ഷാര്‍ജ പാര്‍ക്കിലെ താമസക്കാര്‍ക്ക് ആശ്വാസവുമായി സാമൂഹ്യ പ്രവര്‍ത്തക​രെത്തി

ഷാര്‍ജ: അല്‍ ജുബൈലിലെ സൗദി പള്ളിക്കടുത്തുള്ള പാര്‍ക്കില്‍ മാസങ്ങളായി ദുരിതം ജീവിതം നയിക്കുന്നവര്‍ക്ക് ആശ്വാസവുമായി സാമൂഹ്യ പ്രവര്‍ത്തകരെത്തി. തമിഴ്​നാട്, ആന്ധ്രപ്രദേശ്, പഞ്ചാബ് സ്വദേശികളാണ് തണുപ്പും വിശപ്പും സഹിച്ച് പാര്‍ക്കില്‍ കഴിയുന്നത്. ജോലിഭാരവും പറഞ്ഞ ശമ്പളം ലഭിക്കാത്തതി​​െൻറ പേരിലുമാണ് ഇവര്‍ ദുരിത ജീവിതത്തിലേക്കിറങ്ങാന്‍ കാരണം. എന്‍ജിനീയര്‍ മുതല്‍ മത്സ്യബന്ധനത്തിന് പോകുന്നവര്‍ വരെ ഈ കൂട്ടത്തിലുണ്ട്. ഒരു മലയാളിയും ഇടക്ക് ഇവരുടെ കൂട്ടത്തില്‍ കൂടാറുണ്ട്. കൂട്ടുകാരുടെ മുറിയില്‍ ഇടമില്ലാതാകുമ്പോളാണ് ഇയാള്‍ പാര്‍ക്കില്‍ ഉറങ്ങാന്‍ എത്തുന്നത്, ഇയാളുടെ പ്രശ്​നവും സമാനമാണ്​. ഇതില്‍ യുവ എന്‍ജിനിയര്‍ക്ക് താമസിക്കാനുള്ള സൗകര്യം മലയാളി സാമൂഹ്യ പ്രവര്‍ത്തക​​െൻറ ഇടപ്പെടല്‍ മൂലം ശനിയാഴ്​ച ലഭിച്ചിട്ടുണ്ട്. ഒരാഴ്​ചക്കുള്ളില്‍ ഇയാള്‍ക്ക് നാട്ടിലേക്ക് മടങ്ങാനാവുമെന്നാണ് കരുതുന്നത്. മലയാളിയും പെട്ടെന്ന് മടങ്ങാനാവുമെന്ന പ്രതീക്ഷയിലാണ്. വിസ കഴിഞ്ഞവരും ഇവരുടെ കൂട്ടത്തിലുണ്ട്. കൊടും തണുപ്പില്‍ കിടന്നും ആഹാരം ലഭിക്കാതെയും ഇവരെല്ലാം മാനസികമായും ശാരിരികമായും തളര്‍ന്ന അവസ്ഥയിലാണ്. പാര്‍ക്കിലെ ഒരു മരത്തി​​െൻറ ചില്ലയിലാണ് പുതപ്പും വസ്ത്രവും സൂക്ഷിച്ചിരിക്കുന്നത്. കുളിയും മറ്റും പൊതു ശുചിമുറിയിലുമാണ്. ഇവരുടെ കൂട്ടത്തിലെ പഞ്ചാബ് സ്വദേശിക്ക് വീണതിനെ തുടര്‍ന്ന് കൈക്ക് പരിക്കുണ്ട്. എന്നാല്‍ രേഖകള്‍ കൈവശമില്ലാത്തതിനാൽ ഡോക്​ടറെ കാണാന്‍ പറ്റാത്ത അവസ്ഥയാണ്. ആന്ധ്രസ്വദേശി  മൂന്ന് ലക്ഷം രൂപ കടം വാങ്ങിയാണ്  ഇവിടെ എത്തിയത്. അത് വീട്ടാതെ നാട്ടിലേക്ക് പോകാനാവില്ലെന്നാണ്​ ഇയാളുടെ നിലപാട്​. 2020 വരെയുള്ള വിസ ഇയാള്‍ക്കുണ്ട്. തിരിച്ചറിയല്‍ രേഖകളും കൈവശമുണ്ട്. എന്നാല്‍ എല്ലാവരുടേയും പാസ്പോര്‍ട്ട് കമ്പനികളിലാണ്. പാര്‍ക്കില്‍ എത്തുമ്പോള്‍ എല്ലാവരുടെയും കൈവശം മൊബൈല്‍ ഫോണ്‍ ഉണ്ടായിരുന്നു. പിന്നീട്​ ഇവ മോഷ്​ടിക്കപ്പെട്ടു. ഇവരെ ചൂക്ഷണം ചെയ്യാനും ആളുകളുണ്ട്. താത്ക്കാലിക ജോലികള്‍ക്ക് കൊണ്ട് പോയി ആഹാരവും കൂലിയും നല്‍ക്കാതെ പറ്റിക്കുകയാണ്​. ഇങ്ങനെ ചെയ്യുന്നവരിലേറെയും മലയാളികളാണെന്ന് ഇവര്‍ പറയുന്നു.