ആരോഗ്യം കാക്കാൻ സ്​മാർട്​ ട്രാക്ക്​

ദുബൈ: പൊതുജനങ്ങളിൽ കായികാഭിനിവേശവും ശാരീരികക്ഷമതയും വർധിപ്പിക്കാൻ ദുബൈ മുൻസിപ്പാലിറ്റി അൽ ഖവാനീജിൽ സ്​ഥാപിച്ച ആദ്യ സ്​മാർട്ട്​ ട്രാക്കിന്​ വൻ പ്രതികരണം. ഇവിടെ ഒാടാനും സൈക്കിൾ ചവിട്ടാനു​മെത്തുന്നവരുടെ എണ്ണംനാൾക്കുനാൾ വർധിക്കുകയാണ്​. കായിക പരിശീലനം പൗരന്മാരുടെ നിത്യ ജീവിതത്തി​​െൻറ ഭാഗമാക്കാനുദ്ദേശിച്ചാണ്​ സ്​മർട്ട്​ ട്രാക്ക്​ ഒരുക്കിയിരിക്കുന്നത്​. ഇത്​ ഉപയോഗിക്കുന്നവരെ​ കാണു​േമ്പാൾ കൂടുതൽ പേർ ആകൃഷ്​ടരാകുമെന്നാണ്​ പ്രതീക്ഷിക്കുന്നതെന്ന്​ ദുബൈ മുൻസിപ്പാലിറ്റിയുടെ പബ്ലിക്​ പാർക്ക്​ ആൻറ്​ ഹോർട്ടികൾച്ചർ വകുപ്പ്​ ഡയറക്​ടർ. മുഹമ്മദ്​ അബ്​ദുൽറഹ്​മാൻ അൽ അവാദി പറഞ്ഞു. കാലാവസ്​ഥ, എത്ര പേർ വ്യായാമം ചെയ്യുന്നുണ്ട്, എത്ര കലോറി കുറഞ്ഞു തുടങ്ങിയ വിവരങ്ങൾ ഇവിടെ നിന്ന്​ ലഭിക്കും. 2000 പേരുടെ വിവരങ്ങൾ ഇവിടെ ശേഖരിച്ചിട്ടുണ്ടെന്ന്​ അദ്ദേഹം കൂട്ടിച്ചേർത്തു.

അടുത്തവർഷം പകുതിയോടെ  ഇത്തരം ട്രാക്കുകൾ ദുബൈയിലുടനീളമുള്ള പാർക്കുകളിൽ സ്​ഥാപിക്കും. നിലവിൽ 10 സൈക്ലിംഗ്​ ട്രാക്കുകളും 40 സ്​പോർട്​സ്​ ട്രാക്കുകളുമാണ്​ ഇവിടെയുള്ളത്​. വിവിധ പാർക്കുകളിലായി വ്യായാമത്തിനുള്ള 212 ഉപകരണങ്ങളും സ്​ഥാപിച്ചിട്ടുണ്ട്​. സ്​മാർട്​ ട്രാക്കുകളിൽ നിന്ന്​ ലഭിക്കുന്ന വിവരങ്ങളുടെ അടിസ്​ഥാനത്തിലായിരിക്കും ദുബൈ ഹെൽത്ത്​ അതോറിറ്റിയും ദുബൈ സ്​പോർട്​സ്​ കൗൺസിലും ഭാവിയിൽ കായിക മേളകൾ സംഘടിപ്പിക്കുക. ചില ട്രാക്കുകൾ വളരെക്കുറച്ച്​ പേർ മാത്രമെ ഉപയോഗിക്കുന്നുള്ളൂവെന്ന്​ തിരിച്ചറിഞ്ഞിട്ടുണ്ട്​. ഇത്തരം സ്​ഥലങ്ങളിൽ കുടുതൽ പേരെ ആകർഷിക്കുന്നതിനുള്ള പദ്ധതികൾ നടപ്പാക്കും. ബർഷ പാർക്കിലാണ്​ അടുത്ത സ്​മാർട്ട്​ മീറ്റർ സ്​ഥാപിക്കുക.