യു.എ.ഇ പ്രളയം: ആറ്​ പ്രവാസികൾ മരിച്ചു

ദുബൈ: യു.എ.ഇയിലെ കിഴക്കൻ പ്രദേശങ്ങളിൽ ശക്​തമായ മഴയെ തുടർന്നുണ്ടായ പ്രളയത്തിൽ ആറു മരണം. എഷ്യൻ വംശജരായ ആറു പ്രവാസികളുടെ മരണം ആഭ്യന്തര മന്ത്രാലയമാണ്​ വെളിപ്പെടുത്തിയത്​.

ഏഷ്യക്കാരനായ ഒരാളെ കാണാതായിട്ടുമുണ്ട്​. റാസൽഖൈമ, ഷാർജ, ഫുജൈറ എന്നിവിടങ്ങളിലായാണ്​ മൃതദേഹങ്ങൾ കണ്ടെടുത്തത്​. അപകടത്തിൽ പെട്ടവരുടെ പേരുവിവരങ്ങൾ പുറത്തുവിട്ടിട്ടില്ല.

ദുരന്ത ബാധിത മേഖലകളിൽ രക്ഷാപ്രവർത്തനം തുടരുകയാണ്​. വെള്ളിയാഴ്ച തെളിഞ്ഞ കാലാവസ്ഥയായതിനാൽ രക്ഷാപ്രവർത്തനവും ശുചീകരണവും സജീവമായിരുന്നു. വീടുകളും മറ്റും അപകടത്തിലായ മിക്കവരെയും സുരക്ഷിത സ്ഥാനങ്ങളിലേക്ക്​ മാറ്റിയിട്ടുണ്ടെന്ന്​ ആഭ്യന്തര മന്ത്രാലയം വക്​താവ്​ അറിയിച്ചു.