സ്​മാർട്ട്​ ദുബൈയെ കൂടുതൽ  ഭംഗിയാക്കാൻ സംയുക്​ത പദ്ധതി

ദുബൈ: കലയിലും കാഴ്​ചയിലും മികച്ചു നിൽക്കുന്ന ദുബൈയുടെ നഗരമേഖലയെ കൂടുതൽ ഭംഗി പിടിപ്പിക്കാൻ ലോകമെമ്പാടുമുള്ള കലാകാർക്ക്​ സ്വാഗതം. മൂന്നു വർഷം നീളുന്ന പദ്ധതിയിൽ ദുബൈയിലെ താമസക്കാർക്കും സന്ദർശകർക്കും അഭിമാനകരമാം വിധം പാലങ്ങൾ, തുരങ്കങ്ങൾ, നടപ്പാതകൾ, ബസ്​സ്​റ്റോപ്പുകൾ തുടങ്ങിയ ഭാഗങ്ങളെല്ലാം ഭംഗിയാക്കും.  

ദുബൈ മീഡിയാ ഒഫീസും റോഡ്​ ഗതാഗത അതോറിറ്റിയും ഇതിനായി കൈകോർക്കും. ആർ.ടി.എ പദ്ധതികളെല്ലാം സൗന്ദര്യശാസ്​ത്രത്തിനു കൂടി മുൻഗണന നൽകിയാണ്​ ക്രമീകരിക്കുന്നതെന്നും അവിരാമ ചിഹ്​ന രൂപത്തിലുള്ള ഷിന്ദഗ പാലം, ഒാവൽ ആ​കൃതിയിലുള്ള സഹിഷ്​ണുത പാലം, മെട്രോ സ്​റ്റേഷനുകൾ എന്നിവയെല്ലാം ഇതി​​​െൻറ ഉദാഹരണങ്ങളാണെന്നും   ധാരണാ പത്രം ഒപ്പുവെച്ച ശേഷം ഡയറക്​ടർ ജനറലും ചെയർമാനുമായ മത്താർ അൽ തായർ പറഞ്ഞു. 
മികച്ച കലയുടെ ആഘോഷവും ക്രിയാത്​മക സൗന്ദര്യവും ഉയർന്നു നിൽക്കുന്ന തുറന്ന മ്യൂസിയമാക്കി ദുബൈയെ മാറ്റുക എന്ന യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​​െൻറ ദർശനങ്ങൾക്കധിഷ്​ഠിതമായാണ്​ സൗന്ദര്യവത്​കരണ പദ്ധതി നടപ്പാക്കുന്നതെന്ന്​ ദുബൈ മീഡിയാ ഒാഫീസ്​ ഡയറക്​ടർ ജനറൽ മൊന അൽ മറി വ്യക്​തമാക്കി.