സിഗററ്റിനും കോ​ള​ക​ൾ​ക്കും നി​കു​തി

അ​ബൂ​ദ​ബി: പുകയില, ഉൗർജ പാനീയങ്ങൾ, കോള പാനീയങ്ങൾ തുടങ്ങി തെരഞ്ഞെടുക്കപ്പെട്ട ഉൽപന്നങ്ങൾക്ക്​ നികുതി ചുമത്തുന്ന ഫെഡറൽ എക്​സൈസ്​ നിയമം പ്രസിദ്ധീകരിച്ചു. പുകയില ഉൽപന്നങ്ങൾക്കും  ഉൗർജ പാനീയങ്ങൾക്കും100 ശതമാനം, കോളകൾക്ക്​ 50 ശതമാനം എന്നിങ്ങനെയാണ്​ നികുതി. ഉൽപന്നത്തി​​െൻറ 200 ശതമാനത്തിലധികമാകരുത്​ എക്​സൈസ്​ നികുതി എന്നും യു.എ.ഇ പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാൻ പുറപ്പെടുവിച്ച നിയമത്തിൽ നിർദേശമുണ്ട്​. 

ഇൗ വർഷം അവസാന പാദത്തിലാണ്​ നികുതി ഇൗടാക്കി തുടങ്ങുക. 250ഒാളം കമ്പനികളെയാണ്​ എക്​സൈസ്​ നികുതി ബാധിക്കുക. ജി.സി.സിയിൽ എക്സൈസ്​ നികുതി നടപ്പാക്കുന്ന രണ്ടാമത്തെ രാജ്യമാണ്​ യു.എ.ഇ. 2017 ജൂണിൽ ഇതേ നിരക്കിൽ സൗദി അറേബ്യ എക്​സൈസ്​ നികുതി നടപ്പാക്കിയിരുന്നു. 
എക്​സൈസ്​ നികുതി ബാധകമായ ഉൽപന്നങ്ങളുടെ ഉൽപാദനം, ഇറക്കുമതി, സംഭരണം എന്നിവക്ക്​ നിയമം ബാധകമാണ്​. ഉൽപാദന സ്​ഥലത്തുനിന്ന്​ നികുതി അടക്കാതെയാണ്​ ഉൽപന്നം വിതരണം ചെയ്​തതെങ്കിൽ നികുതി അടക്കേണ്ട ബാധ്യത വിതരണക്കാരനാണ്​. പതിവായി എക്​സൈസ്​ ഉൽപന്നങ്ങൾ ഇറക്കുമതി ചെയ്യാത്തവർക്ക്​ ഫെഡറൽ ടാക്​സ്​ അതോറിറ്റി (എഫ്​.ടി.എ) എക്​സൈസ്​ നികുതി രജിസ്​ട്രേഷനിൽ ഇളവ്​ അനുവദിക്കുമെങ്കിലും നികുതി അടവിൽ ഇളവുണ്ടാകില്ല. നികുതി രജിസ്​ട്രേഷനിൽനിന്ന്​ ഇളവ്​ ലഭിച്ചവർ നികുതിയുമായി ബന്ധപ്പെട്ട്​ അവരുടെ സാഹചര്യങ്ങളിൽ എന്തെങ്കിലും മാറ്റമുണ്ടായാൽ ഉടൻ എഫ്​.ടി.എയെ വിവരമറിയിക്കണം. രജിസ്​ട്രേഷൻ നടത്തിയ ഒരാൾക്ക്​ എക്​സൈസ്​ നികുതി അടക്കാൻ ബാധ്യത ഇല്ലാതായാൽ രജിസ്​​േ​ട്രഷൻ റദ്ദാക്കാൻ അപേക്ഷ സമർപ്പിക്കാം. നികുതി നൽകുന്ന വ്യക്​തി ഒാരോ നികുതി കാലയളവി​​െൻറ അവസാനത്തിലും എഫ്​.ടി.എക്ക്​ നികുതി റി​​േട്ടൺ സമർപ്പിക്കണം. 
നികുതി ബാധകമായ വ്യക്​തി ഉൽപാദിപ്പിക്കുന്നതോ കയറ്റുമതി ചെയ്യു​ന്നതോ സംഭരിക്കുന്നതോ ആയ എല്ലാ ഉൽപന്നത്തി​​െൻറയും രേഖകൾ സൂക്ഷിക്കേണ്ടതാണ്. കയറ്റുമതി ചെയ്യുന്ന ഉൽപന്നങ്ങളുടെ രേഖകൾക്ക്​ പുറമെ കയറ്റുമതി ​ചെയ്​തതി​​െൻറ തെളിവുകളും സൂക്ഷിക്കണം. 

നഷ്​ടപ്പെട്ടതോ നശിപ്പിച്ചതോ ആയ ഉൽപന്നങ്ങളുടെ വിശദാംശമടക്കം സംഭരണ വിവരങ്ങളും രേഖപ്പെടുത്തണം. നികുതി ഉൾപ്പെടെയുള്ള വില പ്രദർശിപ്പിക്കാതിരിക്കൽ, എക്​സൈസ്​ ഉൽപന്നങ്ങൾ ഒരു സ്​ഥലത്തുനിന്ന്​ മറ്റൊരിടത്തേക്ക്​ കൊണ്ടുപോകു​ന്നതുമായോ സൂക്ഷിക്കുന്നതുമായോ ബന്ധപ്പെട്ട നിബന്ധനകളും ചട്ടങ്ങളും പാലിക്കാതിരിക്കൽ,  ഉൽപാദിപ്പിക്കുകയോ ഇറക്കുമതി ചെയ്യുകയോ വിൽക്കുകയോ ചെയ്യുന്ന എക്​സൈസ്​ ഉൽപന്നത്തി​​െൻറ വിലവിവര പട്ടിക എഫ്​.ടി.എക്ക്​ സമർപ്പിക്കാതിരിക്കൽ എന്നിവ നിയമലംഘനമാണെന്ന്​ ഉത്തരവിൽ വ്യക്​തമാക്കുന്നു. നികുതി പൂർണ​മായോ ഭാഗികമായോ അടക്കാതെ യു.എ.ഇയിലേക്കോ രാജ്യത്തിന്​ പുറത്തേക്കോ ഉൽപന്നങ്ങൾ കൊണ്ടുപോവുകയോ അതിന്​ ശ്രമിക്കുകയോ ചെയ്യുന്നത്​ നികുതി വെട്ടിപ്പായി കണക്കാക്കും. 

നികുതി കുടിശ്ശിക ഒഴിവാക്കാമെന്ന ഉദ്ദേശ്യത്തോടെ ഉൽപാദനം നടത്തുക, കൈമാറ്റം ചെയ്യുക, സംഭരിക്കുക, കടത്തുക, കൈപ്പറ്റുക തുടങ്ങിവയും കുറ്റകൃത്യങ്ങളാണ്​. നികുതി വെട്ടിക്കുകയോ നികുതി റീഫണ്ട്​ തരപ്പെടുത്തുകയോ ചെയ്യാമെന്ന ഉദ്ദേശ്യത്തിൽ ഉൽപന്നങ്ങളിൽ തെറ്റായ ചിഹ്​നമിടുക, തെറ്റോ വ്യാജമോ ആയ രേഖകൾ സമർപ്പിക്കുക എന്നിവയും ശിക്ഷാർഹമാണ്​.