ശൈഖ്​ ഹംദാൻ എക്സ്​പോ ഡി.പി വേൾഡ്​ പവലിയൻ സന്ദർശിച്ചു

ദുബൈ: ദുബൈ കിരീടാവകാശിയും എക്​സിക്യൂട്ടിവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം എക്സ്​പോ 2020യിലെ ഡി.പി വേൾഡ്​ പവലിയൻ സന്ദർശിച്ചു. കമ്പനിയുടെ നേട്ടങ്ങളും പ്രവർത്തനങ്ങളും വിശദീകരിക്കുന്ന പ്രദർശനം നോക്കിക്കണ്ട അദ്ദേഹം വിവിധ മേഖലകളിൽ നൽകിയ സംഭാവനകളെ അഭിനന്ദിച്ചു. വിവിധ കമ്പനികൾ നൽകുന്ന സേവനങ്ങളും ഉൽപന്നങ്ങളുമാണ്​ നിരവധി ആഗോള റാങ്കിങ്ങുകളിൽ ഉയരാൻ രാജ്യത്തെ സഹായിച്ചതെന്നും അദ്ദേഹം പ്രസ്താവിച്ചു.

ഷിപ്പിങ്ങിനും വ്യാപാരത്തിനുമുള്ള ആഗോള കേന്ദ്രമെന്ന നിലയിൽ ദുബൈയെ മാറ്റുന്നതിൽ ഡി.പി വേൾഡ് അവിഭാജ്യ ഘടകമാണ്. ലോകത്ത്​ എമിറേറ്റിന്‍റെ സന്ദേശം എത്തിക്കുന്നതിലും മത്സരശേഷി നിലനിർത്തുന്നതിലും പ്രധാന പങ്കുവഹിച്ചു -അദ്ദേഹം കൂട്ടിച്ചേർത്തു.

നാലു മാസം പൂർത്തിയാകുന്ന എക്സ്​പോയിൽ നിരവധിയായ പരിപാടികൾക്ക്​ ആയിരങ്ങളാണ്​ കഴിഞ്ഞ ദിവസവും എത്തിച്ചേർന്നത്​. പ്രശസ്ത അമേരിക്കൻ റാപ്പ് സംഗീത സംഘം 'ബ്ലാക്ക് ഐയ്ഡ് പീസ്' ദുബൈ എക്സ്പോ വേദിയിലെത്തി. പ്രശസ്ത റാപ്പർമാരായ വില്യം, ടാബൂ, ആപിൽ ഡേ ആപ്പ്, റേ സോൾ തുടങ്ങിയവർ ആസ്വാദകരെ ഇളക്കിമറിച്ചു. എക്സ്പോയുടെ പ്രധാനവേദിയായ അൽവാസൽ പ്ലാസയിലായിരുന്നു ഇവരുടെ പ്രകടനം.