ഏറെ സ്​നേഹിച്ച മണ്ണിൽ അന്ത്യം

ദുബൈ: ദുബൈക്ക്​ ശ്രീദേവിയെയും ശ്രീദേവിക്ക്​ ദുബൈയെയും ഏറെ ഇഷ്​ടമായിരുന്നു. പലവട്ടം ഇവിടെത്തി ആടിയും പാടിയും ജനങ്ങളെ കൈയ്യിലെടുത്തിട്ടുണ്ട്​ അവർ. ഒാരോ വരവിലും വൻ ജനക്കൂട്ടം ഹർഷാരവത്തോടെ അവരെ എതിരേൽക്കുമായിരുന്നു. ഒരുകാലത്ത്​ അയൽ വീട്ടിലെ കുട്ടിയെപ്പോലെ നെഞ്ചിലേറ്റി നടന്നിരുന്ന ശ്രീദേവിയുടെ മരണം ഞെട്ടലോടെയാണ്​ യു.എ.ഇയിലെ ഇന്ത്യൻ സമൂഹം കേട്ടത്​. ശനിയാഴ്​ച അർധരാത്രി തന്നെ വാർത്ത സാമൂഹിക മാധ്യമങ്ങൾ വഴി പടർന്നിരുന്നു. ലേബർ ക്യാമ്പുകളിൽ ഇന്ത്യയുടെ വിവിധ ഭാഗങ്ങളിലുള്ളവർക്ക്​ പുറമെ അയൽരാജ്യക്കാരായ സിനിമാ പ്രേമികളും സങ്കടത്തോടെ വാർത്ത പങ്കുവെച്ചു. എവിടെവെച്ച്​ എങ്ങനെ മരിച്ചുവെന്ന വിവരമൊക്കെ ഞായറാ​ഴ്​ച രാവിലെയാണ്​ വ്യക്​തമായത്​. റാസല്‍ഖൈമയിലെ കൂറ്റന്‍ ആഡംബര ഹോട്ടലായ, വാല്‍ഡ്രോഫ് അസ്റ്റോറിയ ഹോട്ടലില്‍ ബോളിവുഡ് നടനും ബന്ധുമായ മോഹിത് മര്‍വ-യുടെ, ബിഗ് ഫാറ്റ് വിവാഹ വിരുന്നിൽ പ​െങ്കടുക്കാനെത്തിയപ്പോഴും ചുറുചുറുക്കിന്​ ഒട്ടും കുറവില്ലായിരുന്നു. 

പ്രായത്തെ മറന്ന് നൃത്ത ചെയ്തും ഓടി നടന്നും അവസാന നിമിഷങ്ങൾ അവിസ്​മരണീയമാക്കി. 2017 ഡിസംബറില്‍, ബോളിവുഡ് പാര്‍ക്കില്‍ നടന്ന, പത്താമത് മസാല അവാര്‍ഡ് ദാന ചടങ്ങാണ്​ ദുബൈയിൽ ശ്രീദേവി അവസാനമായി പങ്കെടുത്ത ഫിലിം സ്​റ്റേജ് ഷോ. ഭര്‍ത്താവ് ബോണി കപൂറിനൊപ്പമാണ് അന്നും അവർ ദു​ൈബയിലെത്തിയത്. 

2015 ജൂണ്‍ അഞ്ചിന് ദുബൈയില്‍ നടന്ന ഏഴാമത് ഏഷ്യാവിഷന്‍ ടെലിവിഷന്‍ അവാര്‍ഡ് ദാന ചടങ്ങില്‍, ശ്രീദേവിക്ക്​ ഐക്കണ്‍ ഓഫ് ഇന്ത്യ പുരസ്‌കാരം സമ്മാനിച്ചിരുന്നു. എല്ലാവര്‍ക്കും നമസ്‌കാരം പറഞ്ഞും സുഖമാണോ എന്ന് ചോദിച്ചും ശ്രീദേവി ദുബൈയില്‍ അവസാനമായി മലയാളത്തില്‍ പ്രസംഗിച്ച പൊതു പരിപാടിയും ഇതായിരുന്നു. നടി കാജലും ഈ ചടങ്ങിലെ അതിഥിയായിരുന്നു. ശ്രീദേവി നായികയായി 1987ൽ പുറത്തിറങ്ങിയ മിസ്​റ്റര്‍ ഇന്ത്യ എന്ന സിനിമയിലെ, ഹിറ്റ് ഗാനമായ ഹവാ ഹവാ എന്ന ഗാനം മുൻനിർത്തി പ്രവാസി സമൂഹം തയാറാക്കിയ ഗാനോപഹാരത്തിനും ആദരവിനും നന്ദി പറഞ്ഞാണ് അന്ന് അവര്‍ മടങ്ങിയത്.