ചരിത്രമായി ​ശൈഖ്​ മുഹമ്മദിന്‍റെ ഫ്രാൻസ്​ സന്ദർശനം; ഊർജ മേഖലയിൽ രണ്ട്​ സുപ്രധാന കരാറുകൾ ഒപ്പുവെച്ചു

അബൂദബി: യു.എ.ഇ പ്രസിഡൻറ് ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാന്‍റെ ദ്വിദിന ഫ്രാൻസ്​ സന്ദർശനം ഇരു രാജ്യങ്ങളും തമ്മിലെ ചരിത്രപരമായ ബന്ധത്തിൽ നാഴികല്ലായി. ​ഊർജം, ബിസിനസ്​, വിദ്യാഭ്യാസം, ബഹിരാകാശം തുടങ്ങിയ മേഖലകളിൽ നിരവധി സുപ്രധാന കരാറുകളും ധാരണാ പത്രങ്ങളും ഒപ്പുവെച്ചു. സന്ദർശനത്തിന്‍റെ രണ്ടാം ദിനമായ ചൊവ്വാഴ്ച പ്രധാനമന്ത്രി എലിസബത്ത് ബോൺ, നാഷനൽ അസംബ്ലി പ്രസിഡൻറ്​ യാൽ ബ്രൗൺ പിവറ്റ് എന്നിവരുൾപ്പെടെ ഉന്നത ഫ്രഞ്ച് ഉദ്യോഗസ്ഥരുമായി കൂടിക്കാഴ്ചകൾ നടന്നു. രാജ്യത്തെ സുപ്രധാന ലാൻഡ്​മാർക്കുകളും ശൈഖ്​ മുഹമ്മദ്​ അവസാന ദിവസം സന്ദർശിച്ചു. തിങ്കളാഴ്ച പാരീസിലെ എലീസി കൊട്ടാരത്തിൽ ഫ്രഞ്ച്​​ പ്രസിഡൻറ്​ ഇമ്മാനുവൽ മാക്രോണുമായും മറ്റു പ്രമുഖരുമായും കൂടിക്കാഴ്ചകൾ പൂർത്തീകരിച്ചിരുന്നു.

ഊർജ മേഖലയിൽ സുപ്രധാനമായ രണ്ട്​ കരാറുകളിലാണ്​ ഒപ്പുവെച്ചിരിക്കുന്നത്​. യു.എ.ഇ-ഫ്രാൻസ്​ സമഗ്ര ഊർജ പങ്കാളിത്തകരാറും അബുദാബി നാഷണൽ ഓയിൽ കമ്പനി(അഡ്​നോക്​)യും ഫ്രഞ്ച്​ കമ്പനിയായ ടോട്ടൽ എനർജീസും തമ്മിലെ പങ്കാളിത്ത കരാറുമാണ്​ ഒപ്പുവെച്ചത്​. എണ്ണ വിതരണത്തിൽ വിശ്വസനീയ സ്ഥാനമെന്ന നിലയിൽ യു.എ.ഇയുടെ പദവി ഉയർത്തുന്നതാണ്​ ഇരു കരാറുകളും. ഊർജ സുരക്ഷയും പ്രാപ്യമായ വിലയും ഡീകാർബണൈസേഷനും ഉറപ്പുവരുത്തലാണ്​ സമഗ്ര ഊർജ പങ്കാളിത്ത കരാറിലൂടെ ലക്ഷ്യമാക്കുന്നത്​. യുക്രൈൻ യുദ്ധത്തോടെ യൂറോപ്യൻ രാജ്യങ്ങൾ റഷ്യയെ എണ്ണക്ക്​ ആശ്രയിക്കുന്നത്​ കുറഞ്ഞ സാഹചര്യത്തിൽ വലിയ പ്രധാന്യമാണ്​ ഇരു കരാറുകൾക്കും​ നൽകപ്പെടുന്നത്​. ലോകത്തെ ആറാമത്തെ ഏറ്റവും വലിയ ക്രൂഡ്​ ഓയിൽ ശേഖരമുള്ള രാജ്യമാണ്​ യു.എ.ഇ.

സുസ്ഥിര സാമ്പത്തിക ബന്ധങ്ങളിലൂടെ ഇരു രാജ്യങ്ങളും തമ്മിലെ ബന്ധം ശക്തിപ്പെടുന്നത് തുടരുകയാണെന്ന്​ കരാറിൽ ഒപ്പുവെക്കുന്ന ചടങ്ങിലെ ചിത്രങ്ങൾ പങ്കുവെച്ച്​ ശൈഖ്​ മുഹമ്മദ്​ ട്വിറ്ററിൽ കുറിച്ചു. യു.എ.ഇ വ്യവസായ, അഡ്വാൻസ്‌ഡ് ടെക്‌നോളജി മന്ത്രിയും അഡ്‌നോക്​ മാനേജിംഗ് ഡയറക്ടറുമായ ഡോ. സുൽത്താൻ അൽ ജബറും ഫ്രഞ്ച് സാമ്പത്തിക, ധനകാര്യ മന്ത്രി ബ്രൂണോ ലെ മെയറുമാണ്​ കരാറുകളിൽ ഒപ്പുവെച്ചത്​. ഫ്രഞ്ച്​ പ്രസിഡന്‍റും ശൈഖ്​ മുഹമ്മദും ഒപ്പിടൽ ചടങ്ങിന്​ സാക്ഷികളായി. രാജ്യങ്ങൾ തമ്മിലെ സഹകരണം ആഴത്തിലാക്കുന്നതും ഊർജ്ജ ശൃംഖലയിലുടനീളം മികവിലേക്ക്​ നയിക്കുന്നതുമാണ്​ കരാറെന്ന്​ മന്ത്രി അൽ ജബർ പ്രസ്താവിച്ചു. അബുദാബി നാഷണൽ ഓയിൽ കമ്പനി(അഡ്​നോക്​)യും ഫ്രഞ്ച് എണ്ണ കമ്പനിയായ ടോട്ടൽ എനർജീസും ഊർജ മേഖലയിൽ വളർച്ചക്ക്​ പുതിയ അവസരങ്ങൾ പര്യവേക്ഷണം ചെയ്യുന്നതിനുള്ള പങ്കാളിത്ത കരാറിലാണ്​ ഒപ്പുവെച്ചത്​.