ഫാഷൻ റാമ്പുകളിലെ വേറിട്ട മുഖമായി​ റോഷിനി

ഫാഷൻ റാമ്പുകളിലെ വേറിട്ട മുഖമാണ്​ റോഷിനി സൂസൻ ഫിലിപ്പോസ്​. വെളുത്തവരുടെ ലോകമാണ്​ ഫാഷൻ ഷോ വേദികളെന്ന ധാരണയെ പൊളിച്ചടുക്കി ഈ​ തിരുവല്ലക്കാരി. ദുബൈയിൽ നടന്ന മിസിസ്​ യു.എ.ഇ ഇൻറർനാഷനലിലെ സൂപ്പർ വുമനായി തെരഞ്ഞെടുത്തതാണ്​ ഒടുവിലത്തെ നേട്ടം.

അബൂദബി ശൈഖ്​ ഖലീഫ മെഡിക്കൽ സിറ്റിയിൽ ​നഴ്​സായ റോഷിനി ജീവിതത്തോട്​ പടവെട്ടിയാണ്​ ഫാഷൻ വേദിയിലെത്തിയത്​. രണ്ടാനമ്മയുടെ ഉപദ്രവം സഹിക്കാതെ നാടുവിട്ടതുമുതൽ വിവാഹ മോചനവും രണ്ടാം വിവാഹവുമെല്ലാം പിന്നിട്ടാണ്​ ഫാഷൻ വേദിയിലെ താരമായി തിളങ്ങുന്നത്​. വിവാഹിതരായ വനിതകളെ അണിനിരത്തി മീന അസ്​റാണിയുടെ 'ബീയിങ്​ മുസ്​കാൻ' സംഘടിപ്പിച്ച മിസിസ്​ യു.എ.ഇയിൽ നിരവധി പ്രമുഖരെ പിന്നിലാക്കിയാണ്​ റോഷിനി സൂപ്പർ വുമനായി തെരഞ്ഞെടുക്കപ്പെട്ടത്​. ഇതോ​െടാപ്പം ഫസ്​റ്റ്​ റണ്ണർ അപ്പാകാനും കഴിഞ്ഞു.

രണ്ട്​ ദിവസത്തെ ട്രെയിനിങിന്​ ശേഷമായിരുന്നു മത്സരം. അഭിനയം, വ്യക്​തിത്വം, സൂംബ, മേക്​ അപ്​, റാംപ്​വാക്​ എന്നിവയായിരുന്നു ട്രെയിനിങിലുണ്ടായിരുന്നത്​. ദുബൈ റഡിസൺ ബ്ലൂ ഹോട്ടലിലായിരുന്നു മിസിസ്​ യു.എ.ഇ മത്സരം. പരിപാടിയുടെ രണ്ടാം സീസണി​െൻറ രജിസ്​ട്രേഷൻ ആരംഭിച്ചിട്ടുണ്ട്​. 13 വർഷമായി യു.എ.ഇയിലുള്ള റോഷിനി ഇതിന്​ മുൻപും പല വേദികളിലും കഴിവ്​ തെളിയിച്ചിട്ടുണ്ട്​.

ലോക്​ ഡൗൺ കാലത്ത്​ നടന്ന മിസിസ്​ കോവിഡ്​ 19 സുപ്രീം വാരിയർ വിമൻ ഇൻറർനാഷനൽ​, മലയാളി മങ്ക, മിസിസ്​ ഫേസ്​ ഓഫ്​ ഇന്ത്യ, കുക്കിങ്​ ഫോർ വിമൻ ഗ്രാൻഡ്​ ഫൈനലിസ്​റ്റ്​, മലബാർ അടുക്കള സൂപ്പർ ഷെഫ്​ അബൂദബി ജേതാവ്​, കേരള സോഷ്യൽ സെൻറർ പാചക റാണി... ഇങ്ങനെ നീണ്ടു പോകുന്നു റോഷിനിയുടെ നേട്ടങ്ങൾ. സ്വകാര്യ സ്​ഥാപനത്തിലെ മാർക്കറ്റിങ്​ മാനേജരായ ഭർതാവ്​ മാത്യുവിനും മകൻ നാലര വയസുകാരൻ മിലനുമൊപ്പം അബൂദബിയിലാണ്​ താമസം.

പൊരുതി നേടിയ വിജയം:

ഫാഷൻ റാമ്പിൽ മാത്രമല്ല, ജീവിതത്തിലും പോരാളിയാണ്​ റോഷ്​നി. ചെറുപ്പകാലം മുതൽ പീഡനങ്ങളേറ്റുവാങ്ങിയാണ്​ വളർന്നത്​. ഭക്ഷണം പോലും കിട്ടാത്ത അവസ്​ഥയുണ്ടായിട്ടുണ്ട്​. രണ്ടാനമ്മ വീട്ടിൽ നിന്ന്​ പുറത്താക്കിയതോടെയാണ്​ ജീവിതത്തിലേക്ക്​ വാശിയോടെ പിടിച്ചു കയറിയതെന്ന്​ റോഷ്​നി പറയുന്നു. 'എനിക്ക്​ ഒന്നും കഴിയില്ല എന്ന്​ പറഞ്ഞവർക്ക്​ മുന്നിൽ എനിക്ക്​ പലതും കഴിയും എന്ന്​ തെളിയിച്ചു.

ഭക്ഷണം തരില്ലെന്ന്​ പറഞ്ഞവർക്ക്​ മുന്നിൽ ഞാനിപ്പോൾ ഒരുപാട്​ പേർക്ക്​ ഭക്ഷണം നൽകുന്നു. പഠിപ്പിക്കില്ല എന്ന്​ പറഞ്ഞവർക്ക്​ മുന്നിൽ പഠിച്ചു വളർന്നു. ഈ വാശിയാണ്​ എ​െൻറ ജീവിതം'- റോഷ്​നിയുടെ വാക്കുകളിൽ ആത്​മവിശ്വാസം നിറയുന്നു. ജോലിയും ഭക്ഷണവും ഇല്ലാതെ വലയുന്നവർക്ക്​ ആശ്രയം കൂടിയാണ്​ റോഷ്​നി. മറ്റ്​ സംഘടനകളുമായി ചേർന്നും വ്യക്​തിപരമായും ജീവകാരുണ്യ പ്രവർത്തനങ്ങൾ നടത്തുന്നുണ്ട്​.