നാല്​ പതിറ്റാണ്ടി​െൻറ ​പ്രവാസം അവസാനിപ്പിച്ച്​ 'കാരണവർ' മടങ്ങി

ദുബൈ: യു.എ.ഇയിലെ 160ഓളം കുടുംബങ്ങളുടെ 'കാരണവർ' ആയിരുന്നു തലശേരി പിലാക്കൂൽ പുത്തൻപുരയിൽ ഫാറൂഖ്​. സ്വന്തത്തിലും ബന്ധത്തിലുമായി യു.എ.ഇയിലുള്ള 160ഓളം കുടുംബാംഗങ്ങൾക്ക്​ സംരക്ഷണമൊരുക്കിയതി​െൻറ ചാരിതാർഥ്യത്തിലാണ്​ ദുബൈ ഇസ്ലാമിക്‌ ബാങ്കിൽ നിന്നും അസിസ്​റ്റൻറ് മാനേജരായിരുന്ന ഫാറൂഖ്​ കഴിഞ്ഞ ദിവസം നാട്ടിലേക്ക്​ മടങ്ങിയത്​. ദുരിതം അനുഭവിക്കുന്നവർക്ക്​ സ്വാന്തനം നൽകിയും സേവന പ്രവർത്തനങ്ങളിലും സജീവമായിരുന്ന ഫാറൂഖി​െൻറ മടക്കം പ്രവാസ ലോകത്തെ കുടുംബ സുഹൃത്തുക്കൾക്ക്​ വലിയ നഷ്​ടമാണ്​. എങ്കിലും, നാട്ടിലെത്തി കൂടുതൽ സേവന പ്രവർത്തനങ്ങളിൽ സജീവമാകാനാണ്​ അദ്ദേഹത്തി​െൻറ മടക്കം.

1978 ഡിസംബർ 27നാണ്​ ​ബോംബൈയിൽ നിന്ന്​ പുറപ്പെട്ട ഫാറൂഖ്​ ദുബൈയിലെത്തിയത്​. മംഗലാപുരം സ്വദേശിയുടെ കമ്പനിയിൽ ടൈപ്പിസ്​റ്റായാണ്​ തുടക്കം. നാട്ടിൽ 1000 രൂപ കിട്ടാണമെങ്കിൽ 500 ദിർഹം കൊടുക്കേണ്ട കാലമായിരുന്നു അത്​. രണ്ട്​ വർഷത്തിന്​ ശേഷം അറബ് കോസ്​റ്റ് എന്ന ബാങ്കിൽ ജോലിക്ക് കയറി. അഞ്ച്​ വർഷം അവിടെ ജോലി ചെയ്തു. 1986ൽ ഫസ്​റ്റ് ഗൾഫ് ബാങ്കിലും രണ്ട്​ വർഷത്തിന് ശേഷം സദരത് ഇറാൻ ബാങ്കിലും ജോലി ചെയ്തു. 1988 മുതൽ ദുബായ് ഇസ്ലാമിക്‌ ബാങ്കിലായിരുന്നു. പ്രവാസ ജീവിതം അവസാനിപ്പിച്ച്​ പടിയിറങ്ങുന്നതും ഇവിടെനിന്നാണ്​. 1996 മുതൽ തലശ്ശേരി മുസ്ലിം വെൽഫെയർ അസോസിയേഷൻ എന്ന ചാരിറ്റി സംഘടനക്ക് നേതൃതം നൽകുന്നു. പാവപെട്ടവർക്ക്​ 24 വീടുകൾ പണിതു നൽകി. കമ്മിറ്റിയുടെ കീഴിൽ സൗജന്യ ഡയാലിസിസ് സെൻററും നടക്കുന്നുണ്ട്. തലശ്ശേരി ടൗണിൽ കമ്മിറ്റിയുടെ കീഴിലുള്ള ബിൽഡിങ്ങി​െൻറ പണി പുരോഗമിക്കുന്നു.

36 വർഷം തലശ്ശേരി മുൻസിപ്പൽ കൗൺസിലറും ഏഴ്​ വർഷം മുൻസിപ്പൽ ചെയർമാനുമായിരുന്ന പിതാവ്​ പി.കെ. ഉമ്മർ കുട്ടിയുടെ മാതൃക പിൻപറ്റിയാണ്​ സാമൂഹിക പ്രവർത്തനം തുടങ്ങിയത്​. മരിക്കുന്നത് വരെ തലശ്ശേരിക്കാർ അദ്ദേഹത്തെ ചെയർമാൻ ഉമ്മർകുട്ടി എന്നായിരുന്നു വിളിച്ചിരുന്നത്​. 700ഓളം വരുന്ന കുടുംബാംഗങ്ങളിൽ 160 ആളുകൾ യു.എ.ഇയിലുണ്ട്. ഇവരെയും നാട്ടിലുള്ള സാമ്പത്തികമായി ഉയർന്നു നിൽക്കുന്നവരെയും ഉൾപ്പെടുത്തി കുടുംബ കമ്മിറ്റി ഉണ്ടാക്കുകയും കടം കൊണ്ട് ബുദ്ധിമുട്ടുന്ന ആളുകളെ സഹായിക്കാനും വീട് നൽകാനും മുൻകൈയെടുത്തു.