കുട്ടി കഥകളുടെ ബെല്ല ബെല്ല ​ബെല്ലാഹേ...

ഷാർജ: ലോകത്തിലെ ഏറ്റവും പ്രായം കുറഞ്ഞ വനിത എഴുത്തുകാരി ബെല്ല ജേ ഡാർക്​ ഷാർജ വായനോത്സവത്തിൽ. അഞ്ചാം വയസിൽ പുസ്തകം പ്രസിദ്ധീകരിച്ച്​ ലോകത്തെ ഞെട്ടിച്ച ബ്രിട്ടീഷ്​ പെൺകുട്ടി ആദ്യമായാണ്​ യു.കെയുടെ പുറത്ത്​ പുസ്തകോത്സവത്തിൽ പ​ങ്കെടുക്കാനെത്തുന്നത്​. ഏറ്റവും പ്രായം കുറഞ്ഞ എഴുത്തുകാരിയെന്ന ഗിന്നസ്​ റെക്കോഡ് സ്വന്തമാക്കിയ ബെല്ല ഷാർജയിലെ കുട്ടികളുമായി അനുഭവങ്ങൾ പങ്കുവെച്ചു. പുസ്തക പരമ്പര പ്രസിദ്ധീകരിക്കുന്ന ഏറ്റവും പ്രായം കുറഞ്ഞ എഴുത്തുകാരിയെന്ന റെക്കോഡ്​ സ്വന്തമാക്കാനുള്ള ഒരുക്കത്തിലാണ്​ ബെല്ല.

ബ്രിട്ടനിലെ തീരനഗരമായ വേയ്​മൗത്തിൽ താമസിക്കുന്ന ബെല്ല ആദ്യമായാണ്​ വിമാനത്തിൽ കയറുന്നത്​. പിതാവ്​ മെയ്​ൽസിനും മാതാവ്​ ചെൽസിക്കുമൊപ്പമാണ്​ ഷാർജയിൽ എത്തിയത്​. ഒരുവർഷം മുൻപ്​ സ്വന്തം ജീവിതാനുഭവത്തിൽ നിന്ന്​ പകർത്തിയെഴുതിയ ‘ദ ലോസ്റ്റ്​ കാറ്റാ’ണ്​ അവളുടെ ആദ്യ പുസ്തകം. പൂച്ചകുഞ്ഞിനെ നഷ്ടപ്പെട്ട അമ്മപ്പൂച്ചയുടെ കഥയാണ്​ ഈ പുസ്തകത്തിൽ. ഈ കഥ രസകരമായി വിവരിക്കുന്നതിനൊപ്പം കുട്ടികൾക്കുള്ള സുരക്ഷ സന്ദേശങ്ങളും വായിച്ചെടുക്കാം. 2000ഓളം കോപ്പികൾ വിറ്റഴിഞ്ഞ ഈ പുസ്തകത്തിന്​ ശേഷം രണ്ടാം ഭാഗം പുറത്തിറക്കിയിരുന്നു. ഈ പുസ്തകത്തിന്‍റെ 1000 കോപ്പികൾ വിറ്റഴിയുന്നതോടെ പുസ്തക പരമ്പര പ്രസിദ്ധീകരിക്കുന്ന ഏറ്റവും പ്രായം കുറഞ്ഞ എഴുത്തുകാരിയെന്ന ഗിന്നസ്​ റെക്കോഡും ബെല്ലയുടെ പേരിലാവും. ഇതിനകം 600 കോപ്പികൾ വിറ്റഴിഞ്ഞു. ജൂലൈയിൽ ഏഴ്​ വയസ്​ പിന്നിടുന്നതിന്​ മുൻപ്​ അവൾ റെക്കോഡ്​ സ്വന്തമാക്കുമെന്നാണ്​ പിതാവ്​ മെയ്​ൽസ്​ ഡാർക്കിന്‍റെ പ്രതീക്ഷ.

ഉത്തർപ്രദേശ്​ ഗാസിയബാദിലെ ഏഴ്​ വയസുകാരി അഭിജിത ഗുപ്തയായിരുന്നു നേരത്തെ ഏറ്റവും പ്രായം കുറഞ്ഞ എഴുത്തുകാരി. 2021ൽ പുറത്തിറക്കിയ ‘ഹാപ്പിനസ്​ ഓൾ എറൗണ്ട്​’ എന്ന പുസ്തകമാണ്​ അഭിജിതക്ക്​ റെക്കോഡ്​ നേടിക്കൊടുത്തത്​. മൂന്ന്​ മാനദണ്ഡങ്ങൾ വിലയിരുത്തിയാണ്​ ഗിന്നസ്​ ​റെക്കോഡ്​ നൽകുന്നത്​. ഔദ്യോഗിക അംഗീകാരമുള്ള സ്ഥാപനങ്ങൾ വഴി പുസ്തകം പ്രസിദ്ധീകരിക്കണം, 1000 കോപ്പി വിറ്റഴിക്കണം, ഏഴ്​ വയസിൽ താഴെയായിരിക്കണം എന്നിവയാണ്​ നിബന്ധന. മൂന്നാമത്തെ പുസ്തകമായ സ്​നോവി ആൻഡ്​ ദ ലിലി പാഡ്​ ​ഫ്രോഗ്​ ഈ വർഷം തന്നെ പ്രസിദ്ധീകരിക്കാനൊരുങ്ങുകയാണ്​.