ഹോപ് ടീമിന് രാജ്യത്തിെൻറ ആദരം
text_fieldsദുബൈ: അറബ് ലോകത്തെ ആദ്യ ചൊവ്വാദൗത്യത്തിന് ചുക്കാൻ പിടിച്ചവർക്ക് രാജ്യത്തിെൻറ ആദരം. ബാബ് അൽ ഷംസിൽ നടന്ന ചടങ്ങിൽ 200ഓളം എൻജിനീയർമാരെ ആദരിച്ചു. യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം, അബൂദബി കിരീടാവകാശിയും യു.എ.ഇ സായുധസേനയുടെ ഡെപ്യൂട്ടി സുപ്രീം കമാൻഡറുമായ ശൈഖ് മുഹമ്മദ് ബിൻ സായിദ് ആൽ നഹ്യാൻ, ദുബൈ കിരീടാവകാശിയും എക്സിക്യൂട്ടിവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂം എന്നിവർ നേരിട്ടെത്തിയാണ് ആദരിക്കൽ ചടങ്ങിൽ പങ്കെടുത്തത്.
ഇവരാണ് രാജ്യത്തിെൻറ വികസനത്തിെൻറ രഹസ്യമെന്ന് ശൈഖ് മുഹമ്മദ് പറഞ്ഞു. അവർ ഒരേ സ്പിരിറ്റോടെ പ്രവർത്തിക്കുന്നതിെൻറ ഫലമായാണ് ഈ രാജ്യം ഒന്നാം സ്ഥാനത്ത് നിലനിൽക്കുന്നത്. അടുത്ത 50 വർഷത്തേക്കുള്ള യു.എ.ഇയുടെ യാത്രയിൽ നിർണായകമാണ് ഈ നേട്ടം. അടുത്ത തലമുറക്ക് ഇത് പ്രയോജനകരമാണ്. വിനയത്തിനും സ്ഥിരോത്സാഹത്തിനും പേരുകേട്ടവരാണ് നമ്മുടെ ജനത. അവരുടെ കാലടികൾ ഭൂമിയിലാണെങ്കിലും അവരുടെ അഭിലാഷങ്ങൾ ആകാശംമുട്ടെ വളരുന്നുവെന്നും അദ്ദേഹം പറഞ്ഞു.
ഹോപ് പ്രോബ് ടീം നമ്മുടെ രാജ്യത്തിെൻറ സമ്പത്താണെന്ന് ശൈഖ് മുഹമ്മദ് ബിൻ സായിദ് പറഞ്ഞു. അവർ വിശ്രമമില്ലാതെ പ്രവർത്തിച്ചതിെൻറ ഫലമാണ് നമ്മൾ ഇന്ന് കൊയ്യുന്നത്. യുവജനത നമ്മുടെ അഭിമാനമാണ്. രാജ്യത്തിെൻറ പതാക ഉയരത്തിൽ ഉയരെ പാറിപ്പറക്കാനും രാജ്യത്തിെൻറ പേര് ചരിത്രത്തിെൻറ തങ്കലിപികളിൽ കൊത്തിവെക്കാനും അവർ മുൻകൈയെടുക്കുന്നുവെന്നും അദ്ദേഹം കൂട്ടിച്ചേർത്തു.
ഐഡെക്സ് ചൊവ്വാഴ്ച ഒപ്പിട്ടത് 560 കോടി ദിർഹമിെൻറ കരാർ
അബൂദബി: അന്താരാഷ്ട്ര പ്രതിരോധ എക്സിബിഷെൻറയും (ഐഡെക്സ്) നേവൽ ഡിഫൻസ് എക്സിബിഷെൻറയും (നവ്ഡെക്സ്) മൂന്നാം ദിവസമായ ചൊവ്വാഴ്ച യു.എ.ഇ സായുധസേന പ്രാദേശിക, അന്തർദേശീയ കമ്പനികളുമായി 558 കോടി ദിർഹമിെൻറ 12 കരാറുകളിൽ ഒപ്പുവെച്ചു. രണ്ടാം ദിവസമായ തിങ്കളാഴ്ച 729.3 കോടി ദിർഹമിെൻറ 11 ഇടപാടുകളിലായിരുന്നു ഒപ്പുവെച്ചത്. ഇതുവരെ 1790 കോടി ദിർഹമിെൻറ ഇടപാടുകളാണ് മുന്നൂ ദിവസങ്ങളിലായി ഒപ്പുവെച്ചതെന്ന് ഐഡെക്സ് -നവ്ഡെക്സ് പ്രദർശനങ്ങളുടെ ഔദ്യോഗിക വക്താവ് സ്റ്റാഫ് ബ്രിഗേഡിയർ ജനറൽ മുഹമ്മദ് അൽ ഹസ്സാനി അറിയിച്ചു.
പ്രാദേശിക അന്തർദേശീയ കമ്പനികളുമായി ഇന്നലെ ആറ് കരാറുകളാണ് നടന്നത്. അബൂദബി ആസ്ഥാനമായ യാസ് ഹോൾഡിങ് ഏകദേശം 300 കോടി ദിർഹമിെൻറ കരാർ സ്വന്തമാക്കി. ചൻമൂ റോക്കറ്റ് പീരങ്കി സംവിധാനം വാങ്ങുന്നതിനായി യാസ് ഹോൾഡിങ്ങിന് 295.5 കോടി ദിർഹമിെൻറ കരാർ ലഭിച്ചു. അബൂദബി ഷിപ് ബിൽഡിങ് കമ്പനിക്ക് നാവിക കപ്പലുകളുടെയും ബോട്ടുകളുടെയും സാങ്കേതിക നടത്തിപ്പിന് 6500 ലക്ഷം ദിർഹമിെൻറ കരാർ നൽകി. സുപ്രധാന സ്ഥാപനങ്ങളുടെ സംരക്ഷണത്തിന് സാങ്കേതിക സഹായം നൽകുന്നതിന് ഇത്തിമാദ് സ്ട്രാറ്റജിക് സെക്യൂരിറ്റി സൊലൂഷൻസിന് 5560 ലക്ഷം ദിർഹമിെൻറ കരാറും നൽകി.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.