നികുതി നിയമം:  എഫ്​.ടി.എ ഇ-പഠന മൊഡ്യൂൾ പുറത്തിറക്കി

അബൂദബി: യു.എ.ഇ നികുതി നിയമം, അവയുടെ നിർവഹണം എന്നിവയുമായി ബന്ധപ്പെട്ട 50 മാർഗനിർദേശ-ഇ പഠന മൊഡ്യൂളുകൾ ഫെഡറൽ നികുതി അതോറിറ്റി (എഫ്​.ടി.എ) പുറത്തിറക്കി. അതോറിറ്റി സംഘടിപ്പിക്കുന്ന സമഗ്ര ബോധവത്​കരണ കാമ്പയി​​െൻറ ഭാഗമായാണിത്​. നികുതി നടപടികൾ നടപ്പാക്കുന്നതിൽ അതോറിറ്റി സ്വീകരിക്കുന്ന ഉയർന്ന സുതാര്യതാ മാനദണ്ഡങ്ങളും സൂക്ഷ്​മതയുമാണ്​  മാർഗനിർദേശ-ഇ പഠന മൊഡ്യൂളുകൾ പുറത്തിറക്കിയതിലൂടെ പ്രതിഫലിക്കുന്നതെന്ന്​ എഫ്​.ടി.എ ഡയറക്​ടർ ജനറൽ ഖാലിദ്​ അലി ആൽ ബുസ്​താനി പറഞ്ഞു. ഇറക്കുമതി-കയറ്റുമതി അറിയിപ്പ്​, എക്​സൈസ്​ നികുതി രജിസ്​ട്രേഷൻ, മൂല്യവർധിത നികുതി, നികുതി ഗ്രൂപ്പുകൾ, എക്​സൈസ്​ നികുതി റീഫണ്ട്​, നികുതി റി​േട്ടൺ ഫയൽ ചെയ്യൽ തുടങ്ങി നികുതിയുമായി ബന്ധപ്പെട്ട നിരവധി കാര്യങ്ങൾ പരാമർശിക്കുന്നതാണ്​ മൊഡ്യൂൾ. 

എഫ്​.ടി.എയുടെ ഒാൺലൈൻ സംവിധാനത്തിൽ വാറ്റ്​ രജിസ്​ട്രേഷൻ നടത്തിയവർക്ക്​ നികുതി റി​േട്ടൺ ഫയൽ ചെയ്യൽ പരിചയപ്പെടുത്തുന്നതിനായി അതോറിറ്റി ‘നാല്​ ഘട്ടങ്ങളിലൂടെ റി​േട്ടൺ ഫയലിങ്​’ എന്ന പേരിൽ നിലവിൽ ബോധവത്​കരണ കാമ്പയിൻ നടത്തിക്കൊണ്ടിരിക്കുന്നുണ്ട്​. ​ജനുവരി 31ന്​ ആദ്യ നികുതി കാലയളവ്​ അവസാനിച്ച ചില ബിസിനസുകളിൽ റി​േട്ടൺ സ്വീകരിച്ചുകൊണ്ടിരിക്കുകയാണ്​. ഫെബ്രുവരി 28ന്​ മുമ്പ്​ റി​േട്ടൺ ഫയൽ ചെയ്യാനാണ്​ ഇവർക്ക്​ നിർദേശം നൽകിയിട്ടുള്ളത്​.