ശ്രീദേവിയുടെ മരണം: പഴുതടച്ച്​ ദുബൈ പൊലീസ്​;  ബോണി കപൂറി​െൻറ മൊഴിയെടുത്തു

ദുബൈ: നടി ശ്രീദേവിയുടെ മരണം വെള്ളത്തിൽ മുങ്ങിയാണെന്ന്​ വ്യക്​തമായതോടെ ദുബൈ പൊലീസ്​ സ്വീകരിച്ചത്​ കർശന നടപടികൾ. ഭർത്താവ്​ ബോണി കപൂറി​​െൻറ മൊഴി പൊലീസ്​ ചോദിച്ചറിഞ്ഞു. മരണത്തിലെ ദുരൂഹത നീക്കുന്നതിനുള്ള അന്വേഷണത്തി​​െൻറ ഭാഗമായാണ്​ മൊഴി യെടുത്തത്​​. ശനിയാഴ്​ച രാത്രി എമിറേറ്റ്​സ്​ ടവർ ഹോട്ടലിലെ 2201 നമ്പർ മുറിയിലെ കുളിമുറിയിൽ ഹ​ൃദയാഘാതം മൂലം മരിച്ചുവെന്നാണ്​ ശ്രീദേവിയുടെ വേർപാടിനെക്കുറിച്ച്​ പുറംലോകമറിഞ്ഞത്​. യു.എ.ഇയിലെ ഇന്ത്യൻ അംബാസഡർ ഉൾപ്പെടെയുള്ളവർ വിവരമറിഞ്ഞത്​ മുതൽ ജാഗരൂകരുമായി. ഒാരോ നടപടിക്രമങ്ങളും വേഗത്തിലാക്കാൻ പ്രത്യേക ഉദ്യോഗസ്​ഥനെത്തന്നെ നിയോഗിക്കുകയ​ും ചെയ്​തു. ഞായറാഴ്​ച മൃതദേഹം നാട്ടിലെത്തിക്കാനാവുമെന്നായിരുന്നു കണക്കുകൂട്ടൽ. എന്നാൽ മരണം വെള്ളത്തിൽ വീണാണെന്നും ശരീരത്തിൽ മദ്യത്തി​​െൻറ അംശം ഉണ്ടെന്നും ഫോറൻസിക്​ പരിശോധനയിൽ തെളിഞ്ഞതോടെ മരണത്തിൽ ദുരൂഹതയുണ്ടോയെന്ന അന്വേഷണത്തിലായി പൊലീസ്​. 

ദുബൈ ​പ്രോസിക്യൂഷൻ അന്വേഷണം ഏറ്റെടുത്തതോടെ മ​ൃതദേഹം വിട്ടു നൽകുന്നതും അനിശ്​ചിതത്വത്തിലായി. തിങ്കളാഴ്​ച ഉച്ചയോടെ മൃതദേഹം ബന്ധുക്കൾക്ക്​ വിട്ടു നൽകുമെന്നായിരുന്നു സൂചന. ഇക്കാര്യം യു.എ.ഇയിലെ ഇന്ത്യൻ അംബാസഡർ നവദീപ്​ സിങ്​ സൂരി മാധ്യമ പ്രവർത്തക​രെ അറിയിക്കുകയും ചെയ്​തിരുന്നു. 
എന്നാൽ അന്വേഷണം ​പ്രോസിക്യൂഷന്​ കൈമാറിയതോടെ ഇൗ സാഹചര്യത്തിൽ മാറ്റംവന്നുവെന്ന്​ എംബസി അധികൃതർ പറഞ്ഞു. അസ്വാഭാവിക മരണം സംഭവിച്ചതിനാൽ ഇതെക്കുറിച്ചുള്ള എല്ലാ വിശദാംശങ്ങളും പരിശോധിച്ച്​ തൃപ്​തിപ്പെട്ട ശേഷം പ്രോസിക്യൂഷ​​െൻറ ഒൗദ്യോഗിക ഉത്തരവോടെ മാത്രമെ ഭൗതിക ശരീരം ബന്ധുക്കൾക്ക്​ വിട്ടുകൊടുക്കാനാവൂ. 

മൃതദേഹം എത്രയും വേഗം മുംബൈയിൽ എത്തിക്കുന്നതിനുള്ള സാഹചര്യമൊരുക്കാൻ നയതന്ത്രതലത്തിൽ നീക്കം ശക്​തമാക്കിയിരുന്നു. എന്നിട്ടും എല്ലാ ഒൗദ്യോഗിക നടപടിക്രമങ്ങളും പാലിച്ചുമാ​ത്രമെ മ​ൃതദേഹം കൈമാറൂ എന്ന നിലപാടാണ്​ പൊലീസ്​ സ്വീകരിച്ചത്​. സാധാരണ മരണസർട്ടിഫിക്കറ്റും ഫോറൻസിക്​ റിപ്പോർട്ടും ബന്ധുക്കൾക്ക്​ കൈമാറിയ ശേഷം മരിച്ചയാളുടെ പാസ്​പോർട്ട്​ റദ്ദാക്കി മൃതദേഹം എംബാം ​െചയ്​താണ്​ നൽകാറ്​. ഇൗ നടപടിക്രമങ്ങൾ  ശ്രീദേവിയുടെ കാര്യത്തിലും പാലിച്ച അധികൃതർ എംബാമിങ്​ മാറ്റിവെക്കുകയും ചെയ്​തു. സാധാരണ​. രാവിലെ ഏഴ്​ മണിമുതൽ വൈകിട്ട്​ അഞ്ച്​ വരെയാണ്​ എംബാമിങ്​ നടത്താറ്​. അടിയന്തിര ഘട്ടത്തിൽ ഉന്നത നിർദേശം ലഭിച്ചാൽ മാത്രമെ ഇതിൽ മാറ്റം വരൂ. ശ്രീദേവിയുടെ കാര്യത്തിൽ ഇതുമുണ്ടായില്ല. മദ്യലഹരിയിലാണോ ഹൃദയാഘാതത്തെത്തുർന്ന്​ ബോധം നഷ്​ടമായതിനാലാണോ ശ്രീദേവി ബാത്​ടബ്ബിലെ വെള്ളത്തിൽ വീണതെന്നാണ്​ പ്രധാനമായും അന്വേഷിക്കുന്നത്​. ലോകം ശ്രദ്ധിക്കുന്ന മരണമായതിനാൽ കൊലപാതക സാധ്യതയടക്കം എല്ലാ വശങ്ങളും പരിശോധിക്കാനും പൊലീസ്​ തയാറായി. റാസൽഖൈമയിലും ദുബൈയിലും ശ്രീദേവി താമസിച്ചിരുന്ന ഹോട്ടലുകളിലടക്കം പരിശോധനയും നടന്നു.