെ നൃത്തങ്ങൾ പലതും എക്സ്​പോ സന്ദർശകർ ഇതുവരെ പേരുപോലും കേൾക്കാത്തതായിരുന്നു. ഫിഫ ലോകകപ്പ്​ ഫുട്​ബാൾ കാലത്തും ഒളിമ്പിക്സ്​ കാലത്തും ലോക്കത്തിന്​ സുപരിചിതമായ സാംബ നൃത്തം ഒഴിച്ചു നിർത്തിയാൽ ചാചാ, ബോസ നോവ, ടാൻഗോ, സൽസ എന്നിവയെല്ലാം മിക്കവർക്കും പുത്തൻ അനുഭവം തന്നെയായിരുന്നു. ഭരതനാട്യം മുതൽ കോൽക്കളി വരെ ഇന്ത്യയിൽ നിന്നുള്ള നൃത്ത വിഭവങ്ങൾ മിക്കതും അവതരിപ്പിക്കപ്പെട്ടത്​ ഇന്ത്യൻ പവലിയനിന്​ സമീപത്തെ സ്​റ്റേജിൽ തന്നെയായിരുന്നു. ഓരോ സംസ്ഥാനങ്ങൾക്കും പ്രത്യേകം നൽകിയ വാരാചരണങ്ങളുടെ ഭാഗമായാണ്​ പലതും വേദികളിലെത്തിയത്​. വരും ദിവസങ്ങളിലും പലതും വേദിയിലെത്താൻ തയ്യാറായി നിൽക്കുന്നുമുണ്ട്​. വടക്കുകിഴക്കൻ സംസ്ഥാനങ്ങളിലെ ഗോത്രവർഗ നൃത്തങ്ങൾ, ജമ്മു കശ്മീരിലെ തനത്​ നൃത്തകലകൾ തുടങ്ങി കേരളത്തിലെ നാടോടി നൃത്തവും കോൽക്കളിയും വരെ ഇക്കൂട്ടത്തിലുണ്ട്​. ഭരതനാട്യം, മണിപ്പൂരി ഡാനസ്​, കഥക്​, കഥകളി, മോഹനിയാട്ടം, കുച്ചുപ്പുടി എന്നിങ്ങനെ ഇന്ത്യൻ നൃത്ത വിഭവങ്ങളുടെ പട്ടിക നീണ്ടതാണ്​.

ഗൾഫിന്‍റെ തനത്​ നൃത്തങ്ങൾ ഗൾഫിലെ വിവിധ രാജ്യങ്ങളിൽ നൂറ്റാണ്ടുകളായി ആഘോഷവേളകളിലും മറ്റും നടത്തപ്പെടുന്ന പരമ്പരാഗത നൃത്തങ്ങൾ എക്​സ്​പോ വേദികളിൽ ഓരോദിവസവും അവതരിപ്പിക്കുന്നുണ്ട്​. എക്സ്​പോ ഉദ്​ഘാടന ദിവസം അഥിതികളെ സ്വാഗതം ചെയ്തും തുടർന്ന്​ ഓരോ വിശേഷ സന്ദർഭങ്ങളിൽ സാന്നിധ്യമായും മേളയിൽ അറബ്​ നൃത്തങ്ങൾ കാണാത്തവർ കുറവായിരിക്കും. അൽ അയ്യാല എന്നും അൽ അയാല എന്നും അറിയപ്പെടുന്ന വടി കയ്യിൽ പിടിച്ചുള്ള ഡാൻസ്​, ദുബൈയുടെ നൃത്തം എന്നറിയപ്പെടുന്ന യോല, കല്യാണ സന്ദർഭങ്ങളിൽ അവതരിപ്പിക്കപ്പെടുന്ന ലിവ എന്നിവയെല്ലാം വേദികളിലെത്തി.