ഷേരിയും സാഫിയും പിടിക്കരുത്​, വിൽക്കരുത്​, വാങ്ങരുത്​ 

ദുബൈ: അറബ്​ ജനതയുടെ പ്രിയങ്കര മൽസ്യ ഇനങ്ങളായ ഷേരിയും സാഫിയും പിടിക്കുകയോ വിൽക്കുകയോ ചെയ്യരുതെന്ന്​ ദുബൈ മുൻസിപ്പാലിറ്റിയുടെ മുന്നറിയിപ്പ്​. പ്രജനന കാലമായതിനാൽ എല്ലാ വർഷം നടപ്പാക്കുന്ന നിരോധനത്തി​​​​െൻറ ഭാഗമായാണ്​ ഇൗ നിർദേശം പുറപ്പെടുവിച്ചിരിക്കുന്നത്​. മാർച്ച്​ ഒന്നിന്​ നിലവിൽ വന്ന നിരോധനം ഏപ്രിൽ 30 വരെ നീളും. ഇൗ കാലയളവിൽ മീൻപിടുത്തക്കാരുടെ വലയിൽ ഇൗ മീനുകൾ കുടുങ്ങിയാലുടൻ അവയുടെ സുരക്ഷ ഉറപ്പാക്കി വെള്ളത്തിലേക്ക്​ തിരിച്ചുവിടണം. രാജ്യത്തെ ഒരു ചന്തയിലും ഇൗ മൽസ്യങ്ങൾ വിൽക്കാൻ പാടില്ല. ഇറക്കുമതിയോ പുനർകയറ്റുമതിയോ പാടില്ല. ഉണക്കിയത്​, ചുട്ടത്​, െഎസിലിട്ടത്​, ഉപ്പിലിട്ടത്​, ടിന്നിലടച്ചത്​ തുടങ്ങി ഒരു രീതിയിലും വിൽപ്പന അനുവദിക്കില്ല.  

ഇത്തരം മീൻ വാങ്ങാതിരിക്കാൻ ഉപഭോക്​താക്കൾ ശ്രദ്ധിക്കണമെന്നും നിർദേശമുണ്ട്​. ഉത്തരവ്​ നടപ്പാക്കുനുണ്ടെന്ന്​ ഉറപ്പാക്കാൻ വിവിധ വകുപ്പുകളു​െട സഹകരണത്തോ​െട കർശന പരിശോധനകളും മേൽനോട്ടവും ആരംഭിച്ചതായി ഡയറക്​ടർ ജനറൽ ഹുസൈൻ നാസർ ലൂത്ത വ്യക്​തമാക്കി.  ഉദ്യോഗസ്​ഥർ മാർക്കറ്റുകളിലും കച്ചവട സ്​ഥാപനങ്ങളിലും ഇതു സംബന്ധിച്ച ബോധവത്​കരണം നടത്തിവരികയാണെന്ന്​ നഗരസഭ പരിസ്​ഥിതി വിഭാഗം ഡയറക്​ടർ ആലിയ അൽ ഹർമൂദി പറഞ്ഞു. ദേറ മീൻ മാർക്കറ്റ്​, ഉമ്മു സുഖീം തുറമുഖം എന്നിവിടങ്ങളിൽ കാമ്പയിൻ പൂർണമായി. അറബി, ഇംഗ്ലീഷ്​, ഹിന്ദി, ചൈനീസ്​ ഭാഷകളിൽ തയ്യാറാക്കിയ ലഘുലേഖകളും വിതരണം ചെയ്യുന്നുണ്ട്​.