ഫ്രണ്ട്സ് ഓഫ് കേരള ശാസ്ത്രസാഹിത്യ പരിഷത്ത് വാർഷിക സമ്മേളനം

ദുബൈ: കേരള ശാസ്ത്രസാഹിത്യ പരിഷത്ത്​ മുൻകാല പ്രവർത്തകരുടെ കൂട്ടായ്മയായ ഫ്രണ്ട്സ് ഓഫ് കേരള ശാസ്ത്രസാഹിത്യ പരിഷത്ത് യു എ ഇ ചാപ്​റ്ററി​​െൻറ പന്ത്രണ്ടാം വാർഷിക സമ്മേളനം ഷാർജയിൽ  നടന്നു. ഉദ്ഘാടന സമ്മേളനത്തിനു ഡോ.കെ.പി. ഉണ്ണിക്കൃഷ്ണൻ അധ്യക്ഷത വഹിച്ചു. കേരള ശാസ്ത്രസാഹിത്യ പരിഷത്ത് കേന്ദ്ര നിർവാഹക സമിതി അംഗവും മുൻ സംസ്ഥാന പ്രസിഡൻറുമായ പ്രഫ. ടി. പി.കുഞ്ഞിക്കണ്ണൻ ഉദ്ഘാടനം നിർവഹിച്ചു.
കോർപറേറ്റുകളും രാഷ്​ട്രീയക്കാരും ഉന്നത ഉദ്യോഗസ്ഥരുമടങ്ങുന്ന ചങ്ങാത്തം മുതലാളിത്ത ലാഭത്വരക്കും പ്രകൃതിചൂഷണത്തിനും സാധുതയേകുന്നതായി അദ്ദേഹം പറഞ്ഞു. മാനവരാശിയുടെ പുരോഗതിയുടെ അടിസ്ഥാനം ശാസ്ത്രമാണ്. ശാസ്ത്രം സാമൂഹ്യവിപ്ലവത്തിന് എന്ന മുദ്രാവാക്യവുമായി അറിവി​​െൻറ സാർവത്രീകരണം ലക്ഷ്യം വച്ച് പ്രവർത്തിക്കുന്ന പരിഷത്തിനെപ്പോലെയുള്ള ജനകീയ ശാസ്ത്രപ്രസ്ഥാനങ്ങളുടെ പ്രസക്തി വർധിച്ച് വരുകയാണെന്ന് പ്രഫ. കുഞ്ഞിക്കണ്ണൻ പറഞ്ഞു. കെ.എൽ.ഗോപി, അനിൽ അമ്പാട്ട് , അഡ്വ സന്തോഷ്  എന്നിവർ സംസാരിച്ചു. ഡോ. അനുഷ സ്വാഗതവും ദേവരാജൻ നന്ദിയും രേഖപ്പെടുത്തി.
പ്രതിനിധി സമ്മേളനത്തിൽ പ്രസിഡൻറ്​ അഡ്വ. മാത്യൂ ആൻറണി അധ്യക്ഷനായിരുന്നു. മനോജ്കുമാർ റിപോർടും ജോസഫ് ഫിലിപ്പ് കണക്കും അവതരിപ്പിച്ചു. 
പുതിയ ഭാരവാഹികളായി അഡ്വ. ശ്രീകുമാരി ആൻറണി (പ്രസിഡണ്ട്),  ഈദ് കമൽ(വൈസ് പ്രസിഡണ്ട്), ഹരിദാസ് (കോർഡിനേറ്റർ),  മണികണ്ഠൻ,സന്തോഷ് പെരുനാട് (ജോ. കോർഡിനേർമാർ), ജോസഫ് ഫിലിപ്പ് (ട്രഷറർ) എന്നിവരെ തെരഞ്ഞെടുത്തു.