അധ്യാപകർക്ക്​ ആരോഗ്യ കേന്ദ്രങ്ങളിൽ ജോലിക്ക്​ അനുമതി

ദുബൈ: ആരോഗ്യരംഗത്ത് ലൈസൻസിങ്​ സംവിധാനം കൂടുതൽ സൗകര്യപ്രദമാക്കുന്നതിനായി പുതിയ ഇളവുകൾ പ്രഖ്യാപിച്ചു. മെഡിക്കൽ കോളജുകളിലും സർവകലാശാലകളിലും പ്രവർത്തിക്കുന്ന അധ്യാപകർക്ക്​ ആശുപത്രികളിലും മറ്റ് ആരോഗ്യ സ്ഥാപനങ്ങളിലും ചികിത്സാ സേവനം നൽകാൻ അനുമതി നൽകിയതാണ്​ പ്രധാന ഇളവ്​. ആവശ്യമായ യോഗ്യതയും പ്രവൃത്തി പരിചയവും മുൻ ലൈസൻസിങ്​ നിബന്ധനകളും പാലിക്കുന്നവർക്ക് മാത്രമാണ് ഈ അനുമതി ലഭിക്കുക.

അക്കാദമിക് മേഖലയും ക്ലിനിക്കൽ സേവനവും തമ്മിലുള്ള ബന്ധം ശക്തിപ്പെടുത്താനും ആരോഗ്യരംഗത്ത് സ്ഥിരമായ പഠന സംസ്കാരം വളർത്താനുമാണ് ഇതിലൂടെ ലക്ഷ്യമിടുന്നത്. ആരോഗ്യ, രോഗപ്രതിരോധ മന്ത്രാലയം ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രാലയവുമായും മാനവവിഭവശേഷി എമിററ്റൈസേഷൻ മന്ത്രാലയവുമായും സഹകരിച്ചാണ്​ ഇത്​ സംബന്ധിച്ച പ്രഖ്യാപനം നടത്തിയത്​. അതോടൊപ്പം രജിസ്റ്റേർഡ് നഴ്സുമാർ, അസിസ്റ്റന്റ് നഴ്സുമാർ, മെഡിക്കൽ ലാബ് ടെക്നീഷ്യന്മാർ, റെസ്പിറേറ്ററി കെയർ ടെക്നീഷ്യന്മാർ, ഹെൽത്ത് കെയർ അസിസ്റ്റന്റുമാർ എന്നിവരുള്‍പ്പെടെയുള്ള ചില വിഭാഗങ്ങൾക്ക്​ ലൈസൻസ് നേടുന്നതിനുള്ള ആറുമാസത്തെ പ്രവൃത്തി പരിചയ നിർബന്ധന ഒഴിവാക്കിയിട്ടുമുണ്ട്​. ഈ ഇളവ് യു.എ.ഇയിലെയും വിദേശ രാജ്യങ്ങളിലെയും ബിരുദധാരികൾക്ക് ബാധകമാണ്.

2017ലെ ഏകീകൃത മെഡിക്കൽ ലൈസൻസിങ്​ മാനദണ്ഡങ്ങൾ ഉൾപ്പെടെയുള്ളവയുടെ നിയമപരമായ അവലോകനങ്ങൾക്കുശേഷമാണ് പുതിയ മാറ്റങ്ങൾ നടപ്പിലാക്കുന്നതിന്​ തീരുമാനിച്ചത്​. ഈ നടപടികൾ ആരോഗ്യരംഗത്ത് കൂടുതൽ കഴിവുള്ള മനുഷ്യവിഭവശേഷി ഉപയോഗപ്പെടുത്താനും തൊഴിൽ അവസരങ്ങൾ വേഗത്തിൽ സൃഷ്ടിക്കാനും സഹായിക്കുമെന്ന് അധികൃതർ വ്യക്തമാക്കി. കൂടാതെ, രോഗികളുടെ സുരക്ഷയും സേവന നിലവാരവും ഉയർന്നതായിരിക്കാൻ കർശനമായ നിയന്ത്രണങ്ങൾ തുടരുമെന്നും അവർ കൂട്ടിച്ചേർത്തു.