ബീച്ചുകളിൽ സോക്കർ ആരവമുയരും

കാൽപന്തിന്‍റെ ആഗോള പോരാട്ടം ഉജ്വലമായി നടത്തിക്കാണിച്ച ഗൾഫിലേക്ക് ഫിഫയുടെ​ മറ്റൊരു ലോകകപ്പ്​ കൂടിയെത്തുന്നു. ഇത്തവണ ബീച്ച്​ സോക്കർ ലോകകപ്പിനാണ്​ മരുഭൂമിയിലെ മണൽതീരങ്ങൾ ആതിഥ്യം വഹിക്കുന്നത്​. നവംബർ 16 മുതൽ 26 വരെയാണ്​ ടൂർണമെന്‍റ്​. ഗ്രൂപ്പ്​ നറുക്കെടുപ്പ്​ ജൂണിൽ നടത്തും. ഇതിനുള്ള ഒരുക്കങ്ങൾ തകൃതിയായി നടക്കുന്നു. ഖത്തറിൽ നടന്ന ഫിഫ കൗൺസിൽ യോഗത്തിലാണ്​ ദുബൈയെ വേദിയായി നിശ്​ചയിച്ചത്​. 2025ലെ സോക്കർ ലോകകപ്പ്​ സീഷൽസിൽ നടത്താനും തീരുമാനിച്ചിട്ടുണ്ട്​. ആദ്യമായല്ല ദുബൈയിൽ ബീച്ച്​ സോക്കർ ലോകകപ്പ്​ നടക്കുന്നത്​. 2009ൽ ദുബൈ ആതിഥ്യം വഹിച്ചിരുന്നു. ഇത്​ വൻ വിജയമാകുകയും ചെയ്തു. ടൂർണമെന്‍റിന്‍റെ 12ാം എഡിഷനായിരിക്കും ദുബൈയിൽ നടക്കുക. ദുബൈ സ്​പോർട്​സ്​ ഹബ്ബാണെന്ന്​ വീണ്ടും തെളിയിക്കുന്നതാണ്​ ഫിഫയുടെ തീരുമാനം. ക്രിക്കറ്റ്​ ലോകകപ്പും ക്ലബ്ബ്​ ലോകകപ്പുമെല്ലാം മുൻപ്​ യു.എ.ഇയിൽ നടന്നിരുന്നു.

കഴിഞ്ഞ സോക്കർ ലോകകപ്പ്​ 2021ലാണ്​ നടന്നത്​. ലോകത്തെമ്പാടുമുള്ള​ 63 ദശലക്ഷം പേർ ഈ ടൂർണമെന്‍റ്​ കണ്ടിരുന്നു. ഓരോ മത്സരത്തിനും ശരാശരി 2.2 ദശലക്ഷം കാഴ്ചക്കാരുണ്ടായിരുന്നു. കഴിഞ്ഞ ടൂർണമെന്‍റിൽ ഓരോ മത്സരത്തിലും ശരാശരി 9.4 ഗോളുകൾ വീതം പിറന്നിരുന്നു. ഫിഫയുടെ ബീച്ച് സോക്കർ ടൂർണമെന്‍റിലെ ഏറ്റവും വലിയ ഗോൾ ശരാശരിയാണ്​ കണ്ടത്​. 2023, 25 ലോകകപ്പുകളിൽ ഇതിനേക്കാളേറെ കാഴ്ചക്കാരുണ്ടാവുമെന്നാണ്​ പ്രതീക്ഷ.

എത്ര ടീം പ​ങ്കെടുക്കുമെന്ന കാര്യത്തിൽ അന്തിമ തീരുമാനമായിട്ടില്ല. വിവിധ രാജ്യങ്ങളിൽ നിന്ന്​ യോഗ്യത നേടിയ ഫിഫയുടെ അംഗീകാരമുള്ള ടീമുകളാണ്​ പ​ങ്കെടുക്കുന്നത്​. അഞ്ച്​ തവണ കപ്പെടുത്ത ബ്രസീലാണ്​ മുമ്പൻമാർ. മൂന്ന്​ തവണ റഷ്യയും രണ്ട്​ തവണ പോർച്ചുഗലും കിരീടം നേടി. ആദ്യ ലോകകപ്പ്​ ജയിച്ച ഫ്രാൻസിന്​ പിന്നീട്​ കിരീടത്തിൽ എത്താൻ പറ്റിയില്ല. റഷ്യയാണ്​ നിലവിലെ ചാമ്പ്യൻമാർ. 2021ൽ മോസ്​കോയിൽ നടന്ന ടൂർണമെന്‍റിന്‍റെ കലാശപ്പോരിൽ ജപ്പാനെ 5-2ന്​ തോൽപിച്ചാണ്​ റഷ്യ കിരീടം നേടിയത്​.