ദുബൈയിൽ തൊഴിൽവളർച്ചയിൽ കുതിപ്പെന്ന്​ സർവേ

ദുബൈ: എമിറേറ്റിൽ തൊഴിൽവളർച്ചയിൽ ജൂലൈയിൽ കഴിഞ്ഞ മാസങ്ങളെ അപേക്ഷിച്ച്​ മികച്ച വളർച്ചയുണ്ടായതായി സർവേ.ദുബൈയിലെ എണ്ണ ഇതര സ്വകാര്യമേഖലയിൽ വൻ കുതിപ്പ്​ രേഖപ്പെടുത്തിയ സർവേ, കഴിഞ്ഞ 20 മാസത്തെ ഏറ്റവും വലിയ വളർച്ചയാണ്​ അടയാളപ്പെടുത്തിയത്​. വിനോദസഞ്ചാരം, ഹോൾസെയിൽ-റീ​ട്ടെയിൽ മേഖല, നിർമാണമേഖല എന്നിവയിലെ വളർച്ചയെ രേഖപ്പെടുത്തുന്ന ഐ.എച്ച്​.എസ്​ മാർകറ്റ്​ ദുബൈ സൂചികയിലാണ്​ തൊഴിൽ തേടുന്നവർക്ക്​ പ്രതീക്ഷ നൽകുന്ന റിപ്പോർട്ടുള്ളത്​.

ഉപഭോക്​താക്കളുടെ വർധനക്കനുസരിച്ച് സെയിൽസ്​ ടീമിൽ കൂടുതലായി ആളുകളെ ചേർക്കുകയാണ്​​ എണ്ണ ഇതര മേഖലയിലെ കമ്പനികൾ ചെയ്യുന്നത്​. അതിനാൽ ഹോൾസെയിൽ-റീ​ട്ടെയിൽ തൊഴിൽവർധനവുണ്ട്​. വിനോദസഞ്ചാര, നിർമാണ​മേഖലയിലും വലിയ വളർച്ച കാണിക്കുന്നു. ഏറ്റവും കൂടുതൽ തൊഴിൽവളർച്ച രേഖപ്പെടുത്തിയത്​ വിനോദസഞ്ചാര മേഖലയിലാണ്​.

2019 നവംബറിന്​ ശേഷം ഏറ്റവും വേഗതയിൽ തൊഴിൽ രൂപപ്പെടുന്നതാണ്​ ദുബൈയിൽ കാണുന്നത്​. കോവിഡ്​ മൂലം സാമ്പത്തിക മേഖലയിലുണ്ടായ തകർച്ചയിൽനിന്ന്​ ഘട്ടംഘട്ടമായി തിരിച്ചുവരുന്നതായാണ്​ സർവേഫലം​. അടുത്ത മാസങ്ങളിലും സമാനവളർച്ച സാധ്യതയാണുള്ളത്​.

കോവിഡ്​ നിയന്ത്രണങ്ങളിൽ ഇളവുവരുകയും ജനങ്ങളുടെ സഞ്ചാരം സാധാരണ നിലയിലാവുകയും ചെയ്​തതോടെയാണ്​ വളർച്ചയുണ്ടായത്​. കഴിഞ്ഞദിവസം കൂടുതൽ ഇളവുകൾ യു.എ.ഇ സർക്കാർ രാജ്യത്ത്​ പ്രഖ്യാപിച്ചു​.

ഇതിനൊപ്പം എക്​സ്​പോ ആരംഭിക്കുന്നതോടെ വിനോദസഞ്ചാരികളുടെ ഒഴുക്കുകൂടിയുണ്ടായാൽ ദുബൈയിൽ കൂടുതൽ തൊഴിലവസരങ്ങൾ തുറക്കപ്പെടുമെന്നാണ്​ വിലയിരുത്തപ്പെടുന്നത്​.