നികുതി നടപടിക്രമ നിയമം പ്രഖ്യാപിച്ചു

ദുബൈ: നികുതി, എക്​സൈസ്​ നികുതി എന്നിവയുടെ നടപടിക്രമം സംബന്ധിച്ച ഫെഡറൽ നിയമം യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം പ്രഖ്യാപിച്ചു. എക്​സൈസ്​ നികുതി ബാധകമായ ഉൽപന്നങ്ങൾക്ക്​ ഏർപ്പെടുത്തുന്ന നികുതിനിരക്ക്​ സംബന്ധിച്ച മന്ത്രിതല ഉത്തരവി​​െൻറ പ്രഖ്യാപനവും ശൈഖ്​ മുഹമ്മദ്​ നിർവഹിച്ചു.

പുകയില, എനർജി പാനീയങ്ങൾ, കോള പാനീയങ്ങൾ തുടങ്ങി തെരഞ്ഞെടുക്കപ്പെട്ട ഉൽപന്നങ്ങൾക്ക്​ നികുതി ചുമത്തുന്ന ഫെഡറൽ എക്​സൈസ്​ നിയമം ആഗസ്​റ്റിലാണ്​ പ്രസിദ്ധീകരിച്ചത്​. പുകയില ഉൽപന്നങ്ങൾക്കും  എനർജി പാനീയങ്ങൾക്കും100 ശതമാനം, കോള പാനീയങ്ങൾക്ക്​ 50 ശതമാനം എന്നിങ്ങനെയാണ്​ നികുതി.
 ജി.സി.സിയിൽ എക്സൈസ്​ നികുതി നടപ്പാക്കുന്ന രണ്ടാമത്തെ രാജ്യമാണ്​ യു.എ.ഇ. 2017 ജൂണിൽ ഇതേ നിരക്കിൽ സൗദി അറേബ്യ എക്​സൈസ്​ നികുതി നടപ്പാക്കിയിരുന്നു. സാമൂഹിക സേവന പ്രവർത്തനങ്ങളെ നിർവചിക്കുന്ന ഉത്തരവും ശൈഖ്​ മുഹമ്മദ്​ പ്രഖ്യാപിച്ചു. ഒൗദ്യോഗിക ഗസറ്റിൽ പ്രസിദ്ധീകരിച്ച്​ ഒരു മാസത്തിന്​ ശേഷം ഉത്തരവ്​ പ്രാബല്യത്തിലാകും.