സമൂഹ മാധ്യമങ്ങളിലെ ബിസിനസ്​  പ്രമോഷന്​ ലൈസൻസ്​ നിർബന്ധമാക്കി

അബൂദബി: സമൂഹ മാധ്യമങ്ങളിലൂടെ ബ്രാൻഡുകളുടെയും ബിസിനസി​​​െൻറയും വൻതോതിലുള്ള പ്രമോഷന്​ ലൈസൻസ്​ നിർബന്ധമാക്കി പുതിയ നിയമം അവതരിപ്പിച്ചു. മാഗസിനുകളുടെയും പത്രങ്ങളുടെയും സമാന ലൈസൻസ്​ തന്നെയാണ്​ ഇത്തരം സംരംഭങ്ങൾക്കും എടുക്കേണ്ടത്​. മേഖലയുടെ മികവിനും നിയന്ത്രണത്തിനും വേണ്ടിയാണ്​ ലൈസൻസ്​ നിർബന്ധമാക്കിയതെന്ന്​ ​നാഷനൽ മീഡിയ കൗൺസിൽ (എൻ.എം.സി) ചൊവ്വാഴ്​ച അറിയിച്ചു. 
ഇൻസ്​റ്റഗ്രാം, ​ട്വിറ്റർ, ഫേസ്​ബുക്ക്​ പോലുള്ള സമൂഹ മാധ്യമങ്ങളിൽ പോസ്​റ്റ് ചെയ്യുന്ന ബ്രാൻഡ്​^ബിസിനസ്​ പോസ്​റ്റുകൾ വഴി നിരവധി ഫോളോവേഴ്​സുള്ള വ്യക്​തികളും സെലിബ്രിറ്റികളും വൻതോതിലുള്ള വരുമാനമാണ്​ നേടുന്നത്​. എന്നാൽ, ഇത്തരത്തിലുള്ള പ്രവർത്തനങ്ങൾ നേരത്തെ നിയമം മൂലം നിയന്ത്രിക്കപ്പെട്ടിരുന്നില്ല. 

വാർത്താ വെബ്​സൈറ്റുകൾ, ഇലക്​ട്രോണിക്​ പബ്ലിഷിങ്​ കേന്ദ്രങ്ങൾ തുടങ്ങിയവക്കും ലൈസൻസ്​ ആവശ്യമാണ്​. അതേസമയം, ലൈസൻസോടെ പ്രവർത്തിക്കുന്ന പരമ്പരാഗത മാധ്യമങ്ങളായ ടെലിവിഷൻ, റേഡിയോ, പത്രം, മാഗസിൻ എന്നിവയുടെ വെബ്​സൈറ്റുകൾക്ക്​ പുതിയ ലൈസൻസ്​ ആവശ്യമില്ല. സർക്കാർ, സർവകലാശാലകൾ, സ്​കൂളുകൾ എന്നിവയുടെ വെബ്​സൈറ്റുകളും ലൈസൻസ്​ നിബന്ധനകളിൽനിന്ന്​ ഒഴിവാണ്​.

ഫെബ്രുവരി 28ന്​ എൻ.എം.സി ഇലക്​ട്രോണിക്​സ്​ മാധ്യമങ്ങൾക്ക്​ പുതിയ നിയമസംവിധാനം അവതരിപ്പിച്ചിരുന്നു. ഇതുപ്രകാരം ഇലക്​ട്രോണിക്​ മാധ്യമങ്ങളുമായി ബന്ധപ്പെട്ട വാണിജ്യ പ്രവർത്തനങ്ങളിൽ ഏർപ്പെടുന്നവരെല്ലാം രജിസ്​റ്റർ ചെയ്യുകയും ജൂൺ അവസാനിക്കുന്നതിന്​ മുമ്പ്​ ലൈസൻസ്​ നേടുകയും വേണം. അല്ലാത്തവർക്ക്​ മുന്നറിയിപ്പ്​ നൽകുകയോ 5000 ദിർഹം വരെ പിഴ വിധിക്കുകയോ വെബ്​സൈറ്റ്​ അക്കൗണ്ട്​ അടച്ചുപൂട്ടുകയോ ചെയ്യും. യു.എ.ഇയിലെ മാധ്യമമേഖലയിൽ പുരോഗമിച്ച നിയമ^കാര്യനിർവഹണ സാഹചര്യം വികസിപ്പിക്കാനും പ്രോത്സാഹിപ്പിക്കാനുമുള്ള കൗൺസിലി​​​െൻറ പദ്ധതിയുടെ ഭാഗമായാണ്​ പുതിയ നിയമങ്ങളെന്ന്​ എൻ.എം.സി ഡയറക്​ടർ ജനറൽ മൻസൂർ ഇബ്രാഹിം ആൽ മൻസൂറി പറഞ്ഞു. ഇന്ന്​ ഇലക്​ട്രോണിക്​സ്​ മാധ്യമങ്ങൾ വൻ സ്വാധീനമുള്ളവയും വ്യാപകമായി ഉ​പയോഗിക്കപ്പെടുന്നവയുമാണ്​. വിഡിയോകൾ, ഗെയിമുകൾ, ഇ^പുസ്​തകങ്ങൾ തുടങ്ങിയ ഡിജിറ്റൽ മാധ്യമങ്ങൾ മിഡിലീസ്​റ്റിൽ അതിവേഗം വളർന്നുകൊണ്ടിരിക്കുന്ന മേഖലകളിലൊന്നാണ്​. 

ഇൗ മേഖലയിലെ ക്രമീകരണങ്ങൾ പുതിയ ആഗോള നിക്ഷേപങ്ങൾ ആകർഷിക്കാനും അതുവഴി മേഖലയുടെ വികസനവും കാര്യക്ഷമതയും വർധിക്കാനും കാരണമാകും. നിയമപരിരക്ഷ നൽകിയും കാര്യക്ഷമത വർധിപ്പിച്ചും പ്രസിദ്ധീകരണ മേഖലയിൽ ഇലക്​ട്രോണിക്​ മാധ്യമങ്ങളുടെ സംഭാവനകൾ ശാക്​തീകരിക്കുക എന്നതാണ്​ പുതിയ മാർഗനിർദേശങ്ങൾ കൊണ്ട്​ ഉ​േദ്ദശിക്കുന്നതെന്നും മൻസൂർ ഇബ്രാഹിം ആൽ മൻസൂറി കൂട്ടിച്ചേർത്തു.